Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Bibliya Online

BAG-ONG KALIBOTANG HUBAD SA BALAANG KASULATAN

2 Corinto 7:1-16

7  Busa, sanglit nakabaton man kita niining maong mga saad,+ mga hinigugma, hinloan+ nato ang atong kaugalingon sa tanang kahugawan sa unod ug espiritu,+ nga magahingpit sa pagkabalaan diha sa kahadlok sa Diyos.+  Hatagi ninyo kami ug luna.+ Kami walay gibuhatag sayop, kami walay gihimoag kadaot, kami walay gipahimuslan.+  Wala ko kini isulti aron hukman kamo. Kay giingon ko na kaniadto nga kamo ania sa among kasingkasing aron mamatay ug aron mabuhi uban kanamo.+  Ako adunay dakong kagawasan sa pagsulti kaninyo. Ako adunay dakong pagpanghambog labot kaninyo.+ Napuno ako sa paghupay,+ naghingapin ang akong kalipay sa tanan namong kasakitan.+  Sa pagkatinuod, sa dihang miabot kami sa Macedonia,+ ang among lawas wala makabatog kahupayan,+ apan padayon kaming gisakit+ sa tanang paagi—dihay mga pakig-away sa gawas, mga kahadlok sa sulod.  Bisan pa niana ang Diyos, nga nagahupay+ kanilang gipaubos, naghupay kanamo pinaagi sa pagkaania ni Tito;  apan dili lamang pinaagi sa iyang pagkaania, kondili usab pinaagi sa paghupay nga nakapahupay kaniya tungod kaninyo, sa dihang gisuginlan+ niya kami sa inyong pagpangiliw, sa inyong pagbangotan, sa inyong kasibot alang kanako; mao nga ako nagmaya nga labi pa gayod.  Busa bisan kon napasubo ko kamo pinaagi sa akong sulat,+ wala ako magbasol niini. Bisan kon ako sa sinugdan nagbasol niini, (nakita ko nga kanang sulata nakapasubo kaninyo, bisan ug sa makadiyot lamang,)  karon ako nagmaya, dili tungod kay basta lang nasubo kamo, kondili tungod kay nasubo kamo nga misangpot sa paghinulsol;+ kay kamo nasubo sa diyosnong paagi,+ aron kamo dili makaagom ug kadaot sa bisan unsa tungod kanamo. 10  Kay ang kasubo sa diyosnong paagi mosangpot sa paghinulsol ngadto sa kaluwasan nga dili pagabasolan;+ apan ang kasubo sa kalibotan mopatunghag kamatayon.+ 11  Kay, tan-awa! kining butanga mismo, ang inyong pagkasubo sa diyosnong paagi,+ pagkadakong pagkamatinuoron ang napatungha niini diha kaninyo, oo, pagpahigawas sa inyong kaugalingon, oo, sa kasuko, oo, sa kahadlok, oo, sa pagpangiliw, oo, sa kasibot, oo, sa pagtul-id sa sayop!+ Sa tanang paagi inyong gipasundayag ang inyong kaugalingon nga putli niining butanga. 12  Tino nga, bisan tuod ako misulat kaninyo, kini akong gihimo, dili alang sa usa nga nakahimog kasaypanan,+ ni alang sa usa nga gibuhatan ug sayop, kondili aron nga ang inyong pagkamatinuoron alang kanamo mapadayag diha kaninyo sa panan-aw sa Diyos. 13  Mao nga kami nahupayan. Hinunoa, dugang pa sa among kahupayan kami nagmaya pa gayod nga mas madagayaon tungod sa kalipay ni Tito, tungod kay ang iyang espiritu+ napalig-on ninyong tanan. 14  Kay kon ako nanghambog labot kaninyo ngadto kaniya, ako wala maulawi; apan ingon nga tinuod ang tanang butang nga gisulti namo kaninyo, sa ingon usab ang among pagpanghambog+ atubangan ni Tito napamatud-ang tinuod. 15  Labot pa, ang iyang malumong mga pagmahal mas dagaya nganha kaninyo, samtang iyang gihandom ang pagkamasinugtanon+ ninyong tanan, kon giunsa ninyo pagdawat kaniya nga may kahadlok ug pagpangurog. 16  Ako nagmaya nga sa tanang paagi ako magmaisogon gayod tungod kaninyo.+

Mga Footnote