1-2. Unsa nga mga kahimtang ang puwede untang makababag kang Marcos ug Timoteo sa pag-alagad sa uban nga mas bug-os?

 MGA batan-ong brader, gusto ba mong mohimo pag dugang para kang Jehova ug sa kongregasyon? Segurado nga mao nay gusto ninyong buhaton. Makapalipay ang pagkakita sa daghang mga batan-on nga gusto gyong moalagad sa uban! (Sal. 110:3) Pero naa tingali nakapugong ninyo sa pagbuhat niana. Basin napugngan mo sa pagpauswag pa sa inyong ministeryo kay daghan mog gikabalak-an. O kaha nagduhaduha mo sa pagdawat sa usa ka pribilehiyo kay kulang mog pagsalig sa inyong kaugalingon. Pero dili lang kamo ang mibati niana.

² Kana pod ang gibati ni Marcos ug Timoteo. Pero wala sila magpadaog sa ilang mga kabalaka ug kakulang ug pagsalig sa kaugalingon. Posible nga si Marcos haruhay ug kinabuhi uban sa iyang inahan dihang gidapit siya ni apostol Pablo ug ni Bernabe nga mouban nila sa ilang unang panaw ingong misyonaryo. (Buh. 12:​12, 13, 25) Pero gibiyaan na ni Marcos aron mohimo pag dugang sa iyang ministeryo. Una, mibalhin siya sa Antioquia. Dayon, miuban siya kang Pablo ug Bernabe paingon sa lagyong mga dapit. (Buh. 13:​1-5) Sa bahin ni Timoteo, lagmit nagpuyo siya uban sa iyang mga ginikanan dihang gidapit siya ni Pablo nga mouban niya sa pagsangyaw. Tingali gibati ni Timoteo nga dili siya kuwalipikado niana tungod kay batan-on pa siya ug kulang ug eksperyensiya, pero wala siya magpadaog niana nga pagbati. (Itandi ang 1 Corinto 16:​10, 11 ug 1 Timoteo  4:12.) Iyang gidawat ang imbitasyon ni Pablo ug tungod niana nakabaton siyag daghang panalangin.—Buh. 16:​3-5.

3. (a) Nganong makaingon ta nga naapresyar gyod ni Pablo si Marcos ug Timoteo? (2 Timoteo 4:​6, 9, 11) (Tan-awa sab ang mga hulagway.) (b) Unsa nga mga pangutana ang atong hisgotan niini nga artikulo?

³ Si Marcos ug Timoteo nakakat-on sa pag-atiman sa bug-at nga mga responsibilidad sa kongregasyon bisag batan-on pa sila. Giapresyar gyod sila ni Pablo. Gani dihang naamgohan ni Pablo nga hapit na siyang mamatay, gusto niya nga naa sila sa iyang kiliran. (Basaha ang 2 Timoteo 4:​6, 9, 11.) Unsa nga mga hiyas ni Marcos ug Timoteo ang nagustohan ni Pablo? Sa unsang paagi masundog sila sa mga batan-ong brader? Ug sa unsang paagi ang mga batan-ong brader makabenepisyo sa mga tambag ni Pablo?

SUNDOGA SI MARCOS—MAHIMONG ANDAM SA PAG-ALAGAD

4-5. Sa unsang paagi gipakita ni Marcos nga andam siyang moalagad sa uban?

⁴ Sumala sa usa ka reperensiya, ang pag-alagad nagpasabot ug determinadong pagtabang sa uban bisan pag lisod usahay ang pagbuhat niana. Si Marcos naghatag ug maayong ehemplo bahin niini. Panahon sa ikaduhang misyonaryong panaw ni Pablo, wala niya giuban si Marcos, ug lagmit nasakitan ug naguol gyod si Marcos niadto. (Buh. 15:​37, 38) Pero wala to makapugong kang Marcos sa pag-alagad sa mga igsoon.

⁵ Si Marcos mikuyog sa iyang ig-agaw nga si Bernabe aron moalagad sa laing lugar. Mga 11 ka tuig sa ulahi, usa si Marcos sa mga mitabang kang Pablo panahon sa iyang unang pagkapriso didto sa Roma. (Filem. 23, 24) Giapresyar pag-ayo ni Pablo ang gihimo ni Marcos, ug miingon pa gani siya nga si Marcos “nakahupay pag-ayo” niya.—Col. 4:​10, 11.

6. Sa unsang paagi nakabenepisyo si Marcos sa iyang pagpakig-uban sa hamtong nga mga Kristohanon? (Tan-awa ang footnote.)

⁶ Nakabenepisyo si Marcos sa iyang pagpakig-uban sa hamtong nga mga Kristohanon. Human mogahin ug panahon kauban ni Pablo didto sa Roma, si Marcos miadto sa Babilonya aron moalagad uban ni apostol Pedro. Nasuod gyod sila sa usag usa, ug gani giisip ni Pedro si Marcos ingong ‘iyang anak.’ (1 Ped. 5:13) Samtang nagkauban sila, lagmit daghag giasoy si Pedro nga makapainteres nga mga detalye bahin sa kinabuhi ug ministeryo ni Jesus, ug sa  ulahi gisulat kini ni Marcos sa iyang Ebanghelyo. a

7. Giunsa pagsundog sa batan-ong brader nga si Seung-Woo ang ehemplo ni Marcos? (Tan-awa sab ang hulagway.)

⁷ Si Marcos madasigong nag-alagad kang Jehova ug nakigsuod sa hamtong nga mga igsoon. Unsaon nimo pagsundog si Marcos? Tingali gusto nimong moalagad ingong ministeryal o ansiyano pero hangtod karon wala pa ka matudlo. Ayawg kaluya, ug padayon lang sa pag-alagad kang Jehova ug sa mga igsoon. Mao nay naeksperyensiyahan ni Seung-Woo, nga karon nag-alagad na ingong ansiyano. Niadtong mas bata pa siya, kanunay niyang ikompara ang iyang kaugalingon sa ubang mga batan-ong brader. Ang uban nila naa nay mga pribilehiyo, pero siya wala pa. Gibati ni Seung-Woo nga wala gipabilhan ang iyang mga paningkamot, ug sa ngadtongadto iya ning gisulti sa pipila ka ansiyano. Gitambagan siya sa usa ka ansiyano nga maningkamot sa pagbuhat ug maayo bisan pag usahay dili ni mamatikdan sa uban. Gipadapat ni Seung-Woo ang tambag ug gitabangan niya ang mga edaran ug kadtong nanginahanglag tabang aron makatambong sa Kingdom Hall. Si Seung-Woo miingon: “Mas nasabtan na nako kon unsa gyoy kahulogan sa pag-alagad sa uban. Ug mibati gyod kog kalipay sa pagtabang nila.”

SUNDOGA SI TIMOTEO—KINASINGKASING NGA HIGUGMAA ANG MGA IGSOON

8. Nganong gipili ni Pablo si Timoteo nga mouban niya sa iyang mga panaw? (Filipos 2:​19-22)

⁸ Si Pablo nagkinahanglan ug maisogong mga igsoon nga mouban niya sa pagbalik sa mga siyudad diin siya nakasinatig mga paglutos. Una niyang gipili ang hamtong nga Kristohanon nga si Silas. (Buh. 15:​22, 40) Sa ulahi, giuban pod ni Pablo si Timoteo. Nganong gipili man ni Pablo si Timoteo? Ang usa sa mga rason mao nga naa siyay maayong reputasyon. (Buh. 16:​1, 2) Kinasingkasing pod niyang gihigugma ang mga igsoon.—Basaha ang Filipos 2:​19-22.

9. Giunsa pagpakita ni Timoteo nga gihigugma gyod niya ang mga igsoon?

⁹ Sa primero pa lang nga pag-uban ni Timoteo kang Pablo, gipakita na niya nga mas giuna niya ang kaayohan sa uban kay sa iyang kaugalingon. Busa sa dihang mibiya si Pablo sa Berea, masaligon siya nga atimanon ni Timoteo ang bag-ong mga igsoon didto. (Buh. 17:​13, 14) Niadtong panahona, seguradong daghag nakat-onan si Timoteo kang Silas, kinsa nagpabilin pod sa Berea. Pero sa ulahi, si Timoteo na lang ang gipadala ni Pablo sa Tesalonica aron palig-onon ang mga igsoon didto. (1 Tes. 3:2) Sa misunod nga 15 ka tuig o kapin pa, si Timoteo nakakat-on nga ‘mohilak uban sa mga naghilak,’  sa ato pa magpakitag empatiya niadtong mga nakasinatig kalisdanan. (Roma 12:15; 2 Tim. 1:4) Sa unsang paagi masundog sa mga batan-ong brader ang panig-ingnan ni Timoteo?

10. Sa unsang paagi ang brader nga si Woo Jae nakakat-on nga magpakitag personal nga interes sa uban?

¹⁰ Ang brader nga si Woo Jae nakakat-on nga magpakitag personal nga interes sa uban. Niadtong mga 20 anyos pa siya, maulaw siyang makig-estorya sa mga igsoon nga mas magulang niya. Maong igo ra siyang motimbaya nila sa Kingdom Hall ug molakaw dayon. Usa ka ansiyano ang misugyot kang Woo Jae nga sultihan niya ang mga igsoon kon unsay iyang naapresyar nila. Gitambagan pod siya sa maong ansiyano nga hunahunaon kon unsa kahay ilang ganahang hisgotan. Gipadapat ni Woo Jae kini nga tambag. Karon, si Woo Jae nag-alagad na ingong ansiyano. Siya miingon: “Sayonan na ko ron makig-estorya sa mga tawo nga lainlain ug edad. Ganahan gyod ko kay mas nasabtan na nako ang kahimtang sa mga igsoon. Ug nagamit nako ni sa pagtabang nila.”

11. Sa unsang paagi ang mga batan-ong brader makakat-on sa pagpakitag personal nga interes sa mga igsoon? (Tan-awa sab ang hulagway.)

¹¹ Mga batan-ong brader, makakat-on sab mo sa pagpakitag personal nga interes sa uban. Sa mga tigom, paningkamoti nga maestorya ang mga igsoon nga lainlaig edad ug kagikan. Komostaha ug paminawa sila. Makahatag ni nimog ideya kon unsaon sila pagtabang. Pananglitan, tingali imong mahibaloan nga ang usa ka edarang magtiayon nagkinahanglag tabang sa paggamit sa JW Library^® app. O tingali imong mahibaloan nga nagplano silang mosangyaw pero wala silay kauban. Puwede ba nimo silang tabangan kon unsaon paggamit ang ilang gadyet o ubanan sila sa pagsangyaw? Makahatag kag maayong ehemplo kon mangita kag mga paagi sa pagtabang sa uban.

ANG MGA TAMBAG NI PABLO MAKATABANG NINYO

12. Sa unsang paagi ang mga batan-ong brader makabenepisyo sa mga tambag ni Pablo kang Timoteo?

¹² Gihatagan ni Pablo si Timoteo ug praktikal nga mga tambag nga makatabang niya nga magmalamposon sa iyang kinabuhi ug ministeryo. (1 Tim. 1:18; 2 Tim. 4:5) Kamong mga batan-ong brader makabenepisyo pod sa mga tambag ni Pablo. Sa unsang paagi? Basaha ang duha ka sulat ni Pablo para kang Timoteo nga mora bag kamo ang iyang gisulatan, ug tan-awa kon unsaon ni ninyo pagpadapat. Konsideraha ang pipila ka pananglitan.

13. Unsay kinahanglan natong himoon aron mas masuod ta kang Jehova?

¹³ “Bansaya ang imong kaugalingon nga ang tumong mao ang pagpakitag debosyon sa Diyos.”  (1 Tim. 4:7b) Unsay kahulogan sa pagpakitag debosyon sa Diyos? Nagpasabot ni nga maningkamot ta nga himoon kon unsay makapalipay kang Jehova aron mas masuod ta kaniya. Wala ta matawo nga naa nay debosyon sa Diyos, maong nagkinahanglan nig paningkamot. Sa unsang paagi? Ang orihinal nga Gregong pulong nga gihubad ug “bansaya ang imong kaugalingon” naghatag ug ideya bahin sa mga atleta nga grabe kaayo ang pagbansay aron mahimo silang andam sa kompetisyon. Nagkinahanglan silag pagpugong sa kaugalingon. Sa samang paagi, nagkinahanglan pod tag pagpugong sa kaugalingon aron mahimo nato ang mga butang nga mas makapasuod nato kang Jehova.

14. Unsay angay natong tumong dihang magbasa tag Bibliya? Paghatag ug pananglitan.

¹⁴ Samtang maningkamot ka nga mabasa ang Bibliya kada adlaw, hinumdomi nga ang imong tumong mao nga mas masuod ka kang Jehova. Pananglitan, unsay imong makat-onan sa panag-estoryahay ni Jesus ug sa dato nga batan-ong magmamando? (Mar. 10:​17-22) Ang batan-on mituo nga si Jesus ang Mesiyas, pero dili pa siya andam nga mahimong iyang sumusunod. Bisan pa niana, si Jesus “mibatig gugma kaniya.” Makapatandog gyod ang paagi ni Jesus sa pagpakig-estorya sa maong batan-on. Gusto niya nga makahimo siyag maayong desisyon. Pinaagi niini, gipakita pod ni Jesus ang gugma ni Jehova sa maong batan-on. (Juan 14:9) Samtang pamalandongon nimo kini nga asoy ug ang imong kahimtang, pangutan-a ang imong kaugalingon, ‘Unsa pay kinahanglan nakong himoon aron mas masuod ko kang Jehova ug mas makaalagad sa uban?’

15. Nganong angayng maningkamot ang usa ka batan-ong brader nga mahimong maayong ehemplo sa uban? Paghatag ug pananglitan. (1 Timoteo 4:​12, 13)

¹⁵ “Magpakita kag maayong ehemplo sa mga matinumanon.” (Basaha ang 1 Timoteo 4:​12, 13.) Gidasig ni Pablo si Timoteo nga mouswag dili lang sa pagbasa ug pagpanudlo, kondili sa pagpakita pod ug maayong mga hiyas sama sa gugma, pagtuo, ug moral nga kahinlo. Ngano? Kay ang maayong ehemplo mas dakog epekto kay sa atong mga pulong. Pananglitan, ibutang ta nga giasayn ka nga mohatag ug pakigpulong aron dasigon ang mga igsoon nga mas magmakugihon sa ministeryo. Mas naa kay kagawasan sa pagsulti bahin niini nga topiko kon gihimo nimo ang imong pinakamaayo sa ministeryo. Ang imong ehemplo makahatag ug dugang gibug-aton sa imong mga pulong.—1 Tim. 3:13.

16. (a) Unsang lima ka bahin nga ang mga batan-ong brader makahatag ug maayong ehemplo? (b) Sa unsang paagi ang usa ka batan-ong brader mahimong maayong ehemplo “sa sinultihan”?

¹⁶ Sa 1 Timoteo 4:​12, gihisgotan ni Pablo ang lima ka bahin diin ang mga batan-ong brader makahatag ug maayong ehemplo. Sa imong personal nga pagtuon, puwede nimong tun-an ang matag usa niini. Ibutang ta nga gusto nimong mahimong maayong ehemplo “sa sinultihan.” Puwede nimong hunahunaon kon sa unsang paagi madasig nimo ang uban pinaagi sa imong sinultihan. Kon nagpuyo ka uban sa imong mga ginikanan, paningkamoti nga ipakita kanunay ang imong apresasyon sa ilang mga gihimo para nimo. Human sa mga tigom, puwede nimong pasalamatan ang naay mga bahin ug sultihi sila kon unsay imong naapresyar sa ilang bahin. Paningkamoti pod nga mohatag ug komento sa imong kaugalingong mga pulong. Ang imong mga paningkamot nga mahimong maayong ehemplo sa sinultihan nagpakita sa imong espirituwal nga pag-uswag.—1 Tim. 4:15.

17. Unsay makatabang sa usa ka batan-ong brader sa pagkab-ot sa iyang espirituwal nga mga tumong? (2 Timoteo 2:22)

¹⁷ “Isalikway ang mga tinguha sa pagkabatan-on, ug paningkamoti nga maugmad ang pagkamatarong.” (Basaha ang 2 Timoteo 2:22.) Gitambagan  ni Pablo si Timoteo nga suklan ang mga tinguha nga makawala sa iyang pokus sa espirituwal nga mga tumong ug makadaot sa iyang relasyon kang Jehova. Tingali nakita nimo nga naay mga kalihokan nga dili man sayop, pero makakuha ni sa imong panahon para sa espirituwal nga mga butang. Pananglitan, basin nahurot na ang imong panahon sa sports, pagsigeg Internet, o pagdulag mga video game. Puwede kaha nimong kuhaan ang imong panahon nianang mga butanga ug gamiton na sa espirituwal nga mga kalihokan? Basin puwede kang makatabang sa pagmentinar sa inyong Kingdom Hall o kaha mag-cart witnessing. Kon imo ning himoon, lagmit madugangan ang imong mga higala nga makatabang nimo sa paghimog espirituwal nga mga tumong ug sa pagkab-ot niana.

ANG PAG-ALAGAD SA UBAN MORESULTAG MGA PANALANGIN

18. Unsang mga panalangin ang nabatonan ni Marcos ug Timoteo?

¹⁸ Si Marcos ug Timoteo naghimog daghang sakripisyo aron bug-os nga makaalagad sa uban, ug tungod ana nakabaton silag daghang panalangin. (Buh. 20:35) Si Marcos nakaabot sa lainlaing lugar aron mag-alagad sa mga igsoon. Nakapribilehiyo pod siya sa pagsulat bahin sa kinabuhi ug ministeryo ni Jesus. Ug si Timoteo mitabang kang Pablo sa pagpormag mga kongregasyon ug sa pagdasig sa mga igsoon. Seguradong nalipay gyod si Jehova kang Marcos ug Timoteo tungod sa mga sakripisyo nga ilang gihimo sa pagtabang sa uban.

19. Nganong angayng ipadapat sa mga batan-ong brader ang mga tambag ni Pablo kang Timoteo, ug unsay mahimong resulta niana?

¹⁹ Sa mga sulat ni Pablo kang Timoteo, makita gyod nato kon unsa ka dako ang iyang gugma para kang Timoteo. Ug kini nga mga sulat nagpakita pod nga gimahal gyod pag-ayo ni Jehova kamong mga batan-ong brader. Gusto niya nga molampos mo. Busa ipadapat ang mga tambag ni Pablo ug ugmara ang tinguha nga mas moalagad pa sa uban. Kon inyo nang himoon, magmalipayon gyod mo sa inyong kinabuhi karon ug “makapangupot pag-ayo sa tinuod nga kinabuhi” sa umaabot.—1 Tim. 6:​18, 19.