Ang akong mga apohan nakakat-on bahin sa mga saad ni Jehova niadtong 1906 human mamatay ang ilang anak nga lalaki tungod sa diphtheria. Ang ilang doktor usa ka Estudyante sa Bibliya, nga maoy tawag sa mga Saksi ni Jehova sa una. Iyang gisulti kanila ang makapahupayng paglaom nga naa sa Bibliya, apil niana ang pagkabanhaw. Tungod adto, ang akong mga apohan, si Mama, ug ang iyang igsoong babaye nahimo pong mga Estudyante sa Bibliya.

 Sa daghang tuig, dasig kaayo sila sa kamatuoran. Ang babaye nakong mga paryente mitabang pa gani nga makapahiluna ang mga nanambong dihang gipakita ang “Photo-Drama of Creation” sa Chicago, Illinois, sa United States. Pero makapaguol kay si Mama lang ang mipadayon sa pag-alagad kang Jehova. Lisod to para niya kay suod kaayo sila ingong pamilya ug nag-alagad sila nga magkauban hangtod sa mga katuigan sa 1930. Ang pagkamaunongon ni Mama ug ang iyang kaandam sa pagsunod kang Jehova dako kaayog epekto nako, apil na pod ang ehemplo ni Papa, nga usa pod ka matinumanong Estudyante sa Bibliya.

 Natawo ko niadtong 1927, ang kinamaguwangan sa unom ka anak. Kaming tanan nagpabilin sa kamatuoran. Panday si Papa, ug nagpuyo mi sa komportableng balay duol sa siyudad sa Chicago. Naa mi dakong uma, ug nagbuhi pod mig mga manok ug itik.

 Nalingaw kaayo ko sa akong mga buluhaton. Apil niana ang pagtahi sa buslot nga mga medyas sa akong pamilya. Wala na kaayo ni ginahimo karon, pero sa una, kon mabuslot ang medyas, dili dayon ni ilabay. Tahion ni, o tapakan, gamit ang dagom ug hilo. Ang pagkat-on ani nga skill nakatabang gyod nako kay nagamit nako ni sa ulahi.

Ang Maayong Ehemplo sa Akong mga Ginikanan

 Giseguro ni Papa nga dili mapasagdan sa among pamilya ang espirituwal nga mga butang. Motambong mi pirme sa mga tigom, regular nga mosangyaw, ug maghisgot ug teksto sa Bibliya kada adlaw. Kada Sabado sa gabii, maghisgot mi sa Bibliya ingong pamilya gamit ang Bantayanang Torre.

 Aron makapamatuod sa among mga silingan, nagbutang si Papa ug mosiga nga karatula sa may bentana sa among sala. Hinimo ni sa mga igsoon. Makita dinhi ang tema sa pakigpulong o ang usa sa atong mga publikasyon. Mokidlapkidlap ni maong makakuha nig atensiyon sa mga tawo nga moagi. Nagbutang pod si Papa ug duha ka karatula sa among sakyanan.

 Pinaagi sa pulong ug buhat, gitudloan mi ni Papa kon unsa ka importante ang pagsunod kang Jehova. Gisuportahan pod ni Mama ang ginahimo ni Papa. Dihang singko anyos pa ang among kinamanghorang igsoon nga babaye, si Mama nagsugod sa iyang bug-os panahong pag-alagad ingong payunir, ug nagpadayon siya sa iyang pagpayunir sa tibuok niyang kinabuhi. Mapasalamaton kaayo ko nga sila ang akong mga ginikanan.

 Lahi ang kinabuhi sa una. Wala mi TV, maong kami sa akong mga igsoon mangyaka lang sa salog ug maminaw sa lainlaing programa sa radyo. Pero mas ganahan gyong maminaw ang among pamilya sa espirituwal nga mga programa sa organisasyon ni Jehova diha sa radyo.

Kombensiyon, Ponograpo, ug Plakard

 Ganahan kaayo ming motambong sa mga kombensiyon sa mga Saksi ni Jehova. Sa kombensiyon niadtong 1935, among nakat-onan nga ang “dakong panon,” kadtong nakalahutay sa “dakong kasakitan,” nga gihisgotan sa Pinadayag 7:9, 14, naay paglaom nga mabuhi hangtod sa hangtod sa paraisong yuta. Sa wala pay 1935, si Mama ug Papa moambit sa mga emblema sa Memoryal. Pero pagkahuman adto nga kombensiyon, si Papa na lang ang moambit. Nasabtan ni Mama nga ang iyang paglaom mao ang kinabuhing walay kataposan dinhi sa yuta, ug dili ang pagmando uban sa Kristo didto sa langit.

 Niadtong 1941, dihay kombensiyon sa St. Louis, Missouri, ug gi-release ni Joseph Rutherford, nga maoy nanguna sa buluhaton niadtong panahona, ang librong Children. Kusog kaayo ang pakpak sa mga nanambong! Katorse pa ko adto ug usa ka tuig nang bawtismado. Nakahinumdom pa gyod ko adtong naglinya ko kauban sa ubang bata aron mokuhag kopya sa maong libro.

 Lahi pa ang paagi sa pagsangyaw sa una. Niadtong mga katuigan sa 1930, mogamit mi ug madaladala nga ponograpo aron i-play sa tagbalay ang girekord nga mga pakigpulong sa Bibliya. Sa dili pa mi manuktok, among seguroon nga naplastar ang plaka ug ang dagomdagom sa ponograpo. Dihang atubangon na mi sa tagbalay, naa mi gamayng isulti, dayon mag-play mig upat ug tunga ka minuto nga pakigpulong sa Bibliya. Human niana magtanyag mig publikasyon. Ang mga tawo sa among lugar andam gyong maminaw. Wala gyod koy mahinumdoman nga naay dili maayog sanong. Pagpayunir nako niadtong 16 ko, gihatagan ko ni Papa ug ponograpo, nga maoy akong gigamit sa pagministeryo. Kauban nako sa pagpayunir ang kugihang sister nga si Lorraine.

 Naa poy laing pamaagi sa pagsangyaw kaniadto diin magmartsa mi ug magsul-ob ug mga plakard. Kay magsul-ob mi ug plakard sa atubangan ug likod, mora mig sandwich tan-awon, maong amo ning gitawag ug sandwich-sign parade. Naay mga nakasulat sa plakard sama sa “Ang Relihiyon Maoy Lit-ag ug Panglimbong” ug “Alagara ang Diyos ug si Kristo nga Hari.”

 Ang mga tigom dakong tabang namo nga maandam sa mga pagsupak, ug nagtudlo ni namo kon unsay isulti aron madepensahan ang kamatuoran. Ug miabot gyod ang pagsupak. Pananglitan, sa unang higayon nga nanagtag mig magasin sa daghag tawo nga negosyohanan, gidakop mi sa mga polis, gisakay sa van, ug gidala sa presinto. Pero maayo na lang kay gibuhian ra pod mi human sa pipila ka oras. Nalipay mi nga gilutos tungod sa among pagkamasinugtanon kang Jehova.

Kaminyoon, Gilead, ug Gipatawag nga Magsundalo

 Paglabay sa panahon, gipailaila ko ni Lorraine kang Eugene Rosam, brader nga iyang nailaila sa usa ka asembliya sa Minneapolis, Minnesota. Nagdako si Eugene sa Key West, Florida. Niadtong grade 10 pa siya, gi-expel siya sa eskuwelahan kay wala siya moapil sa usa ka nasyonalistikong seremonya. Human adto, nagpayunir dayon siya. Usa ka adlaw, nagkakita sila sa iyang classmate sa una nga babaye. Kay maayo kaayo nga estudyante si Eugene, natingala ang iyang classmate kon nganong na-expel siya. Gigamit ni Eugene ang Bibliya sa pagtubag sa mga pangutana sa iyang classmate. Sa ngadtongadto, nagpa-Bible study siya, nabawtismohan, ug nahimong matinumanong sister.

 Naminyo mi ni Eugene niadtong 1948. Nagpadayon mi sa pag-alagad ingong payunir sa Key West. Sa ngadtongadto, giimbitar mi nga moeskuwela sa ika-18 nga klase sa Gilead ug mi-graduate mi niadtong 1952. Gitudloan mig Spanish sa among klase, maong nagdahom mi nga maasayn ingong mga misyonaryo sa nasod nga Spanish ug pinulongan. Pero wala na mahitabo. Samtang nag-eskuwela mi, nagakahitabo pod ang gubat sa Korea ug gipatawag si Eugene sa gobyerno aron magsundalo. Nakurat gyod mi kay niadtong Gubat sa Kalibotan II, wala man siya ipatawag nga magsundalo tungod sa iyang pagkaministro. Pero karon, giingnan mi nga magpabilin sa United States. Di ko katuo adto maong nakahilak gyod ko. Pero duha ka tuig sa ulahi, gitugotan ra gyod si Eugene nga dili magsundalo. Nakakat-on gyod mig importanteng leksiyon adto nga eksperyensiya—kon naay kahigayonan nga mawala, naay laing ihatag si Jehova, ug iya gyod nang gihimo. Kinahanglan lang gyod ming magpailob.

Nagapanawng Buluhaton, Dayon Pag-alagad sa Canada

 Human sa among pagpayunir sa Spanish nga kongregasyon sa Tucson, Arizona, naasayn mi sa sirkitong buluhaton pagka-1953. Sulod sa pipila ka tuig, nag-alagad mi sa mga sirkito sa Ohio, California, ug New York City. Pagka-1958, nagsugod mi sa distritong buluhaton a sa California ug Oregon. Nagsaka mi sa balay sa mga igsoon. Dayon pagka-1960, mibalhin mi sa Canada, diin nag-alagad si Eugene ingong instruktor sa Kingdom Ministry School para sa mga tigdumala sa kongregasyon. Didto na mi nagpuyo hangtod 1988.

 Daghan mig nindot nga mga eksperyensiya adtong naa pa mi sa Canada. Usa ani dihang ako ug ang usa ka sister naay nasangyawan nga pamilya dihang namalaybalay mi. Una namong naestorya ang inahan, si Gail. Iya ming giingnan nga ang iyang mga anak guol kaayo kay namatay ang ilang lolo. Nangutana ang iyang mga anak, “Ma, nganong namatay man si Lolo? Asa man siya paingon?” Pero walay ikatubag si Gail sa iyang mga anak. Maong among gipakita niya ang makapahupayng mga teksto sa Bibliya.

 Usa ra mi ka semana didto kay adtong panahona, si Eugene nag-alagad ingong tigdumala sa sirkito. Mao nga ang kauban nakong sister ang mibalikduaw kang Gail. Ingong resulta, gidawat ni Gail ug sa iyang bana nga si Bill ang kamatuoran. Apil pod ang iyang tulo ka anak nga lalaki—silang Christopher, Steve, ug Patrick. Si Chris usa ka ansiyano sa Canada. Si Steve instruktor sa usa ka Bible school facility sa Palm Coast, Florida. Ug si Patrick membro sa Komite sa Sangang Buhatan sa Thailand. Suod gihapon mi ni Eugene sa ilang pamilya hangtod karon. Lipay kaayo ko nga apil ko sa nakatabang nila nga makaila kang Jehova!

Pagbisita sa mga Ospital ug ang Pagkaporma sa Hospital Liaison Committee

 Samtang didto mi sa Canada, naay gihatag si Jehova nga bag-ong kahigayonan sa pag-alagad para kang Eugene. Estoryahan ta mo bahin ani.

 Sa una, ang mga tawo wala makasabot kon nganong ang mga Saksi dili magpaabonog dugo, maong daghan ang mituo sa sayop nga mga report bahin nato. Daghang balita ang na-publish sa tibuok Canada nga ang anak sa mga Saksi nangamatay daw kay wala sila paabonohig dugo sa ilang mga ginikanan. Ang akong bana nakapribilehiyo nga makapamatuod nga sayop ang maong mga report.

 Sa hapit na ang 1969 nga internasyonal nga asembliya sa Buffalo, New York, si Eugene ug ang ubang mga brader miduaw sa dagkong mga ospital adtong lugara. Ilang gipahibalo nga mga 50,000 ka Saksi gikan sa Canada ug United States ang motambong sa kombensiyon. Kon ugaling naay medikal nga emerhensiya, dakog tabang kon ang mga doktor nahibalo na daan sa atong baroganan bahin sa dugo ug kon nganong maayo ni. Gihatagan sa mga brader ang mga doktor ug mga artikulo bahin sa paagi sa pagpanambal nga dili maggamit ug dugo, nga gikuha nila gikan sa kasaligang mga reperensiya. Tungod sa maayong resulta niini, si Eugene ug ang ubang mga brader nagkugi sa pagbisita sa mga ospital sa Canada. Gitabangan pod nila ang mga ansiyano nga mahibalo kon unsay maayong himoon kon naay medikal nga mga emerhensiya.

 Anam-anam nga namunga ang ilang paningkamot. Ug wala mi magdahom nga tungod adto, naa diay nindot nga kahikayan nga maporma. Unsa man?

 Niadtong mga 1985, si Eugene gitawgan ni Milton Henschel, nga nag-alagad sa hedkuwarter sa Brooklyn, New York. Gusto sa Nagamandong Lawas nga palaparon pa ang programa nga naa na sa United States aron mas daghan pang doktor ang mahatagan ug impormasyon. Maong mibalhin mi ni Eugene sa Brooklyn, ug pagka-Enero 1988, giporma sa Nagamandong Lawas ang usa ka departamento sa hedkuwarter nga gitawag ug Hospital Information Services. Sa ulahi, ang akong bana ug ang duha pa ka brader giasayn sa pagdumalag mga seminar, una sa United States ug dayon sa ubang nasod. Sa ngadtongadto, naporma ang Hospital Information Department diha sa mga sangang buhatan, ug ang Hospital Liaison Committee naporma sa lainlaing siyudad. Di gyod maihap kon unsa ka daghang Saksi ug ilang mga anak ang nakabenepisyo niining mahigugmaong kahikayan gikan kang Jehova. Samtang si Eugene nagdumalag mga seminar ug nagduaw ug mga ospital, naa ra ko sa Bethel, nga sagad nagtabang sa pagpanahi o sa kosina.

Ang Akong Pinakalisod nga Pagsulay

 Niadtong 2006, nahitabo ang pinakalisod nga pagsulay sa akong kinabuhi—namatay si Eugene. Gimingaw kaayo ko sa akong minahal nga bana. Pero nalahutay to nako. Nakatabang nako ang pagpabiling suod kang Jehova pinaagi sa pag-ampo ug regular nga pagbasa sa Bibliya. Maminaw pod ko sa inadlawng teksto nga hisgotan sa pamilyang Bethel. Basahon nako ang tibuok kapitulo nga gibasehan sa inadlawng teksto. Ug nagpokus ko sa akong asaynment sa Sewing Department, nga giisip nako nga dakong pribilehiyo. Nakatabang pa gani ko sa paghimog kortina sa mga Assembly Hall sa New Jersey ug New York. Nag-alagad ko karon sa Fishkill Bethel, ug pagpanahi gihapon ang akong asaynment. b

 Para nako, pinakaimportante sa kinabuhi ang paghigugma kang Jehova ug pagsunod kaniya ug sa iyang organisasyon. (Hebreohanon 13:17; 1 Juan 5:3) Nalipay ko nga mao ni ang among prayoridad ni Eugene sa kinabuhi. Maong makasalig gyod ko nga gantihan mi ni Jehova ug kinabuhing walay kataposan sa paraisong yuta. Eksayted pod ko nga anang panahona, magkauban na mi pag-usab ni Eugene.—Juan 5:28, 29.