MIBATI na ba ka sukad nga nag-inusara ra ka sa pag-atubang sa imong mga problema? Nagkinabuhi ta sa “kuyaw nga mga panahong lisod sagubangon” nga makapabati natog kaluya ug nag-inusara. (2 Tim. 3:1) Pero dili nato angayng solohon ang atong mga problema. Ang Bibliya nag-ingon nga dunay tinuod nga mga higala nga makatabang nato “panahon sa kalisdanan.”—Prov. 17:17.

Nakatabang gyod kang apostol Pablo ang iyang mga higala nga kauban niya sa pagpanaw ingong misyonaryo. (Col. 4:​7-11) Sa dihang napriso si Pablo sa Roma, gihimo sa iyang mga higala ang mga buluhaton nga dili niya mahimo. Pananglitan, gidala ni Epafrodito kang Pablo ang mga butang nga gihatag sa mga igsoon sa Filipos para niya. (Filip. 4:18) Si Tiquico ang naghatod sa mga sulat ni Pablo ngadto sa lainlaing kongregasyon. (Col. 4:7; tan-awa ang study note.) Uban sa tabang sa iyang mga higala, nahimo ra gihapon ni Pablo ang iyang ministeryo bisan pag napriso siya sa balay ug sa bilanggoan. Sa unsang paagi pod ka mahimong tinuod nga higala karon?

Daghan sa atong mga igsoon karon ang nagpakita nga tinuod sila nga mga higala. Konsideraha kon giunsa pagtabang sa usa ka sister si Elisabet, nga regular payunir sa Spain. Sa dihang ang inahan ni Elisabet nadayagnos nga may grabeng kanser, ang sister nagpadala niyag daghang makapalig-on nga mga text message nga gibase sa mga teksto sa Bibliya. Si Elisabet miingon, “Kini nga mga mensahe nakapalig-on gyod nako. Gibati nako nga wala ko mag-inusara sa pag-atubang sa akong mga problema.”—Prov. 18:24.

Mahimo pod tang tinuod nga mga higala kon tabangan nato ang mga igsoon sa pagpakigbahin sa mga kalihokan sa kongregasyon. Pananglitan, puwede ba nimong pasakyon sa imong sakyanan ang usa ka edarang igsoon aron makatambong siya sa tigom o makasangyaw? Kon imo nang himoon, posibleng magkadinasigay mo sa usag usa. (Roma 1:12) Pero ang ubang mga igsoon dili na gyod makahimo sa pagbiya sa balay. Sa unsang paagi ta mahimong tinuod nga higala nila?

Ang ubang mga igsoon dili makatambong sa mga tigom sa Kingdom Hall tungod sa sakit o ubang kahimtang. Tagda ang pananglitan ni David nga nadayagnos nga naay lymphoma. Gi-chemotherapy siya sa kapig unom ka bulan. Niadtong mga panahona, si David ug ang iyang asawa nga si Lidia nagtambong sa mga tigom pinaagig videoconferencing.

Unsang tabang ang ilang nadawat gikan sa mga igsoon sa kongregasyon? Human sa matag tigom, ang ubang igsoon sa Kingdom Hall maningkamot  nga maestorya si David ug Lidia pinaagig videoconference. Dugang pa, sa matag higayon nga mokomento si David ug Lidia, makadawat silag makapadasig nga mga text message gikan sa mga igsoon. Unsay resulta? Gibati ni David ug Lidia nga wala gyod sila kalimti sa mga igsoon.

Matabangan ba nato sa ministeryo ang mga igsoon nga dili na makagawas sa balay? Kon mohimo tag gamayng adjustment, mapakita nato nga wala gyod nato sila kalimti. (Prov. 3:27) Puwede ba nimo silang ubanan usahay sa pag-letter writing o pag-telephone witnessing? Ang mga igsoon nga dili makagawas sa balay basin puwedeng mokonek sa mga tigom alang sa pagsangyaw pinaagig videoconference. Naapresyar ni David ug Lidia kini nga kahikayan. Si David miingon, “Bisag kadiyot lang namo makauban ang mga igsoon sa among grupo panahon sa panaghisgot ug pag-ampo, mapalig-on na mi.” Gawas pa ana, kon safe ra ug itugot sa kahimtang, puwede ba nimong dad-on usahay ang imong Bible study ngadto sa balay sa maong mga igsoon aron didto mo magtuon?

Kon mogahin tag panahon nga makauban ang mga igsoon nga dili makagawas sa balay, mas makita nato ang ilang maayong mga hiyas ug mas masuod ta nila. Pananglitan, kon imo silang makauban sa ministeryo ug makita kon unsa sila ka hanas mogamit sa Pulong sa Diyos sa pagtandog sa kasingkasing sa uban, mas maapresyar nimo sila. Kon suportahan nimo ang maong mga igsoon sa espirituwal nga mga kalihokan, lagmit madugangan ang imong mga higala.—2 Cor. 6:13.

Nakapahupay gyod kang Pablo ang presensiya sa iyang higala nga si Tito. (2 Cor. 7:​5-7) Kini nga asoy nagpahinumdom nato nga puwede natong hupayon ang uban dili lang pinaagi sa pulong kondili pinaagi sab sa pag-uban ug pagsuportar nila.—1 Juan 3:18.

Ang atong mga igsoon sa Russia nagpakita ug maayong ehemplo sa pagtabang sa usag usa. Konsideraha ang eksperyensiya ni Sergey ug sa iyang asawa nga si Tatyana. Giransak sa mga polis ang ilang balay, ug dayon gidala sila sa presinto aron sukitsukiton. Si Tatyana ang unang gibuhian ug gipapauli sa ilang balay. Si Sergey miingon: “Pag-abot [ni Tatyana] sa balay, giadto dayon siya sa usa ka maisogong sister. Ug daghan pang mga higala ang nangabot aron motabang sa pagpanghipos sa balay.”

Si Sergey midugang: “Paborito gyod nakong teksto ang Proverbio 17:​17, nga nag-ingon: ‘Ang tinuod nga higala magpakitag gugma sa tanang panahon ug siya igsoon nga masaligan panahon sa kalisdanan.’ Kini nga mga pulong nahimong mas tinuod pa gyod kanako niining panahon sa paglutos. Kon wala ang tabang sa uban, dili gyod ko makalahutay. Si Jehova naghatag nakog mga higala nga maisogong mitabang nako.” a

Samtang mas magkalisod ang atong kahimtang, mas gikinahanglan nato ang tabang sa atong mga higala. Ug ilabinang gikinahanglan nato sila panahon sa dakong kasakitan. Busa hinaot nga himoon nato ang atong maarangan aron mahimo tang tinuod nga higala karon!—1 Ped. 4:​7, 8.