Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Bibliya Online

BAG-ONG KALIBOTANG HUBAD SA BALAANG KASULATAN

Levitico 27:1-34

27  Ug si Jehova nagpadayon sa pagsulti kang Moises, nga nag-ingon:  “Sultihi ang mga anak sa Israel, ug ingna sila, ‘Kon ang usa ka tawo maghimog linaing panaad+ nga halad sa mga kalag alang kang Jehova sumala sa gibanabana nga bili,  ug ang gibanabana nga bili maoy sa usa ka lalaki gikan sa kagulangon nga kawhaan ka tuig hangtod sa kan-uman ka tuig, nan ang gibanabana nga bili maoy kalim-an ka siklo nga plata sumala sa siklo sa balaang dapit.  Apan kon kini babaye, nan ang gibanabana nga bili maoy katloan ka siklo.  Ug kon ang edad maoy gikan sa lima ka tuig hangtod sa kawhaan ka tuig, ang gibanabana nga bili sa lalaki maoy kawhaan ka siklo ug alang sa babaye napulo ka siklo.  Ug kon ang edad maoy gikan sa usa ka bulan hangtod sa lima ka tuig, nan ang gibanabana nga bili sa lalaki maoy lima+ ka siklo nga plata ug alang sa babaye ang gibanabana nga bili maoy tulo ka siklo nga plata.  “‘Karon kon ang edad maoy gikan sa kan-uman ka tuig pataas, kon kini lalaki, nan ang gibanabana nga bili maoy napulog-lima ka siklo ug alang sa babaye napulo ka siklo.  Apan kon siya kabos kaayo alang sa gibanabana nga bili,+ nan iyang pabarogon ang maong tawo sa atubangan sa saserdote, ug ang saserdote magbutang ug bili kaniya.+ Sumala sa maabot sa nanaad,+ ang saserdote magbutang ug bili kaniya.  “‘Ug kon kini usa ka mananap sama nianang ginahalad sa usa ngadto kang Jehova, ang tanan nga iyang ihatag kang Jehova mahimong balaan.+ 10  Dili niya kini mahimong pulihan, dili niya kini mahimong ilisan ug maayo baylo sa dili maayo o dili maayo baylo sa maayo. Apan kon iya gayod kining ilisan, mananap baylo sa mananap, kini mismo ug ang giilis niini mahimo gayod nga balaan. 11  Ug kon kini maoy usa ka mahugaw+ nga mananap sama nianang dili ihalad sa usa ngadto kang Jehova,+ nan iyang pabarogon ang mananap sa atubangan sa saserdote.+ 12  Ug ang saserdote magbutang ug bili niini kon kini ba maayo o dili maayo. Sumala sa bili nga ibanabana+ sa saserdote, mamao kini. 13  Apan kon buot gayod niya nga lukaton kini, nan siya maghatag ug ikalima+ ka bahin niini dugang pa sa gibanabana nga bili. 14  “‘Karon kon ang usa ka tawo magbalaan sa iyang balay ingong butang nga balaan ngadto kang Jehova, nan ang saserdote magbutang ug bili niini kon kini ba maayo o dili maayo.+ Sumala sa ihatag sa saserdote nga bili, mamao ang bili niini. 15  Apan kon ang nagpabalaan buot molukat sa iyang balay, nan siya magahatag ug ikalimang bahin sa salapi sa gibanabana nga bili dugang pa niini;+ ug maiya kini. 16  “‘Ug kon usa ka bahin sa yuta nga iyang gipanag-iya+ ang pagabalaanon sa usa ka tawo ngadto kang Jehova, nan ang bili niini pagabanabanaon sumala sa binhi niini: kon usa ka homer+ nga binhi sa sebada, nan kini maoy kalim-an ka siklo nga plata. 17  Kon pagabalaanon niya ang iyang yuta sukad sa tuig sa Tinghugyaw,+ kini mobili sumala sa gibanabana nga bili. 18  Ug kon human sa Tinghugyaw nga balaanon niya ang iyang yuta, nan pagakuwentahon sa saserdote alang kaniya ang bili niini sumala sa mga tuig nga nahibilin hangtod sa sunod tuig nga Tinghugyaw, ug pagakunhoran ang gibanabana nga bili.+ 19  Apan kon ang yuta lukaton gayod sa nagpabalaan niini, nan siya magahatag sa ikalimang bahin sa salapi sa gibanabana nga bili dugang pa niini, ug magpabilin kini nga iyaha.+ 20  Karon kon dili niya lukaton ang yuta ug kon ang yuta mabaligya ngadto sa laing tawo, kini dili na malukat. 21  Ug ang yuta sa dihang mapahigawas kini panahon sa Tinghugyaw mahimo gayod nga balaan alang kang Jehova, ingong yuta nga hinalad.+ Kini panag-iyahon sa saserdote.+ 22  “‘Ug kon siya magabalaan alang kang Jehova ug usa ka yuta nga pinalit niya nga dili bahin sa yuta nga iyang gipanag-iya,+ 23  nan kuwentahon sa saserdote alang kaniya ang gibanabana nga bili niini hangtod sa tuig sa Tinghugyaw, ug iyang ihatag ang gibanabana nga bili nianang adlawa.+ Butang kini nga balaan alang kang Jehova.+ 24  Sa tuig sa Tinghugyaw ang yuta mahibalik ngadto sa iyang gipalitan niini, ngadto sa usa nga nanag-iya sa yuta.+ 25  “‘Karon ang matag bili pagabanabanaon sumala sa siklo sa balaang dapit. Ang siklo angay nga mokabat ug kawhaan ka gerah.+ 26  “‘Ang mga panganay lamang taliwala sa mga mananap, nga gipanganak ingong panganay alang kang Jehova,+ walay tawo nga magbalaan niini. Torong baka o karnero, iya kini ni Jehova.+ 27  Ug kon kini gikan sa mahugaw nga mga mananap+ ug pagalukaton niya kini sumala sa gibanabana nga bili, nan siya magahatag ug ikalima ka bahin niini dugang pa niini.+ Apan kon kini dili lukaton, nan ibaligya kini sumala sa gibanabana nga bili. 28  “‘Lamang walay gipahinungod nga butang nga mahimong itugyan kang Jehova alang sa kalaglagan+ gikan sa tanan nga iyaha sa usa ka tawo, gikan man sa katawhan o sa mga mananap o gikan sa yuta nga iyang gipanag-iya, nga ikabaligya, ug walay bisan unsang gipahinungod nga butang ang mahimong lukaton.+ Butang kini nga labing balaan alang kang Jehova. 29  Walay gipahinungod nga tawo nga gitugyan sa kalaglagan gikan sa katawhan ang mahimong tubson.+ Siya patyon sa walay pakyas.+ 30  “‘Ug ang matag ikapulong bahin+ sa yuta, gikan sa binhi sa yuta ug sa bunga sa kahoy, iyaha ni Jehova. Butang kini nga balaan alang kang Jehova. 31  Ug kon ang usa ka tawo buot gayod molukat ug bisan unsa sa iyang ikapulong bahin, siya magahatag sa ikalima niini dugang pa niini.+ 32  Kon bahin sa matag ikapulong bahin sa panon sa mga baka ug sa panon sa mga karnero, ang tanan nga moagi ilalom sa baston,+ ang ikapulong ulo niini mahimong balaan alang kang Jehova. 33  Dili niya usisahon kon kini ba maayo o dili maayo, ni bayloan niya kini. Apan kon kini iya gayod nga bayloan, nan kini mismo ug ang gibaylo niini mahimong butang nga balaan.+ Dili kini mahimong lukaton.’” 34  Kini ang mga sugo+ nga gihatag ni Jehova kang Moises ingong mga sugo ngadto sa mga anak sa Israel didto sa Bukid sa Sinai.+

Mga Footnote