Laktaw ngadto sa video

Laktaw ngadto sa kaundan

KON GIUNSA PAGGAMIT ANG INYONG DONASYON

Disaster Relief sa 2022—Gipakita ang Inigsoong Gugma

Disaster Relief sa 2022—Gipakita ang Inigsoong Gugma

ENERO 1, 2023

 Gitagna sa Bibliya nga sa atong panahon mahitabo ang daghang gubat, linog, kamatay, ug ubang “makalilisang nga mga talan-awon.” (Lucas 21:10, 11) Ang maong tagna padayong nagakatuman sa 2022 nga tuig sa pag-alagad. a Pananglitan, ang giyera sa Ukraine nagpadayon gihapon, ug minilyon ang naapektohan niini. Ang dakong bahin sa kalibotan naningkamot pa sa pag-atubang sa mga epekto sa COVID-19 nga pandemic. Dugang pa, daghang tawo ang naapektohan sa mga kalamidad, sama sa mga linog sa Haiti ug sa kusog nga mga bagyo sa Central America, Pilipinas, ug habagatan-sidlakang Africa. Giunsa pagtabang sa mga Saksi ni Jehova kadtong naapektohan?

 Sa 2022 nga tuig sa pag-alagad, ang atong organisasyon naghatag ug hinabang sa mga biktima sa mga 200 ka kalamidad! Tanantanan, migasto tag halos 12 ka milyong dolyares sa paghatag ug hinabang. b Konsideraha kon giunsa paggamit ang mga donasyon sa pagtabang sa mga biktima sa duha ka kalamidad.

Mga Linog sa Haiti

 Niadtong Agosto 14, 2021, ang habagatang Haiti gitay-og sa magnitude 7.2 nga linog. Makapaguol nga tulo ka Saksi ang namatay—duha ka sister ug usa ka brader. Kadtong naluwas nag-antos sa pisikal ug emosyonal nga kasakit nga resulta sa linog. Ang brader nga si Stephane miingon: “Sa tibuok siyudad daghan kaayo ang namatay, nga sulod sa kapig duha ka bulan daghan ang gilubong kada semana.” Ang usa pa ka brader nga si Éliézer miingon: “Daghang Saksi ang walay balay, sinina, sapatos, ug uban pang pangunang panginahanglan. Sa pipila ka bulan, daghan ang nahadlok tungod sa mga aftershock.”

 Ang atong organisasyon mitabang dayon. Ang sangang buhatan sa Haiti nagsuplay ug kapig 53 ka toneladang pagkaon, ingon man mga tent, trapal, kutson, ug solar charger para sa cell phone. Dugang pa, sa 2022 nga tuig sa pag-alagad, kapig 100 ka balay ang gitukod pag-usab o giayo. Kapig usa ka milyong dolyares ang gigasto para sa mga relief effort.

Naghatod ug pagkaon, Haiti

 Ang atong mga igsoon mapasalamaton kaayo. Si Lorette miingon: “Tungod sa linog, nawad-an mig balay ug negosyo. Wala mi makaon. Pero gitabangan mi sa organisasyon ni Jehova ug gitagan-an mi sa tanan namong panginahanglan.” Si Micheline miingon: “Ang gipuy-an namo sa akong duha ka anak naguba tungod sa linog. Wala ko kabalo kon unsay buhaton gawas sa pag-ampo, ug gitubag to ni Jehova pinaagi sa iyang organisasyon. Karon naa na mi lig-ong balay nga kapuy-an. Determinado ko nga himoon ang akong maarangan aron ipakita nga mapasalamaton ko kang Jehova.”

 Ang atong mga relief effort namatikdan sa lokal nga mga awtoridad. Ang direktor sa city hall sa L’Asile miingon: “Gidayeg mo nako sa inyong paspas nga pagresponde aron motabang. Nagpakita mog dakong pagtahod sa mga awtoridad. Nalipay ko kay mitabang mo dili tungod sa kuwarta kondili tungod sa gugma.”

Ang Bagyong Ana Mihapak sa Malawi ug Mozambique

 Niadtong Enero 24, 2022, ang Bagyong Ana mihapak sa Mozambique ug dayon mipaingon sa kasadpan, sa Malawi. Tungod sa bagyo, kusog kaayo ang ulan ug hangin, nga miabot ug 100 kilometros kada oras. Naguba ang mga linya sa koryente ug mga tulay, ug grabe kaayo ang pagbaha.

 Naapektohan sa bagyo ang kapig 30,000 ka Saksi sa Malawi ug Mozambique. Si Charles, brader nga mitabang sa relief work, miingon: “Naguol kaayo ko ug mibating walay mahimo dihang nakita nako ang pag-antos sa mga igsoon ug kon unsa ka dako ang nawala kanila.” Misamot pa gyod ug ka grabe ang kahimtang kay ang ilang pananom ug suplay sa pagkaon gibanlas sa baha. Daghan ang nawad-ag balay. Ikasubo nga usa ka brader ang namatyag asawa ug duha ka anak nga babaye kay nayaob ang ilang rescue boat.

Naguba nga balay sa Saksi nga magtiayon, Mozambique

Ang gitukod pag-usab nga balay

 Hadlok kaayo ang bagyo. Sa ala una sa kadlawon sa Nchalo, Malawi, nadunggan sa pamilyang Sengeredo ang kusog nga bul-og sa tubig. Mibaha ang duha ka suba! Si Brader Sengeredo midesisyon nga mobakwet sila. Maayo gyod to nga desisyon kay wa madugay pagbiya nila, gibanlas sa baha ang ilang balay. Ang ilang mga butang naguba o gianod. Ang pamilya mibakwet sa Kingdom Hall, nga sagad 30 minutos rang baktason gikan sa ilang balay, pero adtong higayona, miabot ug duha ka oras. Nakaabot sila nga puwerteng basaa ug gikapoy, pero luwas.

 Ang sangang buhatan sa Malawi ug Mozambique mihimo dayon ug mga relief effort. Ilang gihatagag direksiyon ang mga tigdumala sa sirkito ug mga ansiyano sa pagsusi sa panginahanglan sa apektadong mga igsoon ug sa pagtaganag espirituwal ug emosyonal nga suporta. Daghang Disaster Relief Committee (DRC) ang giasayn sa pagdumala sa relief work, ug kini nga mga komite milihok dayon aron ang mga igsoon makabaton ug pagkaon ug uban pang panginahanglan. Kapig $33,000 ang gigasto sa pagtabang sa mga tawo nga naapektohan ug kapig $300,000 sa pag-ayo ug pagtukod pag-usab ug mga balay.

 Maalamong gigamit sa mga DRC ang kuwarta ilabina kay mimahal pag-ayo ang mga palaliton. Pananglitan, sa unang pito ka bulan sa relief work, ang presyo sa harina nga mais—nga pangunang pagkaon sa Malawi—misaka ug mga 70 porsiyento. Misaka pod ang presyo sa gasolina. Aron makadaginot, ang mga igsoon namalit ug pagkaon ug mga materyales sa pagtukod nga binulto diha sa lokal nga mga palitanan. Maong naka-discount sila ug nakabarato sa delivery.

 Ang relief work nakatandog sa kasingkasing sa katawhan ni Jehova. Si Felisberto, brader sa Mozambique, miingon: “Wala pa ko kakitag organisasyon nga naghatag ug ingon ani ka dako: mga materyales sa pagtukod, transportasyon, mga construction worker, pagkaon, ug mahigugmaong giya. Nagpakita gyod ni sa inigsoong gugma nga gihisgotan ni Jesus sa Juan 13:34, 35.” Si Ester, usa ka biyuda sa Malawi kansang balay naguba, miingon: “Naguol ko pag-ayo kay wala koy kuwarta aron makatukod ug bag-ong balay. Mao nga dihang gitukoran ko sa mga igsoon ug balay, gibati nako nga naa na ko sa Paraiso.”

 Samtang nagkaduol ang gisaad nga bag-ong kalibotan, makadahom ta ug mas daghan pang kalamidad. (Mateo 24:7, 8) Pero tungod sa inyong mahigugmaong mga donasyon, masaligon mi nga ang katawhan ni Jehova makadawat sa gikinahanglang tabang. Ang mga paagi sa paghatag ug donasyon gihisgotan sa donate.jw.org. Salamat sa inyong pagkamahinatagon.

a Ang 2022 nga tuig sa pag-alagad nagsugod niadtong Septiyembre 1, 2021, ug natapos niadtong Agosto 31, 2022.

b Ang tanang kantidad nga dolyares niini nga artikulo maoy U.S. dollars.