1. Aron tinuod tang magmalipayon, unsay angay natong buhaton, ug ngano? (Isaias 48:​17, 18)

 GIMAHAL ta pag-ayo sa atong langitnong Amahan, ug gusto niya nga ma-enjoy nato ang atong kinabuhi karon ug sa umaabot. (Eccl. 3:​12, 13) Gilalang ta niya nga may talagsaong mga katakos, pero wala ta niya gidisenyo nga maoy magmando sa atong kaugalingon o magbuot kon unsay husto ug sayop. (Eccl. 8:9; Jer. 10:23) Nahibalo siya nga aron tinuod tang magmalipayon, angay tang moalagad niya ug mosunod sa iyang mga sukdanan.—Basaha ang Isaias 48:​17, 18.

2. Unsay gusto ni Satanas nga atong tuohan, ug unsay gihimo ni Jehova aron pamatud-an nga sayop si Satanas?

² Gusto tang patuohon ni Satanas nga magmalipayon ta bisag wala si Jehova sa atong kinabuhi ug nga kaya natong mandoan ang atong kaugalingon. (Gen. 3:​4, 5) Aron pamatud-an nga sayop si Satanas, gitugotan ni Jehova ang rebelyosong katawhan sa pagmando sa ilang kaugalingon sa limitadong panahon. Ug nakita gyod nato nga dili maayo ang resulta sa pagmando sa tawo. Sa laing bahin, ang Bibliya naghisgot bahin sa daghang lalaki ug babaye nga nagmalipayon sa ilang kinabuhi kay mialagad sila kang Jehova. Usa nila mao si Jesu-Kristo. Atong hisgotan ang mga rason kon nganong mipili siya sa pag-alagad kang Jehova. Dayon atong susihon kon nganong ang atong langitnong Amahan takos sa atong pagsimba. Hisgotan pod nato ang pipila sa mga rason kon nganong mipili ta sa pag-alagad kang Jehova.

 KON NGANONG MIPILI SI JESUS SA PAG-ALAGAD KANG JEHOVA

3. Unsay gitanyag ni Satanas kang Jesus, ug unsay gipili ni Jesus?

³ Wala madugay human mabawtismohi si Jesus, si Satanas miingon nga iyang ihatag kaniya ang tanang gingharian sa yuta basta mohimo lang siyag usa ka buhat sa pagsimba. Nianang higayona, kinahanglang mopili si Jesus kon kinsay iyang alagaran. Si Jesus mitubag: “Pahawa, Satanas! Kay kini nahisulat, ‘Si Jehova nga imong Diyos ang angay nimong simbahon, ug siya lamang ang angay nimong hatagag sagradong pag-alagad.’” (Mat. 4:​8-10) Nganong kana ang gipili ni Jesus? Konsideraha ang pipila sa mga hinungdan.

4-5. Unsa ang pipila ka rason kon nganong mipili si Jesus nga alagaran si Jehova?

⁴ Ang pangunang rason nga mipili si Jesus sa pag-alagad kang Jehova mao ang gugma—gihigugma pag-ayo ni Jesus ang iyang Amahan. (Juan 14:31) Gawas pa ana, si Jesus nag-alagad kang Jehova kay mao na ang hustong buhaton. (Juan 8:​28, 29; Pin. 4:11) Nahibalo siya nga si Jehova ang naghatag sa kinabuhi ug nga Siya kasaligan ug mahinatagon. (Sal. 33:4; 36:9; Sant. 1:17) Si Jehova kanunayng matinud-anon kang Jesus ug Siya ang naghatag sa tanan niyang nabatonan. (Juan 1:14) Sa laing bahin, si Satanas maoy hinungdan sa kamatayon. Siya bakakon, hakog, ug kaugalingon ray gihunahuna. (Juan 8:44) Kay nakaila pag-ayo si Jesus kang Jehova ug kang Satanas, wala gyod mosantop sa hunahuna ni Jesus nga sundogon si Satanas pinaagi sa pagrebelde kang Jehova.—Filip. 2:​5-8.

⁵ Naa pay laing rason kon nganong mipili si Jesus sa pag-alagad kang Jehova. Nagpokus siya sa maayong mga resulta kon magmaunongon siya. (Heb. 12:2) Nahibalo siya nga kon magpabilin siyang matinumanon, mabalaan niya ang ngalan sa iyang Amahan ug mapaposible nga matapos ang tanang pag-antos nga gipahinabo sa Yawa.

KON NGANONG SI JEHOVA TAKOS SA ATONG PAGSIMBA

6-7. Nganong daghan karon ang wala mag-alagad kang Jehova, pero nganong takos siya sa atong pagsimba?

⁶ Daghan karon ang wala mag-alagad kang Jehova tungod kay wala sila mahibalo bahin sa iyang maayo kaayong mga hiyas ug sa tanang maayong butang nga iyang gihimo para nila. Ingon ana sab ang kahimtang sa mga taga-Atenas nga gisangyawan ni Pablo. Sila wala pod makaila sa Diyos.—Buh. 17:​19, 20, 30, 34.

⁷ Gisultihan ni Pablo ang mga taga-Atenas nga ang matuod nga Diyos “naghatag sa tanang tawo ug kinabuhi ug gininhawa ug tanang butang.” Siya midugang: “Pinaagi kaniya kita dunay kinabuhi ug naglihok ug naglungtad.” Ang Diyos mao ang Maglalalang, ug “gikan sa usa ka tawo, iyang gihimo ang tanang nasod sa katawhan,” mao nga takos gyod siya sa atong pagsimba.—Buh. 17:​25, 26, 28.

8. Unsay dili gyod himoon ni Jehova? Ipatin-aw.

⁸ Ingong Maglalalang ug Soberano sa uniberso, puwede gyod unta tang pugson ni Jehova nga alagaron siya. Pero wala na himoa ni Jehova. Hinuon, naghatag siya natog mga ebidensiya nga naglungtad siya ug nga gimahal niya pag-ayo ang matag usa kanato. Gusto niya nga mas daghan pa ang mahimo niyang mga higala hangtod sa hangtod. (1 Tim. 2:​3, 4) Tungod ana, gibansay ta ni Jehova sa pagtudlo sa uban bahin sa iyang katuyoan ug sa maayong mga butang nga iyang himoon para sa katawhan. (Mat. 10:​11-13; 28:​19, 20) Nagtagana pod siyag mga kongregasyon ug mga ansiyano sa pag-atiman kanato.—Buh. 20:28.

9. Giunsa pagpakita ni Jehova ang iyang gugma sa katawhan?

⁹ Gipakita ni Jehova ang iyang talagsaong  gugma pinaagi sa pagpakitag kaayo bisan niadtong mga tawo nga wala magsimba kaniya. Konsideraha ni: Sukad pa sa una, daghan kaayong tawo ang mipili nga magkinabuhi sumala sa ilang kaugalingong sukdanan sa husto ug sayop. Bisan pa ana, gihatagan sila ni Jehova sa ilang mga gikinahanglan aron mabuhi ug magmalipayon. (Mat. 5:​44, 45; Buh. 14:​16, 17) Pananglitan, puwede silang magmalipayon tungod sa ilang pamilya ug mga higala nga nahigugma nila, puwede silang makabatog mga anak, ug mobatig katagbawan tungod sa ilang mga nalampos. (Sal. 127:3; Eccl. 2:24) Kining tanan klarong nagpakita nga gimahal gyod sa atong langitnong Amahan ang tanang tawo. (Ex. 34:6) Karon atong hisgotan ang pipila sa mga rason kon nganong mipili ta sa pag-alagad kang Jehova ug kon unsang mga panalangin ang atong nadawat.

KON NGANONG MIPILI TA SA PAG-ALAGAD KANG JEHOVA

10. (a) Unsa ang pangunang rason kon nganong nag-alagad ta kang Jehova? (Mateo 22:37) (b) Sa unsang paagi ka nakabenepisyo sa pailob ni Jehova? (Salmo 103:​13, 14)

¹⁰ Sama kang Jesus, nag-alagad ta kang Jehova tungod kay gimahal nato siya pag-ayo. (Basaha ang Mateo 22:37.) Mas masuod ta kang Jehova kon mahibaloan nato ang iyang mga hiyas. Tagda pananglitan ang pailob ni Jehova. Sa dihang ang mga Israelinhon misupak kaniya, iya silang gihangyo: “Palihog, biya sa inyong daotang mga dalan.” (Jer. 18:11) Nahibalo si Jehova nga dili ta hingpit ug nga abog ra ta. (Basaha ang Salmo 103:​13, 14.) Kon pamalandongon nimo ang pailob ni Jehova ug ang uban pa niyang nindot nga mga hiyas, mapalihok gyod ka nga alagaran siya hangtod sa hangtod.

11. Unsa ang dugang mga rason kon nganong mipili ta nga alagaron ang atong langitnong Amahan?

¹¹ Mapalihok pod ta sa pag-alagad kang Jehova kay nahibalo ta nga mao ni ang hustong buhaton. (Mat. 4:10) Dugang pa, nahibalo ta kon unsay atong mapalampos kon magmaunongon ta kaniya. Ang atong pagkamatinumanon makatabang nga mabalaan ang ngalan ni Jehova, mapamatud-an nga bakakon ang Yawa, ug makapalipay sa kasingkasing sa atong Amahan. Ug kon mopili ta nga moalagad kang Jehova karon, naa tay paglaom nga alagaran siya hangtod sa hangtod.—Juan 17:3.

12-13. Unsay atong makat-onan sa eksperyensiya ni Jane ug Pam?

¹² Puwedeng maugmad sa usa ang lawom nga gugma kang Jehova bisag bata pa siya. Kini nga gugma mas magkalawom paglabay sa panahon. Matikdi ang eksperyensiya sa magsoong si Jane ug Pam. a Si Jane 11 anyos ug si Pam 10 anyos dihang nagsugod sila sa pagtuon sa Bibliya. Bisag dili interesado ang ilang ginikanan, misugot ra sila nga makig-uban si Jane ug Pam sa mga Saksi basta mouban pod silang duha sa ilang pamilya sa simbahan inigka-weekend. Si Jane miingon: “Ang gitudlo sa mga Saksi gikan sa Bibliya nakatabang nako nga masuklan ang impluwensiya sa akong mga schoolmate nga mag-drugs o mohimog imoral.”

¹³ Paglabay sa pipila ka tuig, si Jane ug Pam nahimong mga magmamantala. Sa ulahi, nagpayunir sila samtang nag-atiman sa ilang tigulang na nga mga ginikanan. Sa dihang gipamalandong ni Jane ang ilang kasinatian, siya miingon: “Nakita nako nga atimanon gyod ni Jehova ang iyang mga higala, ug nga sama sa giingon sa 2 Timoteo 2:​19, ‘Si Jehova nakaila sa mga iyaha.’” Busa kon mopili ta nga higugmaon ug alagaron si Jehova, segurado nga iya gyod tang atimanon!

14. Sa unsang paagi madepensahan nato ang ngalan ni Jehova pinaagi sa atong mga pulong ug binuhatan? (Tan-awa sab ang mga hulagway.)

¹⁴ Gipasipalahan pag-ayo ang ngalan ni Jehova,  maong gusto nato ning depensahan. Hunahunaa ni: Ibutang ta nga naa kay suod nga higala nga buotan, mahinatagon, ug mapinasayloon. Pero usa ka adlaw, naay miingon nga ang imong higala salbahis kuno ug bakakon. Unsay imong himoon? Imo siyang depensahan. Sa susama, si Satanas ug kadtong ubos sa iyang impluwensiya naningkamot nga daoton ang reputasyon ni Jehova pinaagi sa pagpakaylap ug daghang bakak nga mga akusasyon bahin Kaniya. Pero maisogon natong depensahan ang ngalan ni Jehova pinaagi sa pagsulti sa kamatuoran bahin niya. (Sal. 34:1; Isa. 43:10) Pinaagi sa atong pulong ug binuhatan, gusto natong ipakita nga kinasingkasing tang nag-alagad kang Jehova.

15. Sa unsang paagi nakabenepisyo si Pablo dihang giusab niya ang iyang mga tumong? (Filipos 3:​7, 8)

¹⁵ Andam natong usbon ang atong mga tumong sa kinabuhi aron makaalagad ta kang Jehova sa dalawatong paagi o sa mas bug-os pa. Pananglitan, gibiyaan ni apostol Pablo ang iyang prominenteng posisyon sa Judaismo aron mosunod sa Kristo ug moalagad kang Jehova. (Gal. 1:14) Tungod ana, nabatonan niya ang makapatagbaw nga kinabuhi ug ang pribilehiyo nga magmando kauban sa Kristo didto sa langit. Wala gyod siya magmahay sa iyang desisyon nga alagaran si Jehova. Sama kang Pablo, kon moalagad ta kang Jehova, dili gyod ta magmahay sa atong desisyon.—Basaha ang Filipos 3:​7, 8.

16. Unsay atong makat-onan sa eksperyensiya ni Julia? (Tan-awa sab ang mga hulagway.)

¹⁶ Kon magpokus ta sa pag-alagad kang Jehova, makabaton ta ug makapatagbaw nga kinabuhi karon ug sa umaabot. Konsideraha ang eksperyensiya sa sister nga si Julia. Sukad sa bata pa siya, membro siya sa choir sa simbahan. Nakita sa usa ka professional opera singer  ang iyang dili bastabasta nga talento ug gibansay siya. Wala madugay, misikat si Julia ug nag-perform na sa sikat nga mga venue bisag bata pa siya. Sa dihang mieskuwela siya sa ilado nga music school, gisangyawan siya sa iyang classmate bahin sa Diyos ug giingnan nga Jehova ang ngalan sa Diyos. Wala madugay, nagsugod na siya sa pagtuon sa Bibliya kaduha sa usa ka semana. Sa ngadtongadto, midesisyon siya nga magpokus sa pag-alagad kang Jehova imbes sa iyang propesyon ingong singer. Siyempre, dili to sayon nga desisyon. Si Julia miingon: “Daghan ang miingon nako nga gisayangan daw nako ang akong talento. Pero gusto nakong gamiton ang akong kinabuhi aron bug-os nga alagaron si Jehova.” Unsay iyang gibati karon bahin sa desisyon nga iyang gihimo kapig 30 ka tuig na ang milabay? Si Julia miingon: “Malipayon ko nga mipili ko sa pag-alagad kang Jehova, ug nahibalo ko nga sa umaabot ihatag niya ang mga tinguha sa akong kasingkasing.”—Sal. 145:16.

PADAYON SA PAG-ALAGAD KANG JEHOVA

17. Sa unsang paagi ang pagkahibalo nga duol na kaayo ang kataposan makaapektar niadtong mga mipili sa pag-alagad sa Diyos ug niadtong wala pa?

¹⁷ Duol na gyod kaayo ang kataposan. Si apostol Pablo misulat: “Kay ‘sa mubo na lang kaayo nga panahon,’ ug ‘siya nga moanhi moabot ug dili maglangan.’” (Heb. 10:37) Unsay angayng epekto niini kanato? Para niadtong wala pa mopili sa pag-alagad kang Jehova, ‘mubo na lang kaayo ang panahon’ sa pagdesisyon.  (1 Cor. 7:29) Ug para nato nga nakapili na sa pag-alagad sa Diyos, nahibalo ta nga bisag makaatubang tag mga pagsulay, dili ra ni magdugay kay ‘mubo na lang kaayo ang panahon.’

18. Unsay gusto ni Jesus ug ni Jehova nga atong himoon?

¹⁸ Gidasig ni Jesus ang mga tawo nga mahimong iyang mga tinun-an ug padayong mosunod kaniya. (Mat. 16:24) Busa kon daghang tuig na tang nag-alagad kang Jehova, hinaot nga magmadeterminado ta nga dili gyod moundang. Maningkamot ta nga padayong magkinabuhi uyon sa atong desisyon nga alagaron siya. Tingali kinahanglan tang mohimog mga sakripisyo, pero gamay ra na kon itandi sa kalipay ug sa mga panalangin nga atong madawat bisan karon pa lang.—Sal. 35:27.

19. Unsay atong makat-onan sa kasinatian ni Gene?

¹⁹ Ang uban moingon nga kon moalagad sila kang Jehova, dili nila ma-enjoy ang kinabuhi. Kon batan-on ka, ingon ana pod ba ang imong gibati? Ang usa ka batan-ong brader nga si Gene miingon: “Gibati nako nga laay kaayo ang akong kinabuhi ingong Saksi ni Jehova kay daghag bawal. Daghan sa akong mga kaedad ang morag nag-enjoy kaayo sa ilang kinabuhi. Magsige silag party, mag-uyab-uyab, o magdulag mga video game nga pinatyanay. Pero ako, nagsige ra intawon ug tambong sa tigom ug sangyaw.” Unsay epekto niini kang Gene? Siya miingon: “Misugod kog dobleng pagkinabuhi, ug sa primero, nag-enjoy pod baya ko. Pero wala magdugay ang akong kalipay. Tungod ana, gipamalandong nako ang mga kamatuoran sa Bibliya nga akong nakat-onan kaniadto, ug nakadesisyon ko nga moalagad na kang Jehova nga kinasingkasing. Sukad adto, gibati nako nga gitubag ni Jehova ang tanan nakong pag-ampo.”

20. Unsay angay natong determinasyon?

²⁰ Ang usa ka salmista miawit kang Jehova: “Malipayon ang tawo nga imong pilion ug paduolon aron mopuyo sa imong mga hawanan.” (Sal. 65:4) Hinaot nga atong sundogon ang determinasyon ni Josue kinsa miingon: “Para nako ug sa akong panimalay, kami mag-alagad kang Jehova.”—Jos. 24:15.