Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Bibliya Online | BAG-ONG KALIBOTANG HUBAD SA BALAANG KASULATAN

Genesis 9:1-29

9  Ug gipanalanginan sa Diyos si Noe ug ang iyang mga anak ug miingon kanila: “Magmabungahon ug magdaghan kamo ug pun-a ang yuta.+  Ug ang pagkahadlok kaninyo ug ang pagkalisang kaninyo magpadayon diha sa matag buhing linalang sa yuta ug diha sa matag naglupad nga linalang sa kalangitan, diha sa tanang nagalihok sa yuta, ug diha sa tanang isda sa dagat. Sa inyong kamot sila karon gihatag.+  Ang matag nagalihok nga mananap nga buhi mahimong kalan-on alang kaninyo.+ Mahitungod sa lunhawng katanoman, ako naghatag niining tanan kaninyo.+  Ang unod lamang uban sa kalag+ niini—ang dugo+ niini—dili gayod ninyo pagakan-on.+  Ug, gawas pa niana, ang inyong dugo sa inyong mga kalag akong paninglon. Gikan sa kamot sa matag buhing linalang ako kining paninglon; ug gikan sa kamot sa tawo, gikan sa kamot sa matag usa nga iyang igsoon, akong paninglon ang kalag sa tawo.+  Ang bisan kinsa nga magaula ug dugo sa tawo, pinaagi sa tawo ang iyang kaugalingong dugo igaula,+ kay sa larawan sa Diyos iyang gibuhat ang tawo.  Ug kon bahin kaninyo, magmabungahon ug magdaghan kamo, dagsangan ninyo ang yuta ug magdaghan diha niini.”+  Ug ang Diyos miingon kang Noe ug sa iyang mga anak nga lalaki nga uban kaniya:  “Ug bahin kanako, ania, ako nagahimo sa akong pakigsaad+ uban kaninyo ug uban sa inyong kaliwat sunod kaninyo,+ 10  ug uban sa matag buhing kalag nga uban kaninyo, sa mga langgam, sa mga mananap ug sa tanang buhing linalang sa yuta uban kaninyo, gikan sa tanan nga nanggula sa arka hangtod sa matag buhing linalang sa yuta.+ 11  Oo, ako nagahimo sa akong pakigsaad uban kaninyo: Dili na pagalaglagon ang tanang unod pinaagi sa mga tubig sa lunop, ug wala nay mahitabong lunop nga magalaglag sa yuta.”+ 12  Ug ang Diyos midugang: “Kini mao ang ilhanan+ sa pakigsaad nga akong gihatag tali kanako ug kaninyo ug sa matag buhing kalag nga anaa uban kaninyo, alang sa mga kaliwatan hangtod sa panahong walay tino. 13  Gihatag ko ang akong balangaw+ diha sa panganod, ug magsilbi kining ilhanan sa pakigsaad tali kanako ug sa yuta. 14  Ug mahitabo nga sa dihang ako magdala ug panganod ibabaw sa yuta, niana ang balangaw mopatim-aw gayod diha sa panganod. 15  Ug ako tinong mahinumdom sa akong pakigsaad+ nga maoy tali kanako ug kaninyo ug sa matag buhing kalag taliwala sa tanang unod;+ ug wala nay mga tubig nga molunop sa paglaglag sa tanang unod.+ 16  Ug ang balangaw motungha diha sa panganod,+ ug makita ko gayod kini sa paghinumdom sa pakigsaad hangtod sa panahong walay tino+ tali sa Diyos ug sa matag buhing kalag taliwala sa tanang unod nga anaa ibabaw sa yuta.”+ 17  Ug gisubli sa Diyos kang Noe: “Kini mao ang ilhanan sa pakigsaad nga akong gihimo tali kanako ug sa tanang unod nga anaa ibabaw sa yuta.”+ 18  Ug ang mga anak nga lalaki ni Noe+ nga migula sa arka mao si Sem ug si Ham ug si Japet. Sa ulahi si Ham mao ang amahan ni Canaan.+ 19  Kining tulo mao ang mga anak nga lalaki ni Noe, ug gikan kanila mikaylap sa halayo ang tanang katawhan sa yuta.+ 20  Karon si Noe nagsugod ingong usa ka mag-uuma+ ug nagtanom ug usa ka parasan.+ 21  Ug siya miinom ug bino ug nahubog,+ ug busa siya naghubo sa sulod sa iyang tolda. 22  Sa ulahi si Ham+ nga amahan ni Canaan nakakita sa kahubo sa iyang amahan+ ug gisugilon kini sa iyang duha ka igsoong lalaki nga didto sa gawas.+ 23  Niana si Sem ug si Japet nagkuhag kupo+ ug nagbutang niini diha sa ilang duha ka abaga ug naglakaw nga paatras. Sa ingon gitabonan nila ang kahubo sa ilang amahan, samtang ang ilang mga nawong gilingiw, ug wala nila makita ang kahubo sa ilang amahan.+ 24  Sa kataposan nahigmata si Noe gikan sa iyang pagkahubog ug iyang nahibaloan ang gibuhat sa iyang kamanghorang anak kaniya. 25  Niini siya miingon: “Tinunglo si Canaan.+ Mahimo siyang labing ubos nga ulipon sa iyang mga igsoon.”+ 26  Ug siya midugang: “Dalayegon si Jehova,+ ang Diyos ni Sem, Ug si Canaan mahimong iyang ulipon.+ 27  Maghatag ang Diyos ug dakong luna kang Japet, Ug mopuyo siya sa mga tolda ni Sem.+ Si Canaan mahimo usab nga iyang ulipon.” 28  Ug si Noe nabuhi sa tulo ka gatos ug kalim-an ka tuig human sa lunop.+ 29  Busa ang tanang adlaw ni Noe mikabat ug siyam ka gatos ug kalim-an ka tuig ug siya namatay.+

Mga Footnote