Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Bibliya Online

BAG-ONG KALIBOTANG HUBAD SA BALAANG KASULATAN

Job 42:1-17

42  Ug karon si Job mitubag kang Jehova ug miingon:   “Nahibaloan ko na nga ikaw makahimo sa tanang butang,+ Ug walay hunahuna nga dili nimo makab-ot.+   ‘Kinsa ba kining naglubog sa tambag sa pagkawalay-kahibalo?’+ Busa ako misulti, apan wala ako makasabot Mga butang nga katingalahan kaayo alang kanako, nga wala nako mahibaloi.+   ‘Pamati, palihog, ug ako mosulti. Ako mangutana kanimo, ug suginli ako.’+   Sa hulungihong nakadungog ako bahin kanimo, Apan karon ang akong mata nakakita kanimo.   Mao nga ako naghimog pagbakwi, Ug ako naghinulsol+ sa abog ug sa abo.”   Ug nahitabo nga sa tapos ikasulti ni Jehova kining mga pulonga kang Job, si Jehova miingon kang Elipaz nga Temanhon: “Miinit ang akong kasuko batok kanimo ug sa imong duha ka higala,+ kay kamo wala mosulti sa tinuod+ mahitungod kanako ingon sa akong alagad nga si Job.  Ug karon pagkuha kamo ug pito ka torong baka ug pito ka laking karnero+ ug adtoa ninyo ang akong alagad nga si Job,+ ug pagtanyag kamo ug halad-nga-sinunog alang sa inyong kaugalingon; ug si Job nga akong alagad mag-ampo alang kaninyo.+ Ang iyang nawong lamang ang akong dawaton aron walay makauulaw nga kabuangan nga buhaton kaninyo, kay kamo wala mosulti sa tinuod mahitungod kanako, ingon sa akong alagad nga si Job.”+  Busa si Elipaz nga Temanhon ug si Bildad nga Shuhanon ug si Zopar nga Naamahanon milakaw ug mibuhat ingon sa gisulti ni Jehova kanila; ug busa gidawat ni Jehova ang nawong ni Job. 10  Ug si Jehova nagbali sa binihag nga kahimtang ni Job+ sa dihang siya nag-ampo alang sa iyang mga higala,+ ug si Jehova naghatag kang Job ug doble pa sa tanan niyang nabatonan sa miagi.+ 11  Unya nangadto kaniya ang tanan niyang mga igsoong lalaki ug ang tanan niyang mga igsoong babaye ug ang tanan nga kanhi nakaila kaniya,+ ug sila nangaon ug tinapay uban kaniya+ diha sa iyang balay ug miduyog sa iyang kasubo ug naghupay kaniya tungod sa tanang katalagman nga gitugot ni Jehova nga modangat kaniya; ug ang tagsatagsa kanila naghatag kaniya ug usa ka pirasong salapi ug usa ka singsing nga bulawan. 12  Kon bahin kang Jehova, iyang gipanalanginan+ ang kaulahian ni Job labaw pa kay sa iyang sinugdan,+ mao nga siya nakabaton ug napulog-upat ka libong karnero ug unom ka libong kamelyo ug usa ka libong parisan nga baka ug usa ka libong asna. 13  Siya nakabaton usab ug pito ka anak nga lalaki ug tulo ka anak nga babaye.+ 14  Ug iyang gitawag ang ngalan sa una nga Jemima ug ang ngalan sa ikaduha nga Kezia ug ang ngalan sa ikatulo Keren-hapuk. 15  Ug sa tibuok yuta walay mga babaye nga nakaplagan nga sama kaanyag sa mga anak nga babaye ni Job, ug ang ilang amahan naghatag kanila ug panulondon taliwala sa ilang mga igsoong lalaki.+ 16  Ug si Job nabuhi pa human niini ug usa ka gatos ug kap-atan ka tuig+ ug nakakita sa iyang mga anak ug sa iyang mga apo+—upat ka kaliwatan. 17  Ug sa kataposan si Job namatay, tigulang na ug tagbaw sa mga adlaw.+

Mga Footnote