1-2. Unsa ang usa ka butang nga importante kang Jehova, ug unsay gusto niya nga atong himoon?

 IMPORTANTE kaayo kang Jehova kon unsaon nato pagtratar ang mga tawo. Si Jesus nagtudlo nga kinahanglan natong higugmaon ang atong isigkatawo sama sa atong kaugalingon. (Mat. 22:​37-39) Nagpasabot na nga pakitaan natog kaayo ang tanan, bisan kadtong wala mag-alagad kang Jehova. Kon ato nang himoon, atong gisundog si Jehova nga Diyos, kinsa “nagpasubang sa iyang adlaw sa mga daotan ug sa mga maayo ug nagpaulan sa mga matarong ug sa mga dili matarong.”—Mat. 5:45.

² Tinuod, gimahal ni Jehova ang tanang tawo, pero mas gimahal niya kadtong naghimo kon unsay husto. (Juan 14:21) Gusto niya nga ato siyang sundogon. Siya nagdasig nato nga batonan ang “init nga gugma” para sa mga igsoon ug ipakita ang ‘inigsoong pagmahal.’ (1 Ped. 4:8; Roma 12:10) Kini nga matang sa gugma parehas pod sa atong bation para sa atong suod nga paryente o higala.

3. Unsay angay natong hinumdoman bahin sa gugma?

³ Ang gugma samag tanom; kinahanglan ning atimanon aron motubo. Si apostol Pablo nagtambag sa mga Kristohanon: “Padayon mo sa pagpakitag inigsoong gugma.” (Heb. 13:1) Gusto ni Jehova nga padayon natong ugmaron ang atong gugma sa uban. Kini nga artikulo maghisgot kon nganong angay tang mas makigsuod sa atong mga igsoon ug kon sa unsang paagi padayon nato nang mahimo.

 KON NGANONG ANGAY TANG MAS MAKIGSUOD SA MGA IGSOON

4. Base sa Salmo 133:​1, unsay makatabang aron dili mawala ang atong apresasyon sa atong panag-igsoonay? (Tan-awa sab ang mga hulagway.)

⁴ Basaha ang Salmo 133:1. Ang salmista misulat nga ‘maayo’ ug ‘makapalipay’ ang pagpakighigala niadtong nahigugma kang Jehova. Ug mouyon gyod ta ana. Pero angay tang mag-amping kay puwedeng mawala ang atong apresasyon sa atong nindot nga panag-igsoonay. Ato nang ikailustrar sa usa ka tawo nga anam-anam nga nawad-ag apresasyon sa usa ka nindot ug dako kaayong kahoy kay pirme niya ning makita. Mao pod nay posibleng mahitabo nato, ilabina kay kanunay natong makita ang mga igsoon kada semana. Unsay makatabang aron dili mawala ang atong apresasyon kanila? Atong hunahunaon kon unsa sila ka bililhon para nato ug sa kongregasyon. Pinaagi niana, mas modako ang atong gugma kanila.

5. Unsay puwedeng mahimong epekto ngadto sa uban dihang makita nila ang atong gugma sa usag usa?

⁵ Ang uban nga mitambong ug tigom sa unang higayon nakadayeg pag-ayo sa gugma nga atong gipakita sa usag usa. Tungod ana, nakaingon sila nga kita gyod ang tinuod nga mga Kristohanon. Si Jesus miingon: “Kon kamo dunay gugma sa usag usa, ang tanan makaila nga kamo akong mga tinun-an.” (Juan 13:35) Konsideraha ang eksperyensiya ni Chaithra, usa ka estudyante sa unibersidad nga nagpa-Bible study sa mga Saksi ni Jehova. Iyang gidawat ang imbitasyon nga motambong ug rehiyonal nga kombensiyon. Human sa unang adlaw sa kombensiyon, iyang giingnan ang nag-Bible study niya: “Wala pa gyod ko sukad magakos sa akong mga ginikanan. Pero sa inyong kombensiyon, nakadawat kog  52 ka gakos sa usa lang ka adlaw! Gibati gyod nako ang gugma ni Jehova pinaagi niining espirituwal nga pamilya. Gusto kong mahimong bahin niini nga pamilya.” Si Chaithra padayong miuswag, ug siya nagpabawtismo niadtong 2024. Oo, dihang makita sa mga interesado ang atong maayong mga buhat, apil ang atong gugma sa usag usa, sagad mapalihok sila sa pag-alagad kang Jehova.—Mat. 5:16.

6. Sa unsang paagi ang pagpakigsuod sa mga igsoon manalipod nato?

⁶ Ang pagpakigsuod sa mga igsoon manalipod nato. Giingnan ni Pablo ang mga Kristohanon: “Padayon mong magdinasigay kada adlaw . . . aron walay bisan kinsa kaninyo nga motig-a ang kasingkasing tungod sa malimbongong gahom sa sala.” (Heb. 3:13) Kon maluya ta ug maligas gikan sa hustong dalan, mahimong gamiton ni Jehova ang usa ka mahigugmaong igsoon aron tabangan ta. (Sal. 73:​2, 17, 23) Mapalig-on gyod ta niana nga pagdasig.

7. Unsay koneksiyon sa gugma ug panaghiusa? (Colosas 3:​13, 14)

⁷ Bahin ta sa usa ka grupo nga naningkamot sa pagpakitag gugma sa usag usa, maong nakabaton tag daghang panalangin. (1 Juan 4:11) Pananglitan, tungod kay gihigugma nato ang usag usa, ‘kinasingkasing ta nga nagpinasayloay,’ ug kana nakaamot sa atong panaghiusa. (Basaha ang Colosas 3:​13, 14; Efe. 4:​2-6) Busa diha sa mga tigom, maeksperyensiyahan nato ang tinuod nga kalipay ug panaghiusa nga wala maeksperyensiyahi sa ubang mga grupo sa tibuok kalibotan.

PASIDUNGGI ANG USAG USA

8. Sa unsang paagi si Jehova nagtabang nato nga magkahiusa?

⁸ Bisag dili ta hingpit, nagkahiusa ta uban sa mga igsoon sa tibuok kalibotan. Talagsaon kaayo na, ug naposible lang na tungod kang Jehova. (1 Cor. 12:25) Ang Bibliya nag-ingon nga ‘gitudloan ta sa Diyos nga maghigugmaay.’ (1 Tes. 4:9) Sa ato pa, pinaagi sa Kasulatan, gisultihan ta ni Jehova kon unsay kinahanglan natong buhaton aron masuod sa usag usa. ‘Matudloan ta’ sa Diyos pinaagi sa pagsusi pag-ayo sa iyang mga gitudlo ug pagpadapat niini. (Heb. 4:12; Sant. 1:25) Ug mao gyod nay gipaningkamotan nga himoon sa mga Saksi ni Jehova.

9. Unsay atong makat-onan sa Roma 12:​9-13 bahin sa pagpasidungog sa usag usa?

⁹ Unsay gitudlo kanato sa Pulong sa Diyos nga makatabang aron masuod ta sa usag usa? Konsideraha ang giingon ni Pablo bahin niini diha sa Roma 12:​9-13. (Basaha.) Matikdi ang mga pulong ni Pablo nga “manguna sa pagpasidungog sa usag usa.” Unsay gipasabot niini? Kinahanglang kitay manguna sa pagpakitag ‘inigsoong pagmahal’ ngadto sa uban, sama sa pagpasaylo, pagkamaabiabihon, ug pagkamahinatagon. (Efe. 4:32) Ayawg hulata nga ang uban maoy mohimog unang lakang sa pagpakigsuod nimo. Puwede kang “manguna” sa paghimo niana. Hinumdomi ang giingon ni Jesus: “Dunay labaw nga kalipay sa paghatag kay sa pagdawat.”—Buh. 20:35.

10. Sa unsang paagi nato mapakita nga makugihon ta “sa pagpasidungog sa usag usa”? (Tan-awa sab ang hulagway.)

¹⁰ Matikdi nga human moingon si Pablo nga angay tang “manguna sa pagpasidungog sa usag usa,” iya tang gidasig nga “magmakugihon, dili magtinapolan.” Ang tawo nga kugihan kasaligan. Kon hatagan siyag buluhaton, iya gyod ning himoon. Ang Proverbio 3:​27, 28 nagdasig nato: “Ayawg ihikaw ang maayo gikan niadtong angay nimong hatagan niini kon makahimo ka sa pagtabang.” Busa dihang makita nato nga naay nanginahanglan  sa atong tabang, molihok dayon ta. Dili ta maglangan sa pagbuhat niana, o kaha maghunahuna nga naa ray laing motabang niya.—1 Juan 3:​17, 18.

11. Unsay makatabang nato aron mas masuod ta sa usag usa?

¹¹ Ang laing paagi nga mapasidunggan nato ang uban mao ang pagpasaylo dayon nila kon makahimo silag sayop. Ang Efeso 4:26 nag-ingon: “Ayaw pasalopi sa adlaw ang inyong kasuko.” Ngano? Kay ang bersikulo 27 nag-ingon nga kon padayon tang masuko, atong ‘gihatagag higayon ang Yawa.’ Sa Bibliya, balikbalik tang gidasig ni Jehova nga magpinasayloay. Ang Colosas 3:13 nag-awhag nato nga ‘padayong magpasaylo nga kinasingkasing.’ Ang usa sa pinakaepektibong paagi nga mas masuod ta sa uban mao ang pagpalabay sa ilang kasaypanan. Kon ato nang himoon, makatabang ta nga “mamentinar ang panaghiusa nga [atong] nabatonan pinaagi sa balaang espiritu.” (Efe. 4:3) Sa ato pa, makaamot ta sa atong panaghiusa ug kalinaw kon magpasaylo ta.

12. Sa unsang paagi si Jehova nagtabang nato nga mahimong mapinasayloon?

¹² Tinuod, malisdan ta usahay nga magpasaylo niadtong mga nakapasakit nato. Pero kaya nato nang himoon sa tabang sa espiritu sa Diyos. Matikdi nga human ta sultihi nga ‘magminahalay samag magsoon’ ug “magmakugihon,” giawhag ta sa Bibliya: “Magmadasigon pinaagi sa balaang espiritu.” (Roma 12:11) Busa ang balaang espiritu sa Diyos makadasig ug makatabang nato nga magpakitag inigsoong pagmahal ug kinasingkasing nga magpasaylo sa usag usa. Maong sinsero natong hangyoon si Jehova nga tabangan ta.—Luc. 11:13.

KAMO “DILI ANGAYNG MAGKABAHINBAHIN”

13. Unsay posibleng makapabahinbahin nato?

¹³ Ang mga igsoon sa kongregasyon managlahig kultura, kagikan, ug kahimtang sa kinabuhi. (1 Tim. 2:​3, 4) Tungod ana, lainlain tag mga gusto o desisyon bahin sa atong sininaan ug panagway, paagi sa pagtambal, o kalingawan. Kon dili ta mag-amping, posible ning  makapabahinbahin nato. (Roma 14:4; 1 Cor. 1:10) Pero kay gitudloan ta sa Diyos nga maghigugmaay, angay tang mag-amping nga dili nato ipamugos ang atong personal nga mga desisyon, nga mora bag mas maayo ni kay sa desisyon sa uban.—Filip. 2:3.

14. Unsay angay natong paningkamotan nga himoon, ug ngano?

¹⁴ Makatabang pod ta nga dili magkabahinbahin ang kongregasyon kon maningkamot ta nga mahimong makapadasig ug makapalig-on sa tanang panahon. (1 Tes. 5:11) Daghan niadtong kaniadto dili aktibo o mga natangtang sa kongregasyon ang mibalik na karon. Malipayon gyod ta sa pagdawat nila! (2 Cor. 2:8) Matikdi ang kasinatian sa usa ka sister nga mibalik ug tambong sa Kingdom Hall human sa 10 ka tuig nga pagkahimong dili aktibo. Siya miingon, “Nalipay sila nga makita ko pag-usab. Ila kong giabiabi ug gikomosta.” (Buh. 3:19) Unsa may epekto niadto kaniya? Siya miingon, “Gibati nako nga gitabangan ko ni Jehova nga magmalipayon pag-usab.” Kon maningkamot ta nga mahimong makapalig-on sa tanan, puwede tang gamiton sa Kristo aron madasig kadtong mga “gikapoy ug nabug-atan.”—Mat. 11:​28, 29.

15. Unsa pay laing paagi nga makaamot ta sa atong panaghiusa? (Tan-awa sab ang hulagway.)

¹⁵ Makaamot pod ta sa atong panaghiusa pinaagi sa atong sinultihan. Ang Job 12:11 nag-ingon:  “Dili ba timbangtimbangon sa dalunggan ang mga pulong ug tilawan sa dila ang pagkaon?” Ang usa ka maayong tigluto motilaw una sa iyang giluto sa dili pa niya kini idalit sa uban. Sa samang paagi, angay natong hunahunaon una ang atong mga pulong sa dili pa nato kini isulti. (Sal. 141:3) Gusto natong seguroon kanunay nga ang atong isulti makapalig-on, makapadasig, ug “makahatag ug kaayohan sa mga namati.”—Efe. 4:29.

16. Kinsay ilabinang angayng maningkamot nga mosulti sa makapalig-on nga paagi?

¹⁶ Ang mga bana ug mga ginikanan ilabinang angayng maningkamot nga mosulti sa makapadasig nga paagi. (Col. 3:​19, 21; Tito 2:4) Ingong mga magbalantay sa panon ni Jehova, ang mga ansiyano pod angayng maningkamot nga lig-onon ug hupayon ang mga igsoon. (Isa. 32:​1, 2; Gal. 6:1) Ang Bibliya nagpahinumdom nato: “Ang pulong nga gisulti sa hustong panahon—maayo gyod kaayo!”—Prov. 15:23.

MAGHIGUGMAAY TA PINAAGI “SA SINSERONG MGA BUHAT”

17. Sa unsang paagi mapakita nato nga sinsero ang atong gugma sa mga igsoon?

¹⁷ Si apostol Juan nagdasig nato nga “maghigugmaay kita, dili lang sa pulong, kondili pinaagi pod sa sinserong mga buhat.” (1 Juan 3:18) Gusto natong kinasingkasing nga higugmaon ang mga igsoon. Busa unsay angay natong himoon? Angay tang mogahin ug dugang panahon uban nila. Pinaagi ana, mas masuod ta sa mga igsoon ug mas molalom ang atong gugma kanila. Maong mangita tag mga paagi nga makauban ang mga igsoon—diha sa tigom ug sa ministeryo. Gawas ana, puwede nato silang duawon sa ilang balay. Kon ato nang himoon, atong gipakita nga atong gituman ang ‘gitudlo sa Diyos nga maghigugmaay ta.’ (1 Tes. 4:9) Ug padayon natong maeksperyensiyahan ang giingon sa Salmo 133:1: “Pagkamaayo ug pagkamakapalipay nga ang mga igsoon nag-uban nga may panaghiusa!”