Dihang motan-aw ka sa palibot, ang imong mata ug utok magtinabangay sa pagkuhag impormasyon. Nakakita kag prutas sa duol ug maghunahuna ka kon kaonon ba nimo kini. Mohangad ka sa langit ug mahibaloan nimo nga dili moulan karon. Nakita nimo ang mga pulong nga imong gibasa karon ug imong gisabot ang kahulogan niini. Sa pagkatinuod, naapektohan ka sa kolor. Tinuod ba kana?

Ang kolor sa prutas nga imong nakita motabang nimo sa pag-ila kon kini hinog ba ug laming kaonon. Ang kolor sa langit ug panganod motabang nimo sa pagkahibalo sa klima. Ang mga pulong niining artikuloha mabasa nimo kay magkalahi ang kolor sa letra ug background. Oo, nga tingali wala nimo mamatikdi, kanunay nimong gigamit ang kolor sa pagproseso sa impormasyon bahin sa imong palibot. Apan ang kolor may epekto usab sa imong emosyon.

Samtang namalit ka sa tindahan, nakita nimo ang lainlaing baligya, nga ang mga putos gidisenyo aron madani ang imong pagtagad. Namatikdan man nimo o wala, ang mga advertiser maampingong namilig mga kolor ug kombinasyon sa mga kolor aron madani ang imong gusto, lalaki ka man o babaye, ug bisan unsay imong edad. Ang mga tig-adorno sa balay, tigdisenyog panapton, ug mga pintor nahibalo usab nga ang mga kolor may epekto sa emosyon.

Mahimong lainlain ang interpretasyon sa mga tawo sa mga kolor tungod sa ilang kultura ug kostumbre. Pananglitan, ang pipila ka taga-Asia naglangkit sa pula sa suwerte ug paglipaylipay, apan sa pipila ka dapit sa Africa, ang pula maoy kolor sa pagbangotan. Apan, may mga kolor nga pareho rag epekto sa emosyon sa mga tawo, bisag unsa pay ilang kagikan. Atong hisgotan ang tulo ka kolor ug kon unsay epekto niini kanimo.

Ang PULA dali kaayong makita. Kini sagad ilangkit sa enerhiya, gubat, ug kapeligrohan. Ang pula dakog epekto sa emosyon ug makapakusog sa metabolismo, makapapaspas sa pagginhawa, ug makapataas sa presyon sa dugo.

Sa Bibliya, ang Hebreohanong pulong alang sa “pula” naggikan sa pulong nga nagkahulogag “dugo.” Ang Bibliya naggamit sa sanag-pula sa paghulagway sa mamumuno nga babayeng bigaon nga nagbestig purpura ug sanag-pula nga nagsakay sa “usa ka sanag-pulang bulok nga mapintas nga mananap . . . nga puno sa mapasipalahong mga ngalan.”—Pinadayag 17:1-6.

Ang BERDE nga lahig epekto sa pula, makapahinay sa metabolismo ug makapakalma. Kini makaparelaks ug sagad ilangkit sa pagkakalma. Marelaks ta kon makakita tag lunhawng mga hardin ug mga bakilid. Ang asoy sa Genesis bahin sa paglalang nag-ingon nga ang Diyos nagpatubog lunhawng mga balili ug tanom alang sa tawo.—Genesis 1:11, 12, 30.

Ang PUTI sagad ilangkit sa kahayag, kahilwas (safety), ug kahinlo. Nalangkit usab kini sa mga hiyas nga pagkamaayo, pagkawalay-sala, ug kaputli. Ang puti maoy kolor nga mas sagad hisgotan sa Bibliya. Diha sa mga panan-awon, ang mga tawo ug mga anghel nakita nga nagbestig puti, nga nagpasiugda sa pagkamatarong ug espirituwal nga kahinlo. (Juan 20:12; Pinadayag 3:4; 7:9, 13, 14) Ang puting mga kabayo ug mga magkakabayo  nga nagsul-ob ug puti, hinlo nga lino nagsimbolo sa matarong nga pakiggubat. (Pinadayag 19:14) Ang Diyos naggamit sa puti sa pagpasiugda nga siya andam mopasaylo sa mga sala: “Bisan tuod ang inyong mga sala sanag-pula, kini papution sama sa niyebe.”—Isaias 1:18.

Ang paggamit sa Bibliya sa kolor nagpakita nga nasabtan sa Diyos ang epekto niini sa tawo. Pananglitan, ang basahon sa Bibliya nga Pinadayag nagtagna bahin sa atong nasinatian karon, lakip na ang gubat, gutom, ug dili-kinaiyanhong kamatayon gumikan sa kanihit sa pagkaon ug mga hampak. Aron matabangan ta sa paghinumdom niini, ang usa ka talagsaong panan-awon nagpaila kanato sa mga magkakabayo, diin ang mga kabayo dili ordinaryo kondili may mga kolor.

Una, anaa ang lunlon-puti nga kabayo, nga nagsimbolo sa matarong nga pagpakiggubat ni Kristo Jesus. Sunod, atong makita ang kabayo nga sama ka pula sa kalayo, nga naghawas sa paggubatay sa mga nasod. Kini gisundan sa makahahadlok, itom nga kabayo, nga nagsimbolo sa gutom. Dayon atong makita ang “luspad nga kabayo; ug ang nagsakay niini ginganlag Kamatayon.” (Pinadayag 6:1-8) Ang kolor sa matag kabayo may epekto sa atong emosyon nga susama sa gisimbolohan sa kabayo. Dali ra natong mahinumdoman kini nga mga kabayo ug ang gitudlo niini kanato bahin sa atong adlaw.

Sa Bibliya dunay daghang pananglitan maylabot sa paggamit ug kolor aron daling masabtan ang mahulagwayong mga pulong. Oo, ang Maglalalang sa kahayag, kolor, ug mata sa tawo mahanasong naggamit sa kolor ingong tabang sa pagtudlo aron ang mahulagwayong mga pulong daling masabtan ug mahinumdoman. Ang kolor motabang nato sa pagkuha ug pagprosesog impormasyon. Kini makaapektar sa atong emosyon. Kini makatabang nato sa paghinumdom sa hinungdanong mga ideya. Ang kolor maoy gasa gikan sa atong mahigugmaong Maglalalang aron kita magmalipayon.