Laktaw ngadto sa video

Laktaw ngadto sa kaundan

KON GIUNSA PAGGAMIT ANG INYONG DONASYON

JW Satellite Channel nga Makaabot sa mga Lugar nga Walay Internet

JW Satellite Channel nga Makaabot sa mga Lugar nga Walay Internet

ABRIL 1, 2021

 Kada bulan, naghinamhinam ta sa espirituwal nga mga programa ug video nga i-release sa JW Broadcasting. Pero daghang igsoon sa Africa ang dili maka-access niini nga mga programa sa Internet. Ngano?

 Daghang lugar sa Africa ang limitadog access sa Internet. Ug kon duna may Internet, kini sagad hinay o mahal kaayo. Pananglitan, usa ka tigdumala sa sirkito sa Madagascar nag-download ug usa ka binulang programa sa JW Broadcasting sa internetan. Nakabayad siyag mga ₱800 ($16), nga mas dako kay sa usa ka semanang kita sa mga taga-didto! a

 Bisan pa niini, minilyon sa Africa ang makatan-aw na sa JW Broadcasting bisag walay Internet. Sa unsang paagi?

 Sukad niadtong 2017, ang JW Broadcasting matan-aw na niadtong nagpuyo sa sub-Saharan Africa pinaagi sa usa ka satellite-television channel. Kini libreng gi-broadcast, 24 oras kada adlaw, 7 ka adlaw sa usa ka semana, sa 16 ka pinulongan.

Mga brader sa Mozambique nag-adjust sa JW satellite-channel receiver sa ilang Kingdom Hall, 2018

 Aron maposible ni, ang mga Saksi ni Jehova nakigkontrata sa usa ka television broadcast service aron mapasalida ang mga programa pinaagig satellite. Ang gigamit nga satellite makaabot sa mga 35 ka nasod sa sub-Saharan Africa. Kapin sa mga ₱600,000 ($12,000) ang ginabayran kada bulan para sa maong kontrata. Kon duna tay ipa-broadcast nga live nga mga programa, mobayad tag dugang para sa usa pa ka channel. Tungod niini, linibo ang makatan-aw ug mga kombensiyon o espesyal nga mga programa panahon sa duaw sa sangang buhatan.

Usa ka Local Design/Construction group sa Malawi nagtan-aw sa JW satellite channel, 2018

 Daghan ang makatan-aw sa JW satellite channel sa TV sa ilang balay, apil ang mga dili Saksi. Pero daghan sa atong mga igsoon ang dili makapalit ug gikinahanglang equipment aron matan-aw kini nga channel. Busa kapig 3,670 ka Kingdom Hall ang gitaoran ug satellite-receiving equipment aron didto manan-aw ang mga igsoon ug JW Broadcasting. Kon ang Kingdom Hall duna nay TV o projector, mga ₱3,500 ($70) na lang ang magasto para sa equipment, apil na ang pagpadala niini. Pero kon wala pa, mokabat kini ug hangtod sa mga ₱26,500 ($530).

 Mapasalamaton kaayo ang atong mga igsoon niini nga channel. Usa ka ansiyano sa Cameroon miingon: “Para sa among pamilya, sama kinig mana diha sa desyerto.” Si Odebode, usa ka brader sa Nigeria, miingon: “Katulo sa usa ka semana ming manan-aw sa akong pamilya sa maong channel. Kanunayng eksayted ang akong mga anak nga motan-aw niini. Gani naay mga panahon dihang lahi nga channel ang among gitan-aw, gusto nila ning ibalhin sa JW channel.” Si Rose, nga taga-Nigeria pod, miingon: “Ganahan ko sa JW satellite channel kay dili na pulos balita ang akong ginatan-aw. Dihang motan-aw kog balita, dali ra kong maglagot sa akong makita ug ma-high blood ko. Pero madasig ko ug marelaks sa JW Broadcasting! Mao ni ang paborito nakong channel. Panalangin gyod ni gikan kang Jehova.”

Pamilya nga nagtan-aw ug video para sa mga bata diha sa atong satellite channel

 Usa ka tigdumala sa sirkito sa Mozambique ang miingon nga sa iyang sirkito, gitaoran nag equipment ang mga Kingdom Hall aron matan-aw ang satellite channel. Ang mga igsoon niini nga mga kongregasyon moabot ug usa ka oras sa dili pa magsugod ang tigom o mas sayo pa aron tan-awon ang JW Broadcasting pinaagig satellite.

Kongregasyon sa Ethiopia nga nakapahimulos sa binulang programa sa JW Broadcasting bisag walay Internet, 2018

 Panahon sa 2019 internasyonal nga kombensiyon sa Johannesburg, South Africa, gigamit ang channel aron matan-aw sa siyam pa ka lokasyon ang pangunang mga pakigpulong, lakip ang mga pakigpulong sa membro sa Nagamandong Lawas. Si Sphumelele, nga nagtrabaho sa local Broadcasting Department sa sangang buhatan sa South Africa, miingon: “Sa una, ginapadala namo pinaagig Internet ang mga pakigpulong. Kinahanglan nig paspas nga Internet ug dunay bayaran nga data. Pero ang JW satellite channel mas barato ug mas maayo ang koneksiyon.”

 Tungod sa inyong mga donasyon para sa tibuok kalibotang buluhaton, daghan sa atong mga igsoon sa Africa ang makatan-aw sa JW Broadcasting pinaagig satellite. Salamat kaayo sa inyong mga donasyon nga gihatag pinaagi sa donate.jw.org.

a Ang dollars nga gihisgotan niini nga artikulo maoy U.S. dollars.