Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Bibliya Online

BAG-ONG KALIBOTANG HUBAD SA BALAANG KASULATAN

Exodo 37:1-29

37  Si Bezalel+ karon naghimo sa Arka+ sa kahoy nga akasya. Duha ka maniko ug tunga ang gitas-on niini, ug usa ka maniko ug tunga ang gilapdon niini, ug usa ka maniko ug tunga ang gihabogon niini.+  Unya gihaklapan niya kini ug lunsayng bulawan sa sulod ug sa gawas ug gihimo ang usa ka ribete nga bulawan sa palibot alang niini.+  Human niana iyang gihulma ang upat ka argolya nga bulawan alang niini, alang sa ibabaw sa upat ka tiil niini, nga may duha ka argolya sa usa ka kilid niini ug duha ka argolya sa pikas kilid niini.+  Dayon iyang gihimo ang mga yayongan sa kahoyng akasya ug gihaklapan kini ug bulawan.+  Unya ang mga yayongan iyang gisul-ot sa mga argolya sa mga kilid sa Arka alang sa pagdala sa Arka.+  Ug iyang gihimo ang tabon+ sa lunsayng bulawan. Duha ka maniko ug tunga ang gitas-on niini, ug usa ka maniko ug tunga ang gilapdon niini.+  Dugang niyang gihimo ang duha ka kerubin nga bulawan. Sinalsal ang iyang paggama kanila ibabaw sa duha ka tumoy sa tabon.+  Usa ka kerubin sa usa ka tumoy, ug ang laing kerubin sa pikas tumoy. Iyang gihimo ang mga kerubin sa ibabaw sa tabon diha sa duha ka tumoy niini.+  Ug kini sila maoy mga kerubin nga nagabukhad sa duha ka pako pataas, nga nagsalipod sa tabon pinaagi sa ilang mga pako,+ ug ang ilang mga nawong nag-atubang sa usag usa. Ang mga nawong sa mga kerubin nagdungaw sa tabon.+ 10  Ug iyang gihimo ang lamesa sa kahoyng akasya.+ Duha ka maniko ang gitas-on niini, ug usa ka maniko ang gilapdon niini, ug usa ka maniko ug tunga ang gihabogon niini.+ 11  Unya gihaklapan niya kini ug lunsay nga bulawan ug gihimo ang ribete nga bulawan sa palibot alang niini.+ 12  Dayon iyang gihimo alang niini ang usa ka sanipa nga usa ka dapal palibot ug gihimo ang usa ka ribete nga bulawan alang sa sanipa niini palibot.+ 13  Dugang pa, iyang gihulma ang upat ka argolya nga bulawan alang niini ug gibutang ang mga argolya diha sa upat ka eskina nga alang sa upat ka tiil.+ 14  Ang mga argolya diha duol sa sanipa, nga maoy maghawid sa mga yayongan alang sa pagdala sa lamesa.+ 15  Unya iyang gihimo ang mga yayongan sa kahoyng akasya ug gihaklapan kini ug bulawan alang sa pagdala sa lamesa.+ 16  Human niana iyang gihimo ang mga galamiton sa ibabaw sa lamesa, ang mga pinggan niini ug ang mga kopa niini ug ang mga panaksan niini ug ang mga pitsil niini nga pinaagi kanila ang mga halad-nga-ilimnon igabubo, sa lunsayng bulawan.+ 17  Unya iyang gihimo ang tangkawan+ sa lunsayng bulawan. Sinalsal ang paghimo niya sa tangkawan. Ang mga kiliran niini ug ang mga sanga niini, ang mga kopa niini, ang mga biyoos niini ug ang mga bulak niini nagagula niini.+ 18  Ug unom ka sanga ang nagtuybo sa mga kiliran niini, tulo ka sanga sa tangkawan nagtuybo sa usa ka kiliran niini ug tulo ka sanga sa tangkawan nagtuybo sa pikas kiliran niini.+ 19  Tulo ka kopa nga giporma sama sa mga bulak sa almendras ang diha sa usa ka hugpong sa mga sanga, nga nagsal-angsal-ang ang mga biyoos ug mga bulak; ug tulo ka kopa nga giporma sama sa mga bulak sa almendras ang diha sa pikas hugpong sa mga sanga, nga nagsal-angsal-ang ang mga biyoos ug mga bulak. Ingon niana ang unom ka sanga nga nagtuybo sa tangkawan.+ 20  Ug sa tangkawan dihay upat ka kopa nga giporma sama sa mga bulak sa almendras, nga ang mga biyoos niini ug mga bulak niini nagsal-angsal-ang.+ 21  Ug ang biyoos ilalom sa duha ka sanga nagagula niini, ug ang biyoos ilalom sa duha ka laing sanga nagagula niini, ug ang biyoos ilalom sa duha pa ka sanga nagagula niini, alang sa unom ka sanga nga nagtuybo sa tangkawan.+ 22  Ang ilang mga biyoos ug ang ilang mga sanga nagtuybo niini. Kining tanan maoy usa ka tibuok nga buhat nga sinalsal, sa lunsayng bulawan.+ 23  Unya iyang gihimo ang pito ka lampara niini ug ang mga kimpit niini ug ang mga insensaryo niini sa lunsayng bulawan.+ 24  Sa usa ka talanton sa lunsayng bulawan kini iyang gihimo ug ang tanang galamiton niini. 25  Karon iyang gihimo ang halaran sa insenso+ sa kahoy nga akasya.+ Usa ka maniko ang gitas-on niini ug usa ka maniko ang gilapdon niini, kini kuwadrado, ug duha ka maniko ang gihabogon niini. Ang mga sungay niini nagtuybo gikan niini.+ 26  Unya kini iyang gihaklapan ug lunsay nga bulawan, ang ibabaw niini ug ang mga kiliran niini palibot ug ang mga sungay niini, ug iyang gihimo ang usa ka ribete nga bulawan palibot alang niini.+ 27  Ug iyang gihimo alang niini ang duha ka argolya nga bulawan sa ubos sa ribete niini sa duha ka kiliran niini, sa duha ka mag-atbang nga mga kiliran niini, nga maoy maghawid sa mga yayongan nga idala niini.+ 28  Human niana iyang gihimo ang mga yayongan sa kahoyng akasya ug gihaklapan kini ug bulawan.+ 29  Dugang pa iyang gihimo ang balaang igdidihog nga lana+ ug ang lunsay, pinahumotang insenso,+ gama sa usa ka tighimog pahumot.

Mga Footnote