Laktaw ngadto sa video

Laktaw ngadto sa kaundan

Kon Unsay Himoon Dihang Mogamay ang Kita

Kon Unsay Himoon Dihang Mogamay ang Kita

 Napugos ba ka sa pagdaginot kay migamay imong kita tungod sa krisis sa ekonomiya? Ang kahimtang sa ekonomiya dali rang mausab tungod sa pandemic, kalamidad, kagubot sa politika, ug giyera. Tingali ma-stress ta kon kalit nga mogamay ang atong kita. Pero naay praktikal nga mga tambag ang Bibliya nga makatabang nimo.

1. Dawata nga nausab na ang imong kahimtang.

 Prinsipyo sa Bibliya: “Nakat-onan nako ang sekreto sa pagkakontento . . . abunda man o dili.”—Filipos 4:12.

 Bisan tuod mas gamay na kag kuwarta karon, makaadyas ra ka ana. Kon madawat dayon nimo ang realidad ug magsugod kag adyas, dako kaayo ning tabang kanimo ug sa imong pamilya.

 Sayra kon naa ba kay makuhang tabang gikan sa gobyerno o ubang organisasyon. Lihok dayon, kay kasagaran limitado ra ang panahon nga makaaplay niana nga programa.

2. Pagtinabangay mo ingong pamilya.

 Prinsipyo sa Bibliya: “Mapakyas ang mga plano kon dili mangonsulta, apan naay kalamposan kon daghan ang magtatambag.”—Proverbio 15:22.

 Hisgoti ninyo sa imong kapikas ug mga anak ang situwasyon. Pinaagi sa maayong komunikasyon, matabangan nimo ang mga membro sa imong pamilya nga makasabot ug mosuportar sa gikinahanglang mga kausaban. Ug kon ang tanan magtinabangay sa pagdaginot ug dili mag-usik-usik, ang inyong kuwarta magamit ninyo sa uban ninyong panginahanglan.

3. Pagbadyet.

 Prinsipyo sa Bibliya: ‘Lingkod ug kuwentaha ang gasto.’—Lucas 14:28.

 Dihang kinahanglan kang magdaginot, importante kaayo nga mahibaloan nimo kon unsay imong gigastohan sa imong kuwarta. Sa paghimog badyet, kinahanglan una nimong isulat kon pilay imong gidahom nga kita matag bulan base sa bag-o nimong kahimtang. Dayon isulat ang tanan ninyong binulan nga gasto, bisan tuod nahibalo ka nga kinahanglan kang mohimog kausaban. Iapil ug sulat sa inyong binulan nga gasto ang kantidad nga igahin para sa wala damhang mga galastohan o emerhensiya.

 Tip: Dihang maglista sa inyong mga gasto, ayaw kalimot sa pag-apil sa ginagmay nga gasto. Tingali makurat ka nga kon tib-on ni, dako na diay kag nagasto. Pananglitan, human ilista sa usa ka tawo ang iyang gasto, nakita niya nga kada tuig mogasto diay siya ug ginatos ka dolyar para sa bubble gum!

4. Pagdesisyon kon unsang mga galastohan ang pinakaimportante ug paghimog mga kausaban.

 Prinsipyo sa Bibliya: ‘Seguroa ninyo ang mas importanteng mga butang.’—Filipos 1:10.

 Ikompara ang inyong kita ug ang inyong galastohan, ug tan-awa kon unsay wala na kinahanglana o puwedeng menosan aron maigo ang inyong kuwarta. Niay pipila ka pananglitan:

  •   Transportasyon. Kon kapin sa usa ang inyong sakyanan, puwede ba ninyong ibaligya ang usa? Kon mahalon ang inyong sakyanan, puwede ba ninyo ning pulihan ug sakyanan nga dili dakog gasto? Puwede ba mong mogamit ug publikong transportasyon o magbisikleta na lang ug ibaligya ang inyong sakyanan?

  •   Kalingawan. Puwede ba ninyong undangon, bisag temporaryo lang, ang inyong subscription sa streaming, satellite, o cable TV? Naa ba moy laing kapilian nga wala kaayoy gasto? Pananglitan, basin naay library sa inyong lugar nga magpahulam ug mga salida, e-book, ug audiobook nga walay bayad.

  •   Importanteng mga Galastohan. Hisgoti ingong pamilya kon unsaon nga mamenosan ang gasto sa tubig, koryente, ug uban pa. Ang pagpalong ug suga ug ang dili pagkalas ug tubig dihang maligo morag gamay ra nga butang, pero kana dakog matabang aron makadaginot.

  •   Pagkaon. Imbes mangaon sa restawran, mas maayong kamoy magluto sa inyong pagkaon. Planoha ang inyong lutoon, pagpalit ug paglutog dinaghan kon posible, ug kon naay sobrang pagkaon, isubak ni o himoang laing potahe. Paghimog listahan sa dili pa ka mamalengke aron dili ka makapalit ug mga wala kinahanglana. Palit ug prutas ug gulay nga daghag suplay anang panahona kay sagad mas barato na. Likayi ang pagpalit ug junk food. Basin posible sa inyong kahimtang nga mananom ug gulay.

  •   Sinina. Palit lang ug sinina kon naa kay kinahanglang pulihan, dili aron mosundog sa uso. Pangitag sinina nga sale o ukay-ukay. Kon maayo ang panahon ug itugot sa inyong kahimtang, ihayhay ang inyong linabhan imbes mogamit ug dryer aron makadaginot mo.

  •   Mga Palitonon. Sa dili pa ka mamalit, pangutan-a ang imong kaugalingon: ‘Kaya ba ni sa akong badyet? Kinahanglan ba gyod nako ni?’ Puwede ba nga dili una ka mopalit ug bag-ong appliances, gadyet, o sakyanan? Sa laing bahin, puwede ba nimong ibaligya ang mga butang nga wala na nimo gamita o kinahanglana? Kon imo nang himoon, makatabang na nga mahimong simple ang imong kinabuhi ug madugangan ang imong kita.

 Tip: Dihang ang imong kita mokalit ug kagamay, basin puwede nimo ning himoong rason nga hunongon ang mga bisyo nga makadaot ug makahurot ug kuwarta, sama sa pagpanigarilyo, pagsugal, o pag-inom. Kon imo ning himoon, dili lang ni makatabang sa pinansiyal kondili makadugang pod ni sa kalipay sa inyong pamilya.

5. Hatagig panahon ang pagkat-on bahin sa Diyos.

 Prinsipyo sa Bibliya: “Malipayon kadtong mahunahunaon sa ilang espirituwal nga panginahanglan.”—Mateo 5:3.

 Ang Bibliya naghatag niining balanse nga tambag: “Ang kaalam panalipod sama nga ang salapi panalipod, apan ang bentaha sa kahibalo mao kini: Ang kaalam magtipig sa kinabuhi sa tag-iya niini.” (Ecclesiastes 7:12) Kana nga kaalam naa sa Bibliya, ug daghan ang makapamatuod nga ang pagpadapat sa mga giya niini nakatabang nila nga dili sobrang mabalaka sa pinansiyal.—Mateo 6:31, 32.