Laktaw ngadto sa video

Laktaw ngadto sa kaundan

KON GIUNSA PAGGAMIT ANG INYONG DONASYON

Mga Balita nga Kasaligan ug Makapalig-on sa Pagtuo

Mga Balita nga Kasaligan ug Makapalig-on sa Pagtuo

DISYEMBRE 1, 2021

 Gimahal pag-ayo sa mga Saksi ni Jehova ang ilang mga igsoon sa pagtuo. (1 Pedro 2:17) Daghan nato ang mibatig parehas sa gibati ni Tannis, sister nga taga-Kenya. Siya miingon, “Ganahan kong mahibalo kon unsay nagakahitabo sa atong minahal nga mga igsoon sa tibuok kalibotan.” Giunsa pagkahibalo ni Tannis ug sa minilyong Saksi ang kahimtang sa mga igsoon? Sukad niadtong 2013, nahimo nato nâ pinaagi sa seksiyon nga Balita diha sa atong website, ang jw.org.

 Ang seksiyon nga Balita naay kasaligang report bahin sa mga Saksi ni Jehova. Apil sa ginareport ang pag-release ug Bibliya, disaster relief work, mga construction project, ug ubang importanteng hitabo. Mahibaloan pod nato dinhi ang mga report bahin sa atong mga igsoon nga napriso tungod sa ilang pagtuo. Kini nga seksiyon naa poy makapadasig nga mga eksperyensiya bahin sa mga preaching campaign ug sa Memoryal. Kinsay naga-research para ani nga mga balita, ug giunsa ni pag-andam?

Pagpili ug Pag-andam sa mga News Article

 Ang seksiyon nga Balita gidumala sa Office of Public Information (OPI). Kini nga departamento naa sa world headquarters, ug gidumala ni sa Coordinators’ Committee sa Nagamandong Lawas. Ang OPI naay kapin sa 100 ka brader ug sister nga mga writer, researcher, visual artist, ug translator, ug daghan nila mga remote volunteer. Ang uban maoy makig-communicate sa mga opisyales sa gobyerno, mga professor ug teacher, ug sa news media. Ang OPI gisuportahan sa kapig 80 ka Public Information Desk (PID) sa mga sangang buhatan sa tibuok kalibotan.

 Sa pag-andam ug news article, ang OPI makig-coordinate sa mga PID. Dihang ang mga brader makapilig hitabo nga puwedeng himoan ug news article, mag-research sila bahin ani ug mangitag kasaligang impormasyon. Apil sa ilang himoon ang pag-interview ug pagpakig-estorya sa mga eksperto. Kon makakuha na silag kasaligang impormasyon, ang news article ila nang isulat, i-edit, i-proofread, ug butangag picture, ug dayon paaprobahan sa Coordinators’ Committee.

Mga Apresasyon

 Unsay gibati sa mga igsoon bahin sa seksiyon nga Balita? Ang sister sa Pilipinas nga si Cheryl miingon, “Kada buntag, ganahan kaayo kong mobasag balita bahin sa organisasyon ug sa katawhan ni Jehova.”

 Daghan ang nag-ingon nga ang balita diha sa jw.org lahi kaayo kay sa mga balita sa ubang news media. Si Tatiana nga taga-Kazakhstan miingon: “Ganahan ko kay tinuod ug kasaligan ang mga balita sa jw.org.” Ang sister sa Mexico nga si Alma miingon: “Ang mga balita sa ubang news media makapaguol, pero ang mga balita sa atong website makapadasig kaayo.”

 Ang seksiyon nga Balita dili lang kasaligan; makapalig-on pod ni sa pagtuo. Si Bernard nga taga-Kenya miingon: “Tungod ani nga mga balita, gibati nako nga akong pamilya ang mga igsoon sa tibuok kalibotan, bisag asa pa sila nagpuyo. Espesipiko nakong maampo ang ilang mga ngalan ug situwasyon.” Ang sister nga si Bybron nga taga-Kenya pod miingon: “Eksayted kaayo ko kon makakita kog balita nga naay gi-release nga Bibliya sa laing lengguwahe! Kini nga mga balita nagpahinumdom nako nga si Jehova walay gipalabi.”

Ang seksiyon nga Balita makatabang nga espesipiko natong maampo ang mga kalisdanan sa atong mga igsoon sa tibuok kalibotan

 Bisan ang mga balita bahin sa mga igsoon nga gilutos makadasig nato. “Naghunahuna ko sa ilang kaisog, ug nakapalig-on to sa akong pagtuo,” miingon si Jackline nga taga-Kenya. “Pirme nakong tan-awon kon unsay nakatabang nila nga makalahutay. Akong nakita nga ang ‘simpleng’ mga butang—parehas sa pag-ampo, pagbasa sa Bibliya, ug bisan ang pagkanta—nakatabang gyod sa atong mga igsoon nga magpabiling lig-on.”

 Ang sister nga taga-Costa Rica nga si Beatriz makaapresyar sa mga balita bahin sa kalamidad. Siya miingon: “Kini nga mga balita nakatabang nako nga makita kon giunsa paghatag sa organisasyon ang panginahanglan sa mga igsoon sa paspas, epektibo, ug mahigugmaong paagi. Tungod ani, makaingon ko nga organisasyon gyod ni ni Jehova.”

 Mapasalamaton gyod ta nga makadawat tag pinakabag-ong balita bahin sa atong mga igsoon sa tibuok kalibotan! Naposible ni tungod sa inyong mga donasyon sa tibuok kalibotang buluhaton, nga daghan niini gihatag pinaagi sa donate.jw.org. Salamat kaayo sa inyong pagkamahinatagon.