Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Bibliya Online

BAG-ONG KALIBOTANG HUBAD SA BALAANG KASULATAN

Job 38:1-41

38  Ug si Jehova mitubag kang Job gikan sa unos+ ug miingon:   “Kinsa ba kining naglubog sa tambag Pinaagi sa mga pulong sa pagkawalay-kahibalo?+   Baksi ang imong hawak, palihog, ingon sa usa ka tawo nga lig-on ug lawas, Ug pasuknaa ako kanimo, ug suginli ako.+   Diin ka man sa pagtukod ko sa kalibotan?+ Sultihi ako, kon imong nahibaloan ang pagsabot.   Kinsay nagbuot sa mga sukod niini, kon ugaling ikaw nahibalo, O kinsa bay naglatid sa pising igsusukod sa ibabaw niana?   Unsa may giugbokan sa mga suksokanang patongan+ niini, O kinsay nagpahiluna sa bato nga pamag-ang niini,   Sa dihang ang mga bituon sa kabuntagon+ nagdungan paghugyaw sa kalipay, Ug ang tanang anak sa Diyos+ misinggit sa pagdayeg?   Ug kinsa bay nag-ali sa dagat pinaagi sa mga pultahan,+ Nga migula ingon sa misugwak gikan sa tagoangkan;   Sa dihang gibutang ko ang panganod ingon nga besti niini Ug ang mabagang kangiob ingon nga limin niini, 10  Ug gibutang ko ang akong regulasyon sa ibabaw niini Ug gipahiluna ang trangka ug mga pultahan,+ 11  Ug ako nagkanayon, ‘Dinhi ka ra kutob, ug dili na mosaylo;+ Ug gikutohan taman dinhi ang imong magarbohong mga balod’?+ 12  Sukad pa ba kaniadto sa imong mga adlaw nga ikaw nagsugo sa kabuntagon?+ Gipahibalo mo ba sa kaadlawon ang iyang dapit, 13  Aron makahupot sa mga kinatumyan sa yuta, Aron ang mga daotan mayugyog gikan niini?+ 14  Nahimo kining ingon sa yutang-kulonon+ sa ilalom sa usa ka igtitimbre, Ug ang mga butang napahiluna nga ingon sa usa ka besti. 15  Ug gikan sa mga daotan ang ilang kahayag gipugngan,+ Ug ang hataas nga bukton nabali.+ 16  Nakaadto ka ba sa mga tinubdan sa dagat, O ikaw ba nakalibot na+ aron sa pagpangita sa halawom nga katubigan?+ 17  Napadayag ba kanimo ang mga ganghaan sa kamatayon,+ O imo bang makita ang mga ganghaan sa mabagang kangiob?+ 18  Makinaadmanon mo bang napalandong ang lapad nga mga luna sa yuta?+ Sulti, kon ikaw nakahibalo niining tanan. 19  Hain, karon, ang dalan padulong sa pinuy-anan sa kahayag?+ Kon bahin sa kangitngit, hain, karon, ang iyang dapit, 20  Aron imo kining madala ngadto sa iyang utlanan Ug aron ikaw makasabot sa mga agianan paingon sa balay niini? 21  Ikaw ba nakahibalo tungod kay niadtong panahona ikaw natawo na,+ Ug tungod kay daghan ang imong mga adlaw? 22  Nakasulod ka na ba sa mga balay-tipiganan sa niyebe,+ O imo bang nakita bisan ang mga balay-tipiganan sa ulan nga yelo,+ 23  Nga akong gipugngan una alang sa panahon sa kasakit, Alang sa adlaw sa panag-away ug sa gubat?+ 24  Hain, karon, ang dalan diin atua nabahin ang kahayag, Ug nasabwag ang hangin nga timog+ ibabaw sa yuta? 25  Kinsa ba ang naghimo ug usa ka agianan alang sa baha Ug usa ka dalan alang sa dag-om sa bagyo nga inubanan ug dalugdog,+ 26  Aron sa pagpaulan niini sa yuta nga walay tawo,+ Diha sa kamingawan nga walay yutan-ong tawo, 27  Aron sa pagtagbaw sa gihampak-sa-bagyo ug biniyaan nga mga dapit Ug aron sa pagpatubo sa linghod nga balili?+ 28  May amahan ba ang ulan,+ O kinsa ba ang nag-anak sa mga tinulo sa yamog?+ 29  Gikan kang kinsa bang tiyan migula ang yelo, Ug kon bahin sa nanibuok nga tun-og+ sa langit, kinsa man gayod ang nag-anak niini? 30  Ang katubigan nagtago sa ilang kaugalingon nga ingon ug nailadman sa bato, Ug ang ibabaw sa halawom nga katubigan nanibuok.+ 31  Makahigot ka ba nga hugot sa mga bugkos sa konstelasyong Kima, O makabadbad ka ba sa mga tagkos sa konstelasyong Kesil?+ 32  Mapagula mo ba ang konstelasyong Mazzaroth sa tinudlong panahon niini? Ug kon bahin sa konstelasyong Ash uban sa mga anak niini, ikaw ba makagiya kanila? 33  Nakahibalo ka ba sa mga lagda sa kalangitan,+ O ikabutang mo ba ang awtoridad niini diha sa yuta? 34  Makapatugbaw ka ba sa imong tingog ngadto sa panganod, Aron ang bul-og sa tubig makatabon kanimo?+ 35  Makasugo ka ba sa mga kilat aron sila manglakaw Ug moingon kanimo, ‘Ania kami!’? 36  Kinsay nagbutang ug kaalam+ sa mga lut-od sa panganod, O kinsay naghatag ug pagsabot+ sa katingad-anang butang sa langit? 37  Kinsay tukmang makaihap sa mga panganod pinaagi sa kaalam, O ang mga banga sa langit—kinsay makayabo kanila,+ 38  Sa dihang ang abog mabubo nga mahimong tibuok nga inumol, Ug ang mga bugon sa yuta managtapot? 39  Makapangayam ka ba ug tukbonon alang sa usa ka leyon Ug makapatagbaw ka ba sa hilabihang gana sa pagkaon sa mga nating leyon,+ 40  Sa dihang sila manghupo sa mga tagoanan,+ O magpahiluna sa sinalipdang dapit aron sa pagbanhig? 41  Kinsa ba ang nagaandam sa uwak sa iyang pagkaon+ Sa dihang ang iyang mga kuyabog motuaw sa Diyos alang sa tabang, Sa dihang sila nagalatagaw tungod kay walay makaon?

Mga Footnote