1-2. (a) Nganong makaingon ta nga wala gyod ta mag-inusara dihang makasinati tag mga problema? (b) Unsay atong hisgotan niini nga artikulo?

 DIHANG makaatubang tag lisod nga mga problema, tingali mobati tang nag-inusara, nga samag naa ta sa gamayng bangka diha sa baloron nga dagat. Pero dili ta angayng maghunahuna nga nag-inusara ra ta. Nakita sa atong mahigugmaong langitnong Amahan ang atong kahimtang, ug nagsaad siya nga iya tang tabangan aron malahutay ang mga problema. Gani, mahigugmaong gipasaligan ni Jehova ang iyang maunongong mga alagad: “Ako magtabang kanimo.”—Isa. 41:10.

² Kini nga artikulo maghisgot kon sa unsang paagi si Jehova nagtabang nato pinaagi sa (1) paggiya nato, (2) pagtagana sa atong mga panginahanglan, (3) pagpanalipod nato, ug (4) paghupay nato. Gipasaligan ta ni Jehova nga bisag unsa pang problema ang atong maatubang, dili gyod ta niya kalimtan ug dili gyod ta niya talikdan. Busa wala gyod ta mag-inusara.

SI JEHOVA NAGGIYA NATO

3-4. Sa unsang paagi si Jehova naggiya nato? (Salmo 48:14)

³ Basaha ang Salmo 48:14. Nahibalo si Jehova nga nagkinahanglan ta sa iyang paggiya. Sa unsang paagi niya gigiyahan ang iyang maunongong mga magsisimba karon? Ang usa ka paagi mao ang iyang pagtagana sa Bibliya. (Sal. 119:105) Pinaagi sa iyang Pulong, gitabangan ta ni Jehova nga makahimog maayong mga desisyon ug maugmad ang mga hiyas nga makatabang nato nga magmalipayon karon ug makabatog kinabuhing walay kataposan sa umaabot. a Pananglitan, gitudloan ta niya nga magpasaylo ug dili magdumot, magmatinud-anon, ug kinasingkasing  nga higugmaon ang uban. (Sal. 37:8; Heb. 13:18; 1 Ped. 1:22) Kon ipakita nato kini nga mga hiyas, mahimo tang mas maayong ginikanan, kapikas, ug higala.

⁴ Dugang pa, gipasulat ni Jehova diha sa Bibliya ang kasinatian sa mga tawo nga nakaatubang pod ug mga pagsulay ug parehas natog mga pagbati. (1 Cor. 10:13; Sant. 5:17) Kon ato ning basahon ug ipadapat ang mga leksiyon niini, makabenepisyo gyod ta. Sa unsang paagi? Una, atong makita nga dili lang kita ang nakasinatig mga problema. Ang uban nag-atubang pod ug lisod nga mga kahimtang, ug ila ning nalahutay. (1 Ped. 5:9) Ug ikaduha, makakat-on ta kon unsaon nato pag-atubang ang atong mga problema.—Roma 15:4.

5. Kinsay gigamit ni Jehova sa paggiya nato?

⁵ Gigamit pod ni Jehova ang mga igsoon sa paggiya nato. b Pananglitan, ang mga tigdumala sa sirkito regular nga mobisita sa mga kongregasyon aron dasigon ta. Ang ilang mga pakigpulong nakapalig-on sa atong pagtuo ug nakatabang nga padayon tang magkahiusa. (Buh. 15:40–16:5) Naa pod ang mga ansiyano nga nagpakitag sinserong interes sa mga igsoon. (1 Ped. 5:​2, 3) Gitabangan pod sa mga ginikanan ang ilang mga anak nga higugmaon si Jehova, makahimog maayong mga desisyon, makaugmad ug maayong mga hiyas ug pamatasan, ug makabaton ug maayong rutina sa espirituwal. (Prov. 22:6) Ug ang hamtong nga mga sister makatabang sa batabata nga mga sister pinaagi sa ilang maayong ehemplo, praktikal nga mga tambag, ug mahigugmaong pagdasig.—Tito 2:​3-5.

6. Unsay angay natong buhaton aron makabenepisyo ta sa paggiya ni Jehova?

⁶ Si Jehova naghatag nato sa giya nga atong gikinahanglan aron makahimo tag maayong mga desisyon ug magmalipayon. Unsaon nato pagpakita nga giapresyar nato ang tanan niyang gihimo para nato? Ang Proverbio 3:​5, 6 nag-ingon: “Salig kang Jehova sa bug-os nimong kasingkasing, ug ayawg salig sa kaugalingon nimong pagsabot.” Kon ato nang himoon, “tul-iron niya ang [atong] mga agianan,” sa ato pa, tabangan ta niya nga malikayan ang daghang problema ug mas magmalipayon. Mapasalamaton gyod ta nga si Jehova mahigugmaong naggiya sa matag usa nato.—Sal. 32:8.

SI JEHOVA NAGTAGANA SA ATONG MGA PANGINAHANGLAN

7. Unsa ang pipila ka paagi nga si Jehova nagtagana sa atong mga panginahanglan? (Filipos 4:19)

⁷ Basaha ang Filipos 4:19. Gawas nga gigiyahan ta ni Jehova sa espirituwal, iya pong gipanalanginan ang atong mga paningkamot nga makabaton ug pagkaon, sinina, ug puy-anan. (Mat. 6:33; 2 Tes. 3:12) Natural lang nga mabalaka ta sa atong pisikal nga mga panginahanglan, pero gidasig ta ni Jehova nga dili sobrang mabalaka niining mga butanga. (Tan-awa ang study note sa Mateo 6:25.) Ngano? Kay dili gyod talikdan sa atong Amahan ang iyang matinumanong mga alagad sa dihang manginahanglan silag tabang. (Mat. 6:8; Heb. 13:5) Makasalig ta sa iyang giingon nga iya tang tagan-an sa tanan natong panginahanglan.

8. Giunsa pagtabang ni Jehova si David?

⁸ Konsideraha kon giunsa pagtabang ni Jehova si David dihang nagtagotago siya gikan kang Haring Saul. Niadtong maong lisod nga mga panahon, si Jehova nagtagana niya ug sa iyang mga sundalo sa tanan nilang panginahanglan. Dihang gipamalandong ni David kon giunsa siya pag-atiman ni Jehova niadtong panahona, siya misulat: “Sukad sa akong pagkabatan-on hangtod karon nga tigulang na ko, wala ko makakitag matarong nga gibiyaan, wala usab ko makakita nga ang iyang mga anak  nagpakilimos ug tinapay.” (Sal. 37:25) Sama kang David, tingali nakita pod nimo kon sa unsang paagi si Jehova nagtagana para nimo ug sa mga igsoon sa lisod nga mga panahon.

9. Sa unsang paagi si Jehova nagtabang sa iyang mga alagad karon panahon sa kalamidad? (Tan-awa sab ang mga hulagway.)

⁹ Si Jehova nagtabang pod sa iyang mga alagad panahon sa kalamidad. Pananglitan, dihang may nahitabong kagutom sa unang siglo, ang mga Kristohanon sa lainlaing mga lugar naghatag ug hinabang sa mga igsoon nga nanginahanglan. (Buh. 11:​27-30; Roma 15:​25, 26) Mao pod nay ginahimo sa mga alagad sa Diyos karon. Panahon sa kalamidad, si Jehova nagpalihok sa iyang katawhan sa paghatag sa panginahanglan sa naapektohan nga mga igsoon, sama sa pagkaon, tubig, sinina, ug tambal. Naa poy mga igsoon nga motabang sa pag-repair sa ilang mga balay ug mga Kingdom Hall. Dugang pa, ang mga alagad ni Jehova molihok dayon sa paghupay ug pagdasig niadtong nawad-an ug balay o namatyag minahal. c

10-11. Unsay imong nakat-onan sa kasinatian ni Borys?

¹⁰ Si Jehova mahinatagon pod bisan niadtong wala pa mosimba kaniya. Sa samang paagi, mangita pod tag mga kahigayonan nga magpakitag kaayo bisan niadtong dili nato mga isigkamagtutuo. (Gal. 6:10) Sagad, maayo nig resulta. Konsideraha ang kasinatian ni Borys, usa ka prinsipal nga nagpuyo sa Ukraine. Bisag si Borys dili Saksi ni Jehova, buotan siya sa iyang mga estudyante nga Saksi ug iyang gitahod ang ilang tinuohan. Dihang nakadesisyon si Borys nga mobiya sa ilang lugar tungod sa giyera  ug mobalhin sa mas luwas nga lugar sa ilang nasod, gitabangan siya sa mga igsoon. Wala madugay, si Borys mitambong sa Memoryal sa kamatayon sa Kristo. Dihang iyang gipamalandong ang kaayo nga gipakita kaniya sa mga igsoon, si Borys miingon: “Ang mga Saksi ni Jehova buotan kaayo sa akoa, ug wala gyod ko nila pasagdi. Mapasalamaton kaayo ko nila.”

¹¹ Masundog pod nato ang atong maluluy-ong langitnong Amahan pinaagi sa pagpakitag gugma niadtong mga nanginahanglan, mga alagad man sila ni Jehova o dili. (Luc. 6:​31, 36) Naglaom ta nga ang atong mga paningkamot sa pagpakitag gugma sa mga tawo motabang nila nga mahimong mga tinun-an sa Kristo. (1 Ped. 2:12) Pero bisag dili sila mahimong alagad ni Jehova, magmalipayon gihapon ta kay maeksperyensiyahan nato ang “labaw nga kalipay sa paghatag.”—Buh. 20:35.

SI JEHOVA NANALIPOD NATO

12. Unsang panalipod ang gisaad ni Jehova sa iyang katawhan ingong grupo? (Salmo 91:​1, 2, 14)

¹² Basaha ang Salmo 91:​1, 2, 14. Karon, si Jehova nagsaad nga iya tang panalipdan sa espirituwal. Dili gyod niya tugotan si Satanas nga pugngan ta sa pagsimba kaniya sa dalawatong paagi. (Juan 17:15) Ug inig-abot “sa dakong kasakitan,” makasalig gyod ta nga tumanon ni Jehova ang iyang saad nga panalipdan ang iyang katawhan dili lang sa espirituwal kondili sa pisikal sab, sa ato pa, iya silang luwason ingong grupo.—Pin. 7:​9, 14.

13. Sa unsang mga paagi nanalipod si Jehova kanato ingong indibiduwal?

¹³ Sa unsang paagi nanalipod si Jehova kanato ingong indibiduwal? Gigamit ni Jehova ang Bibliya aron tabangan ta nga masabtan kon unsay husto ug sayop. (Heb. 5:14) Kon atong sundon ang mga prinsipyo diha sa Pulong sa Diyos, atong mapanalipdan ang atong espirituwalidad ug ang atong kinabuhi mismo. (Sal. 91:4) Gipanalipdan pod ta ni Jehova pinaagi sa kongregasyon. (Isa. 32:​1, 2) Kon makig-uban ta niadtong mga nahigugma kang Jehova ug nagsunod sa iyang mga prinsipyo, madasig ta ug mahimong mas determinado nga suklan ang daotang mga impluwensiya.—Prov. 13:20.

14. (a) Nganong dili ta angayng magdahom nga hatagan ta sa Diyos ug pisikal nga proteksiyon sa tanang higayon? (b) Unsay gipasalig kanato sa Salmo 9:10? (Tan-awa sab ang footnote.)

¹⁴ May mga higayon nga giprotektahan ni Jehova sa pisikal nga paagi ang iyang mga alagad kaniadto. Pero wala na niya buhata sa tanang higayon. Ang Bibliya nag-ingon nga puwedeng modangat kang bisan kinsa ang “wala damhang panghitabo.” (Eccl. 9:11) Naa poy mga higayon nga gitugotan ni Jehova ang iyang mga alagad kaniadto nga lutoson ug patyon pa gani aron mapamatud-an nga bakakon si Satanas. (Job 2:​4-6; Mat. 23:34) Puwede pod nang mahitabo sa atong panahon. Pero bisan pag dili tingali wad-on ni Jehova ang atong mga pagsulay, makaseguro ta nga dili gyod niya biyaan kadtong mga nahigugma kaniya. d—Sal. 9:10.

SI JEHOVA NAGHUPAY NATO

15. Sa unsang paagi ang pag-ampo, ang Pulong sa Diyos, ug ang mga igsoon makahupay nato? (2 Corinto 1:​3, 4)

¹⁵ Basaha ang 2 Corinto 1:​3, 4. Usahay maguol ta, mabalaka, o ma-stress. Tingali naa kay giatubang karon nga lisod kaayo nga situwasyon ug mibati ka nga nag-inusara. Naa kahay nakasabot sa imong gibati? Naa. Nakasabot kaayo si Jehova sa atong gibati nga kasakit, ug siya “nagahupay kanato sa tanan natong pagsulay.” Sa unsang paagi? Dihang isulti nato kang Jehova ang tanan natong gibati diha sa pag-ampo, iyang ihatag kanato “ang kalinaw nga gikan sa Diyos, nga labaw sa tanang pagsabot.”  (Filip. 4:​6, 7) Mahupay pod ta dihang basahon nato ang mensahe ni Jehova para nato diha sa Bibliya. Atong mabasa dinhi nga gimahal gyod ta ni Jehova ug gusto niya nga mahimo tang maalamon ug makabaton ug nindot nga kaugmaon. Ug sa mga tigom, mahupay ta kay kauban nato ang mahigugmaong mga igsoon ug madasig ta sa atong mga nakat-onan gikan sa Bibliya.

16. Unsay imong nakat-onan sa kasinatian ni Nathan ug Priscilla?

¹⁶ Si Jehova naghupay ug nagpalig-on nato pinaagi sa iyang Pulong. Konsideraha ang kasinatian ni Nathan ug Priscilla, nga nagpuyo sa United States. Nakadesisyon sila nga mobalhin sa lugar nga dakog panginahanglan para sa mga magsasangyaw. Si Nathan miingon: “Misalig mi nga panalanginan ni Jehova ang among mga paningkamot.” Pero pag-abot nila sa ilang asaynment, wala damha nga nagkasakit sila ug naglisod sa pinansiyal. Sa ngadtongadto, nakadesisyon silang mobalik sa ilang lugar pero padayon gihapon silang nagkalisod. Si Nathan miingon: “Naglibog ko kon nganong wala mi panalangini sa Diyos. Nakahunahuna pa gani ko kon naa ba koy nahimo nga dili maayo.” Pero sa ulahi, naamgohan ni Nathan ug Priscilla nga wala gyod sila pasagdi sa Diyos. Si Nathan midugang: “Niadtong lisod nga panahon, ang Bibliya nahisamag maalamon namong higala nga nagdasig ug naggiya kanamo. Imbes magpokus sa among pagsulay, nagpokus mi kon giunsa mi pagtabang ni Jehova nga makalahutay. Tungod ana, mas andam na ming moatubang sa mas lisod pa nga mga pagsulay sa umaabot.”

17. Sa unsang paagi ang sister nga si Helga nakadawat ug paghupay? (Tan-awa sab ang hulagway.)

¹⁷ Ang atong mga igsoon makahupay pod nato. Sa unsang paagi? Konsideraha ang kasinatian ni Helga, nga nagpuyo sa Hungary. Sulod sa daghang katuigan, nakaatubang siyag lainlaing mga problema nga nakapabalaka ug nakapaguol pag-ayo niya. Pero dihang iyang gipamalandong ang iyang mga naeksperyensiyahan, iyang nakita kon giunsa siya paghupay ni Jehova pinaagi sa kongregasyon. Siya misulat:  “Kanunay kong gitabangan ni Jehova dihang iyang makita nga luya na kaayo ko tungod sa akong trabaho, pag-atiman sa akong anak nga nagsakit, ug sa uban pang mga problema. Sa milabayng 30 ka tuig, wala gyoy adlaw nga wala tumana ni Jehova ang iyang saad nga iya kong hupayon. Sagad, ginapalig-on ko niya pinaagi sa makapadasig nga mga pulong gikan sa mga igsoon nga buotan ug mahunahunaon kaayo. Pirme kong makadawat ug message, card, ug komendasyon sa panahon nga ako ning gikinahanglan.”

18. Sa unsang paagi ta makahupay sa uban?

¹⁸ Naa tay pribilehiyo nga sundogon ang atong Diyos pinaagi sa paghupay sa uban. Unsaon nato na paghimo? Mapailobon tang maminaw nila, sultihan silag makapahupay nga mga pulong, ug tabangan sila sa praktikal nga mga paagi. (Prov. 3:27) Maningkamot ta nga hupayon ang tanan nga naa sa kalisdanan, apil na kadtong wala pa mag-alagad kang Jehova. Kon mamatyan sila, masakit, o kaha makasinatig grabeng kabalaka, ato silang bisitahon, maminaw ta nila, ug sultihan nato silag makapadasig nga mga teksto sa Bibliya. Kon sundogon nato si Jehova, “ang Diyos sa tanang paghupay,” matabangan nato ang mga igsoon nga makalahutay sa ilang mga problema. Ug kon hupayon nato bisan kadtong wala pa moalagad kang Jehova, basin mapalihok sila nga mokat-on bahin niya.—Mat. 5:16.

SI JEHOVA NAA KANUNAY PARA NATO

19. Unsay gihimo ni Jehova para nato, ug unsaon nato siya pagsundog?

¹⁹ Gimahal pag-ayo ni Jehova ang tanan nga nahigugma kaniya. Dili gyod ta niya biyaan dihang mag-atubang tag lisod nga mga situwasyon. Sama sa usa ka ginikanan nga mahigugmaong nag-atiman sa iyang anak, si Jehova nag-atiman pod sa iyang matinumanong mga alagad. Siya naggiya kanato, nag-atiman sa atong mga panginahanglan, nanalipod, ug naghupay nato. Masundog nato ang atong mahigugmaong langitnong Amahan kon atong tabangan ug lig-onon ang uban panahon sa ilang kalisdanan. Bisan pag makaatubang tag mga problema ug kasakit, makasalig ta nga si Jehova naa kanunay para nato. Siya nagsaad: “Ayawg kahadlok, kay ako nagauban kanimo.” (Isa. 41:10) Makasalig gyod ta ana! Wala gyod ta mag-inusara.