Si Jesus nagtudlo sa mga tawo nga makigdait sa usag usa. Pero dihay higayon nga giingnan niya ang iyang mga apostoles: “Ayawg hunahunaa nga mianhi ko sa pagdalag pakigdait sa yuta; mianhi ko sa pagdalag espada, dili pakigdait. Kay mianhi ko sa pagpahinabog panagkabahin: anak nga lalaki batok sa iyang amahan, anak nga babaye batok sa iyang inahan, ug binalaye batok sa iyang ugangang babaye.” (Mat. 10:34, 35) Unsay gipasabot ni Jesus?

Dili gusto ni Jesus nga magkabahinbahin ang pamilya. Pero nahibalo siya nga ang iyang mga ginatudlo makapabahinbahin sa ubang pamilya. Busa kadtong gustong mahimong tinun-an sa Kristo ug magpabawtismo kinahanglang makasabot nga ang ilang pamilya posibleng dili malipay sa ilang desisyon. Kon supakon sila sa dili Saksi nga kapikas o ubang membro sa pamilya, basin malisdan sila sa pagsunod sa mga pagtulon-an sa Kristo.

Ang Bibliya nagdasig sa mga Kristohanon nga ‘makigdait sa tanang tawo.’ (Roma 12:18) Pero ang mga gitudlo ni Jesus mahimong samag “espada” diha sa ubang pamilya. Mahitabo nâ dihang ang usa ka membro sa pamilya modawat sa mga gitudlo ni Jesus, pero ang uban diha sa pamilya dili modawat o mosupak pa gani ana. Kon mahitabo nâ, ang mga sakop sa panimalay mahimong mga “kaaway” niadtong nagkat-on sa kamatuoran.​—Mat. 10:36.

Ang mga tinun-an sa Kristo nga naa sa pamilya nga lainlaig relihiyon usahay makaatubang ug mga situwasyon diin masulayan ang ilang gugma kang Jehova ug Jesus. Pananglitan, pugson tingali sila sa ilang dili Saksi nga mga paryente nga moapil sa relihiyosong selebrasyon. Sa maong kahimtang, kinsay ilang sundon? Si Jesus miingon: “Kadtong mas nagmahal sa iyang amahan o inahan kay kanako dili takos kanako.” (Mat. 10:37) Siyempre, wala ipasabot ni Jesus nga aron mahimong takos kaniya, kinahanglang menosan nila ang ilang gugma sa ilang ginikanan. Ang iyang gipasiugda mao nga segurohon nila kon unsa ang pinakaimportante sa ilang kinabuhi. Kon ang dili Saksi nga mga membro sa pamilya mosupak sa atong pagsimba kang Jehova, higugmaon gihapon nato sila, pero nahibalo ta nga mas labaw gyod ang atong gugma sa Diyos.

Tinuod, sakit kaayo kon supakon ka sa imong pamilya. Pero angayng hinumdoman sa mga tinun-an ni Jesus ang iyang giingon: “Kadtong dili modawat sa iyang estaka sa pagsakit ug dili mosunod kanako dili takos kanako.” (Mat. 10:38) Sa ato pa, giisip sa mga Kristohanon ang pagsupak sa pamilya nga apil sa mga kasakit nga andam dawaton sa mga tinun-an sa Kristo. Pero naglaom sila nga pinaagi sa ilang maayong panggawi, mausab ang hunahuna sa ilang pamilya ug mainteres sila sa mensahe sa Bibliya.​—1 Ped. 3:1, 2.