Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Bibliya Online

BAG-ONG KALIBOTANG HUBAD SA BALAANG KASULATAN

Numeros 9:1-23

9  Ug si Jehova misulti kang Moises sa kamingawan sa Sinai sa ikaduhang tuig sa ilang paggula sa yuta sa Ehipto, sa unang bulan,+ nga nag-ingon:  “Karon ang mga anak sa Israel kinahanglang mag-andam sa halad sa paskuwa+ sa tinudlong panahon niini.+  Sa ikanapulog-upat nga adlaw niining bulana taliwala sa duha ka gabii+ kamo kinahanglang mag-andam niini sa tinudlong panahon niini. Sumala sa tanang lagda niini ug sa tanang naandang paagi niini kamo kinahanglang mag-andam niini.”+  Busa misulti si Moises sa mga anak sa Israel nga mag-andam sa halad sa paskuwa.  Unya sila nag-andam sa halad sa paskuwa sa unang bulan, sa ikanapulog-upat nga adlaw sa bulan taliwala sa duha ka gabii, didto sa kamingawan sa Sinai. Sumala sa tanan nga gisugo ni Jehova kang Moises, kana ang gibuhat sa mga anak sa Israel.+  Karon nahitabo nga dihay mga tawo nga nahimong mahugaw tungod sa tawhanong kalag+ mao nga sila wala makaandam sa halad sa paskuwa niadtong adlawa. Busa sila miatubang kang Moises ug kang Aaron niadtong adlawa.+  Unya kadtong mga tawhana miingon kaniya: “Kami mahugaw tungod sa usa ka tawhanong kalag. Nganong pugngan man kami sa pagtanyag ug halad+ kang Jehova sa tinudlong panahon niini taliwala sa mga anak sa Israel?”  Niini si Moises miingon kanila: “Barog kamo diha, ug pamation ko kon unsay isugo ni Jehova bahin kaninyo.”+  Unya si Jehova misulti kang Moises, nga nag-ingon: 10  “Sultihi ang mga anak sa Israel, nga magaingon, ‘Kon si bisan kinsa kaninyo o sa inyong mga kaliwatan ang mahimong mahugaw tungod sa usa ka kalag+ o anaa sa halayong panaw, siya usab kinahanglang mag-andam sa halad sa paskuwa alang kang Jehova. 11  Sa ikaduhang bulan,+ sa ikanapulog-upat ka adlaw taliwala sa duha ka gabii, kinahanglang andamon nila kini. Kan-on nila kini uban sa mga tinapay nga walay igpapatubo ug sa mga utanon nga mapait.+ 12  Dili sila magsalin ug bisan unsa niini hangtod sa pagkabuntag,+ ug dili nila balion ang bukog niini.+ Sila kinahanglang mag-andam niini sumala sa tibuok nga lagda sa paskuwa.+ 13  Apan kon ang tawo hinlo o wala sa panaw ug wala magpakabana sa pag-andam sa halad sa paskuwa, kana nga kalag kinahanglang pagaputlon gikan sa iyang katawhan,+ tungod kay siya wala magtanyag sa halad ni Jehova sa tinudlong panahon niini. Kanang tawhana manubag sa iyang sala.+ 14  “‘Ug kon ang usa ka langyawng pumoluyo nagapuyo uban kaninyo ingon nga langyaw, siya usab kinahanglang mag-andam ug halad sa paskuwa alang kang Jehova.+ Siya magabuhat niini sumala sa lagda sa paskuwa ug sumala sa naandang paagi niini.+ Adunay usa lamang ka lagda alang kaninyo, alang sa langyawng pumoluyo ug alang sa lumad sa yuta.’”+ 15  Karon sa adlaw nga gipatindog ang tabernakulo+ ang panganod mitabon sa tabernakulo sa tolda sa Pagpamatuod,+ apan sa gabii ang samag kalayo+ nagpabilin sa ibabaw sa tabernakulo hangtod sa pagkabuntag. 16  Kini kanunay nga ingon niini: Sa adlaw ang panganod motabon niini, ug sa gabii ang kalayo magpakita.+ 17  Ug inigpataas sa panganod gikan sa ibabaw sa tolda, ang mga anak sa Israel mobiya dayon,+ ug sa dapit nga mopondo ang panganod, adto usab magkampo ang mga anak sa Israel.+ 18  Sa sugo ni Jehova ang mga anak sa Israel mobiya, ug sa sugo ni Jehova sila magpabilin.+ Sa tanang adlaw nga ang panganod magdugay ibabaw sa tabernakulo, sila magpabilin nga nagkampo. 19  Ug kon ang panganod magdugay ibabaw sa tabernakulo sa daghang adlaw, ang mga anak sa Israel usab magpadayon sa pagtuman sa ilang obligasyon kang Jehova nga sila kinahanglang dili mobiya.+ 20  Ug usahay ang panganod magpabilin sulod sa pipila ka adlaw ibabaw sa tabernakulo. Sumala sa sugo+ ni Jehova sila magpabiling nagkampo, ug sumala sa sugo ni Jehova sila mobiya. 21  Ug usahay ang panganod+ magpabilin sugod sa gabii hangtod sa pagkabuntag; ug ang panganod mopataas sa pagkabuntag, ug sila mobiya. Sa adlaw man o sa gabii nga mopataas ang panganod, sila usab mobiya.+ 22  Duha man ka adlaw o usa ka bulan o daghang mga adlaw nga ang panganod magdugay ibabaw sa tabernakulo pinaagi sa pagpondo ibabaw niini, ang mga anak sa Israel magpabiling nagkampo ug dili mobiya, apan inigpataas niini sila mobiya.+ 23  Sa sugo ni Jehova sila magkampo, ug sa sugo ni Jehova sila mobiya. Sila nagtuman sa ilang obligasyon+ kang Jehova sumala sa sugo ni Jehova pinaagi kang Moises.+

Mga Footnote