Laktaw ngadto sa video

Laktaw ngadto sa kaundan

 TUN-ANANG ARTIKULO 35

Tahora ang Lunà sa Uban Diha sa Kongregasyon ni Jehova

Tahora ang Lunà sa Uban Diha sa Kongregasyon ni Jehova

“Ang mata dili makaingon sa kamot, ‘Wala ko magkinahanglan nimo,’ o usab, ang ulo dili makaingon sa mga tiil, ‘Wala ko magkinahanglan ninyo.’”​—1 COR. 12:21.

AWIT 124 Magmaunongon Kanunay

SUMARYO *

1. Unsay gihatag ni Jehova sa matag usa sa iyang matinumanong mga alagad?

SI Jehova mahigugmaong naghatag sa matag usa sa iyang matinumanong mga alagad ug lunà diha sa kongregasyon. Bisag lainlain tag papel, kitang tanan bililhon, ug gikinahanglan nato ang usag usa. Si apostol Pablo nagtabang kanato nga masabtan kining importanteng leksiyon. Sa unsang paagi?

2. Sumala sa Efeso 4:16, nganong kinahanglan natong pabilhan ang usag usa ug magtinabangay?

2 Sumala sa giingon sa temang teksto niining artikuloha, gipasiugda ni Pablo nga walay usa kanato ang makaingon sa ubang alagad ni Jehova: “Wala ko magkinahanglan ninyo.” (1 Cor. 12:21) Aron magmalinawon ang kongregasyon, kinahanglan natong pabilhan ang usag usa ug magtinabangay. (Basaha ang Efeso 4:16.) Kon magtinabangay ta ug magkahiusa, ang tanan mobating gihigugma ug molig-on ang kongregasyon.

3. Unsay atong hisgotan niining artikuloha?

3 Unsay pipila ka paagi nga makapakita tag pagtahod sa ubang igsoon sa kongregasyon? Niining artikuloha, atong hisgotan kon sa unsang paagi ikapakita sa mga ansiyano nga gitahod nila ang ilang kaubang mga ansiyano. Dayon hisgotan nato kon sa unsang paagi ikapakita natong tanan nga gipabilhan nato ang mga igsoon nga dili minyo. Ug sa kataposan, atong  makat-onan kon unsaon nato pagpakitag apresasyon niadtong dili larino sa atong pinulongan.

TAHORA ANG IMONG KAUBANG MGA ANSIYANO

4. Unsay gitambag ni Pablo sa Roma 12:10 nga angayng sundon sa mga ansiyano?

4 Ang tanang ansiyano sa kongregasyon gitudlo pinaagi sa balaang espiritu ni Jehova. Pero lainlain silag gasa ug katakos. (1 Cor. 12:17, 18) Ang pipila tingali bag-o pang natudlo nga ansiyano ug wala pa kaayoy eksperyensiya. Ang uban sab limitado na tingalig mahimo tungod sa pangedaron ug problema sa panglawas. Pero ang usa ka ansiyano dili angayng maghunahuna bahin sa iyang kaubang mga ansiyano: “Wala ko magkinahanglan ninyo.” Hinunoa, angayng sundon sa matag ansiyano ang tambag ni Pablo sa Roma 12:10.​—Basaha.

Ikapakita sa mga ansiyano nga ilang gitahod ang ilang kaubang mga ansiyano pinaagi sa pagpaminaw pag-ayo kanila (Tan-awa ang parapo 5-6)

5. Sa unsang paagi ikapakita sa mga ansiyano nga gitahod nila ang ilang kaubang mga ansiyano, ug nganong importante nga himoon nila kini?

5 Ikapakita sa mga ansiyano nga gitahod nila ang ilang kaubang mga ansiyano pinaagi sa pagpaminaw pag-ayo kanila. Importante ni ilabina dihang ang mga ansiyano magmiting aron hisgotan ang seryosong mga butang. Ngano? Matikdi ang giingon sa Oktubre 1, 1988 nga Bantayanang Torre: “Ilhon sa mga ansiano nga si Kristo, pinaagi sa balaang espiritu, makatultol sa kaisipan ni bisan kinsang ansiano sa lawas sa mga ansiano sa pagtagana sa prinsipyo sa Bibliya nga gikinahanglan sa pagsagubang sa bisan unsang kahimtang o sa paghimog importanteng desisyon. (Buhat 15:6-15) Walay usa ka ansiano ang nagbaton sa monopoliya sa espiritu sulod sa lawas.”

6. Sa unsang paagi ang mga ansiyano magtinabangay ug magkahiusa, ug sa unsang paagi makabenepisyo ang kongregasyon kon himoon nila kini?

6 Ang ansiyano nga nagtahod sa iyang kaubang mga ansiyano dili kanunayng mounag sulti panahon sa ilang miting. Likayan niya nga siya na lay magsigeg sulti, ug dili siya maghunahuna nga ang iyang opinyon kanunayng husto. Hinunoa, mapainubsanon niyang isulti ang iyang opinyon. Maminaw siya pag-ayo sa opinyon sa uban. Labaw sa tanan, malipay siyang  maghisgot ug tambag sa Bibliya ug mosunod sa mga instruksiyon sa “matinumanon ug maalamong ulipon.” (Mat. 24:45-47) Kon ang mga ansiyano magpakitag gugma ug pagtahod dihang magmiting sila, ang balaang espiritu sa Diyos mag-uban kanila, ug kini mogiya nila sa paghimog mga desisyon nga makapalig-on sa kongregasyon.​—Sant. 3:17, 18.

TAHORA ANG MGA IGSOON NGA DILI MINYO

7. Unsay hunahuna ni Jesus bahin sa pagkatagsaanon?

7 Sa kongregasyon karon, dunay mga magtiayon ug pamilya. Pero naa poy mga igsoon nga dili minyo. Unsay atong hunahuna sa mga igsoon nga tagsaanon? Matikdi ang panghunahuna ni Jesus bahin sa pagkatagsaanon. Sa iyang ministeryo sa yuta, si Jesus wala magminyo. Iyang gipokus ang iyang panahon ug atensiyon sa iyang asaynment. Wala gyod siya magtudlo nga kinahanglang magminyo o magpabiling tagsaanon. Pero miingon siya nga ang pipila ka Kristohanon modesisyon nga dili magminyo. (Mat. 19:11, 12) Gitahod ni Jesus ang mga dili minyo. Wala siya maghunahuna nga sila ubos o dunay nakulang nila.

8. Sumala sa 1 Corinto 7:7-9, unsay gidasig ni Pablo nga konsiderahon sa mga Kristohanon?

8 Sama kang Jesus, si apostol Pablo nagpabiling tagsaanon panahon sa iyang ministeryo. Siya wala gyod magtudlo nga sayop ang pagminyo. Nahibalo siya nga personal ni nga desisyon. Pero gidasig ni Pablo ang mga Kristohanon nga konsiderahon kon makaalagad ba sila kang Jehova ingong tagsaanon. (Basaha ang 1 Corinto 7:7-9.) Klaro nga wala pakamenosa ni Pablo ang mga Kristohanon nga dili minyo. Gani, gipili niya ang batan-ong si Timoteo, nga usa ka ulitawo, sa pag-atiman sa bug-at nga mga asaynment. * (Filip. 2:19-22) Busa sayop gyod ang paghunahuna nga ang usa ka brader mas kuwalipikado o dili kaayo kuwalipikado tungod lang kay siya minyo o tagsaanon.​—1 Cor. 7:32-35, 38.

9. Unsay atong ikaingon bahin sa kaminyoon ug pagkatagsaanon?

9 Si Jesus ug Pablo wala magtudlo nga ang mga Kristohanon angay o dili angayng magminyo. Busa, unsay atong ikasulti bahin sa kaminyoon ug pagkatagsaanon? Nindot ang giingon sa Oktubre 1, 2012 nga Bantayanang Torre bahin niana: “Ang kaminyoon ug pagkatagsaanon parehong gihubit ingong mga gasa sa Diyos. . . . Si Jehova wala mag-isip [sa pagkatagsaanon] ingong hinungdan sa kaulawan  o kasub-anan.” Busa kinahanglan natong tahoron ang dili minyong mga igsoon sa kongregasyon.

Kay atong gitahod ang mga tagsaanon, unsay atong likayan? (Tan-awa ang parapo 10)

10. Sa unsang paagi ikapakita nato ang atong pagtahod sa atong mga igsoon nga tagsaanon?

10 Unsaon nato pagpakitag pagtahod sa pagbati ug sirkumstansiya sa atong mga igsoon nga dili minyo? Kinahanglan natong hinumdoman nga ang pipila ka Kristohanon midesisyon nga dili magminyo. Ang uban gustong magminyo, pero wala sila makakitag maayong minyoan. Duna poy uban nga namatyag kapikas. Bisan unsa pay rason, husto ba nga pangutan-on nato sila kon nganong wala sila magminyo o angay bang motanyag ta nga tabangan sila nga makakitag kapikas? Siyempre, dunay tagsaanong mga igsoon nga mangayog tabang. Pero kon ang usa wala mangayog tabang, unsa kahay iyang bation kon ato nang himoon? (1 Tes. 4:11; 1 Tim. 5:13) Konsiderahon nato ang giingon sa pipila ka matinumanong igsoon nga tagsaanon.

11-12. Unsa tingali makapaluya sa mga tagsaanon?

11 Ang usa ka ulitawong tigdumala sa sirkito nga maayo kaayo sa iyang asaynment naghunahuna nga daghag benepisyo ang pagkahimong tagsaanon. Pero miingon siya nga makapaluya dihang ang mga igsoon nga maayog intensiyon mangutana: “Nganong wala man ka magminyo?” Usa ka ulitawo nga nag-alagad sa usa ka sangang buhatan miingon: “Usahay ipabati kanako sa mga igsoon nga makaluluoy ang mga tagsaanon. Mora na hinuog problema ang pagkatagsaanon imbes regalo.”

12 Ang usa ka dalagang nag-alagad sa Bethel miingon: “Ang pipila ka igsoon naghunahuna nga ang tanang dalaga ug ulitawo gustong magminyo o kaha ang tanang dalaga ug ulitawo nag-isip sa mga tigom ug tapoktapok ingong kahigayonan nga makakitag kapikas. Kas-a, miadto ko sa usa ka lugar sa among nasod para sa usa ka asaynment. Pag-abot nako didto, atol nga tigom niadtong gabhiona. Giingnan ko sa sister nga nag-host nako nga naay duha ka brader sa kongregasyon nga kaedad nako. Gipasaligan ko niya nga dili ko niya itupotupo. Pero pagsulod namo sa Kingdom Hall, iya dayon kong gibira aron mailaila ang duha ka brader. Siyempre, ulaw kaayo to para namong tulo.”

13. Unsang mga ehemplo ang nakadasig sa usa ka dalaga?

13 Ang laing dalaga nga nag-alagad sa Bethel miingon: “Naa koy nailhang tagsaanong mga payunir nga mas magulang nako kinsa balanseg panghunahuna, dunay klarong mga tumong, andam motabang sa uban, malipayon sa ilang pag-alagad, ug dakog tabang sa kongregasyon. Sila balanseg panglantaw sa ilang pagkatagsaanon. Wala sila maghunahuna nga mas maayo sila sa uban kay nakapabilin silang tagsaanon o nga dili sila magmalipayon kay wala silay kapikas ug pamilya.” Makapalipay kaayo nga naa ka sa kongregasyon nga nagtahod ug nagpabili kanimo. Nahibalo ka nga wala sila mobati nga makaluluoy ka, ug wala ka nila kasinahi. Wala ka nila balewalaa, ug wala sab ka nila isipa nga mas maayo kay kanila. Nahibalo ka nga gimahal ka nila.

14. Sa unsang paagi nato ikapakita nga atong gitahod ang mga tagsaanon?

14 Ang atong mga igsoon nga wala magminyo magmapasalamaton kon pabilhan nato sila tungod sa maayo nilang mga hiyas. Imbes isipon silang makaluluoy, angay nato silang pabilhan tungod sa ilang pagkamatinumanon. Ingong resulta, dili gyod sila mobati nga mora bag giingnan nato sila: “Wala ko magkinahanglan ninyo.” (1 Cor. 12:21) Hinunoa, mahibalo sila nga kita nagtahod nila ug nagpabili sa ilang lunà diha sa kongregasyon.

 TAHORA KADTONG DILI LARINO SA INYONG SINULTIHAN

15. Unsang mga kausaban ang gihimo sa pipila aron mapauswag ang ilang ministeryo?

15 Sa di pa dugayng katuigan, daghang magmamantala ang nagtuon ug laing pinulongan aron mapauswag ang ilang ministeryo. Sa pagbuhat niana, kinahanglan silang mohimog mga kausaban. Sila mibiya sa kongregasyon nga naggamit sa ilang kaugalingong pinulongan aron moalagad sa kongregasyon nga lahig pinulongan ug mas dakog panginahanglan. (Buh. 16:9) Personal ni nga desisyon niini nga mga igsoon aron makaalagad sila kang Jehova nga mas bug-os pa. Bisag dangtan pag pipila ka tuig una sila mahimong larino sa bag-ong pinulongan, dako silag tabang sa kongregasyon. Ang ilang maayong mga hiyas ug eksperyensiya makapalig-on sa kongregasyon. Gipabilhan gyod nato kining mga igsoon nga andam motabang!

16. Unsay basehan sa mga ansiyano dihang susihon nila ang kuwalipikasyon sa mga brader nga itudlo ingong ansiyano ug ministeryal nga alagad?

16 Ang mga ansiyano dili angayng modesisyon nga dili nila irekomendar ang usa ka brader ingong ansiyano o ministeryal nga alagad tungod lang kay dili pa siya larino sa pinulongan sa kongregasyon. Susihon sa mga ansiyano kon nakab-ot ba sa brader ang giingon sa Bibliya nga kuwalipikasyon para sa mga ansiyano ug ministeryal nga alagad, dili kon unsa siya ka maayong mosulti sa pinulongan sa maong kongregasyon.​—1 Tim. 3:1-10, 12, 13; Tito 1:5-9.

17. Unsay kinahanglang desisyonan sa pipila ka pamilya dihang mobalhin sila sa laing nasod?

17 Ang ubang Kristohanong pamilya mibalhin sa laing nasod aron makalingkawas sa lisod nga mga kahimtang sa ilang nasod o aron mangitag trabaho. Tungod niana, ang ilang mga anak tingali giedukar na diha sa pinulongan sa gibalhinan nilang nasod. Ang mga ginikanan kinahanglan sab tingaling makakat-on sa bag-ong pinulongan aron makakitag trabaho. Komosta kon dunay kongregasyon o grupo nga nagsulti sa ilang kaugalingong pinulongan? Asa sila angayng motambong? Sa kongregasyon ba nga naggamit sa pinulongan sa ilang gibalhinan nga nasod o sa kongregasyon nga nagsulti sa ilang kaugalingong pinulongan?

18. Base sa Galacia 6:5, sa unsang paagi makapakita tag pagtahod sa desisyon sa ulo sa pamilya?

18 Ang ulo sa pamilya kinahanglang modesisyon kon asang kongregasyona motambong ang iyang pamilya. Kay personal ni nga desisyon, kinahanglan niyang konsiderahon kon unsay pinakamaayo para sa iyang pamilya. (Basaha ang Galacia 6:5.) Kinahanglang tahoron nato ang desisyon sa ulo sa pamilya. Bisag unsay iyang desisyon, dawaton nato kana. Abiabihon nato ang pamilya ug isipon ingong bililhong bahin sa atong kongregasyon.​—Roma 15:7.

19. Unsay angayng hunahunaon pag-ayo ug iampo sa mga ulo sa pamilya?

19 Sa ubang kahimtang, ang mga pamilya  nag-alagad tingali sa kongregasyon nga naggamit sa pinulongan sa ginikanan, pero ang mga anak dili tingali larino niana. Kon ang maong kongregasyon naa sa lugar diin gigamit ang pinulongan sa nasod, ang mga anak basig dili makasabot sa tigom ug dili mouswag sa espirituwal. Ngano? Tungod kay ang mga anak tingali nag-eskuwela sa eskuwelahan nga naggamit sa pinulongan sa nasod ug dili sa pinulongan sa ilang ginikanan. Sa maong mga kahimtang, ang mga ulo sa pamilya kinahanglang maghunahuna pag-ayo ug mag-ampo alang sa kaalam aron makadesisyon kon unsaon nila pagtabang ang ilang mga anak nga masuod kang Jehova ug sa iyang katawhan. Puwede nilang tabangan ang ilang mga anak nga mahimong larino sa ilang kaugalingong pinulongan o kaha mobalhin sila sa kongregasyon nga naggamit sa pinulongan nga masabtan pag-ayo sa ilang mga anak. Bisag unsay desisyon sa ulo sa pamilya, angayng ipabati sa kongregasyon nga ilang tambongan nga sila gitahod ug gipabilhan.

Sa unsang paagi ikapakita nato nga atong gipabilhan kadtong nagtuon ug bag-ong pinulongan? (Tan-awa ang parapo 20)

20. Sa unsang paagi ikapakita nato nga atong gitahod ang mga igsoon nga nagtuon ug bag-ong pinulongan?

20 Base sa mga rason nga ato nang nahisgotan, sa daghang kongregasyon, dunay mga igsoon nga naningkamot sa pagkat-on ug bag-ong pinulongan. Tingali maglisod sila pagpahayag sa ilang gihunahuna. Pero kon dili ta magpokus sa ilang pagkadili-larino, makita nato ang ilang gugma kang Jehova ug ang ilang tinguha nga alagaran siya. Kon atong makita kining nindot nga mga hiyas, ato gyong pabilhan ug tahoron ang maong mga igsoon. Dili ta moingon “Wala ko magkinahanglan ninyo” tungod lang kay dili sila larino sa atong pinulongan.

BILILHON TA KANG JEHOVA

21-22. Unsang nindot nga pribilehiyo ang atong nabatonan?

21 Si Jehova naghatag kanatog nindot nga pribilehiyo nga makabaton ug lunà diha sa kongregasyon. Kita man babaye o lalaki, tagsaanon o minyo, batan-on o tigulang, larino man o dili sa usa ka pinulongan, kita bililhon kang Jehova ug sa usag usa.​—Roma 12:4, 5; Col. 3:10, 11.

22 Hinaot nga padayon natong ipadapat ang daghang nindot nga mga leksiyon nga atong nakat-onan sa ilustrasyon ni Pablo bahin sa lawas sa tawo. Kini makatabang nato nga mangitag dugang nga mga paagi aron mapabilhan ang atong lunà ug ang lunà sa uban diha sa kongregasyon ni Jehova.

AWIT 90 Magdinasigay Kita sa Usag Usa

^ par. 5 Ang katawhan ni Jehova lainlaig kagikan ug kahimtang, ug lainlain sab silag papel sa kongregasyon. Tabangan ta niining artikuloha nga makita kon nganong importante nga tahoron ang matag membro sa pamilya ni Jehova.

^ par. 8 Dili ta makaseguro nga wala gyod magminyo si Timoteo.