1-2. (a) Unsay angay natong buhaton aron mas masuod ta sa usa ka tawo? (b) Unsay atong hisgotan niini nga artikulo?

 NAA ba kay suod nga higala? Unsay imong gihimo aron masuod ka niya? Tingali migahin kag panahon uban niya, ug imong nahibaloan ang iyang mga kaagi ug kon unsay iyang gusto ug dili gusto. Imong nakita ang iyang maayo kaayong mga hiyas nga gusto nimong sundogon. Tungod ana, gimahal nimo siya.

² Aron masuod ka sa usa ka tawo, kinahanglan kang mogahin ug panahon uban niya. Mao pod nay angay natong buhaton aron masuod ta kang Jehova nga Diyos. Niini nga artikulo, atong hisgotan kon sa unsang paagi mas masuod ta sa Diyos ug ang mga kaayohan niana. Una, hisgotan nato kon nganong maayo ang pagpakigsuod sa atong kinasuorang Higala, si Jehova.

3. Nganong angay tang mamalandong sa mga kaayohan sa pagpakigsuod kang Jehova? Iilustrar.

³ Seguradong mouyon ka nga maayo gyod ang pagpakigsuod kang Jehova. Pero ang pagpamalandong kon unsa gyoy mga kaayohan niini makapalihok nimo nga padayong makigsuod kaniya. (Sal. 63:​6-8) Pananglitan, nahibalo ta nga ang pagkaon ug sustansiyadong pagkaon, pag-ehersisyo, igong pahulay, ug pag-inom ug daghang tubig makahatag natog kaayohan. Bisan pa ana, daghan ang wala kaayo maghunahuna niining mga butanga, ug ilang gipasagdan ang ilang panglawas. Pero kon atong hunahunaon ang mga kaayohan sa paghimo niini, mas mapalihok ta nga himoon ni nga regular. Sa samang paagi, tingali nahibalo ta nga maayo gyod ang pagpakigsuod kang Jehova, pero  ang pagpamalandong sa mga kaayohan niini mopalihok nato nga padayong makigsuod kaniya.—Sal. 119:​27-30.

4. Sumala sa Salmo 73:​28, unsay gibati sa salmista?

⁴ Basaha ang Salmo 73:28. Ang magsusulat sa Salmo 73 maoy usa ka Levihanon nga nag-alagad ingong musikero sa templo ni Jehova. Tingali taudtaod na siyang matinumanong nag-alagad kang Jehova. Bisan pa niana, iyang gibati nga kinahanglan niyang pahinumdoman ang iyang kaugalingon ug ang uban nga maayo gyod “ang pagduol sa Diyos.” Unsa ang pipila ka kaayohan sa pagduol sa Diyos?

“ANG PAGDUOL SA DIYOS” MAKAPALIPAY NATO

5. (a) Nganong makapalipay nato ang pagduol kang Jehova? (b) Base sa Proverbio 2:​6-16, sa unsang paagi ang kaalam ni Jehova makapanalipod nimo? Paghatag ug pananglitan.

⁵ Kon mas masuod ta kang Jehova, mas magmalipayon gyod ta. (Sal. 65:4) Pananglitan, makabenepisyo ta kon atong ipadapat ang praktikal nga kaalam nga naa sa Pulong sa Diyos, ang Bibliya. Kana nga kaalam manalipod nato gikan sa daotang impluwensiya ug makatabang aron dili ta makahimo ug seryosong mga sala. (Basaha ang Proverbio 2:​6-16.) Haom gyod ang giingon sa Bibliya: “Malipayon ang tawo nga nakakaplag ug kaalam ug ang tawo nga nakabaton ug katakos sa pag-ila.”—Prov. 3:13.

6. Nganong nawad-ag kalipay ang salmista?

⁶ Normal lang nga maguol usahay ang mga higala ni Jehova. Ang magsusulat sa Salmo 73 nawad-ag kalipay dihang nagpadaog siya sa negatibong panghunahuna. Naglagot siya ug nasina sa mga tawong daotan kay bisag wala sila magsunod sa mga sukdanan sa Diyos, morag hayahay ra man hinuon ang ilang kinabuhi. Nagtuo siya nga ang mga tawong bayolente ug mapahitas-on nagkinabuhing haruhay, walay sakit, ug wala gani mag-antos. (Sal. 73:​3-7, 12) Apektado kaayo ang salmista. Gani, nakapangutana siya kon may pulos pa ba ang iyang mga paningkamot sa pag-alagad kang Jehova. Grabe kaayo ang iyang kaguol, maong nakaingon siya: “Kawang lang nga gihuptan nakong putli ang akong kasingkasing ug gihunawan nako ang akong mga kamot aron ipaila nga wala koy sala.”—Sal. 73:13.

7. Unsay makatabang aron dili ta malumsan sa grabeng kaguol? (Tan-awa sab ang hulagway.)

⁷ Bisag naguol ang salmista, wala siya magpadaog sa iyang gibati. Naa siyay gihimo. “Misulod [siya] sa dakong sangtuwaryo sa Diyos,” ug gitabangan siya ni Jehova nga mausab ang iyang panghunahuna. (Sal. 73:​17-19) Ang atong kinasuorang Higala, si Jehova, nahibalo dihang maguol ta. Kon moampo ta niya para sa giya ug kon atong dawaton ang iyang tabang pinaagi sa iyang Pulong ug sa kongregasyon, atong mabatonan ang kusog aron makapadayon ta sa pag-alagad ug dili malumsan sa kaguol. Bisan pag usahay mobati tag grabeng kabalaka, si Jehova maghupay kanato.—Sal. 94:19. a

“ANG PAGDUOL SA DIYOS” MAKAHATAG NATOG KATUYOAN SA KINABUHI UG PAGLAOM

8. Unsa pa ang laing mga kaayohan sa atong pagduol sa Diyos?

⁸ Naa pay duha ka laing rason kon nganong maayo alang kanato ang pagduol sa Diyos. Una, kini maghatag ug katuyoan sa atong kinabuhi. Ikaduha, kini maghatag natog seguradong paglaom para sa umaabot. (Jer. 29:11) Atong hisgotan ug dugang kini nga mga kaayohan.

9. Nganong ang pagpakigsuod kang Jehova makahatag ug katuyoan sa atong kinabuhi?

 ⁹ Ang pagpakigsuod kang Jehova makahatag ug katuyoan sa atong kinabuhi. Karon, daghan ang wala magtuo sa Diyos. Para nila, walay katuyoan ang kinabuhi, ug sa ngadtongadto mangamatay ra ang tanan. Pero sa atong pagtuon sa Pulong sa Diyos, atong nasabtan nga ang Diyos “buhi ug nga siya maoy tigganti sa mga sinserong nangita kaniya.” (Heb. 11:6) Tungod ana, bisan karon pa lang, malipayon na ta kay atong ginahimo ang katuyoan kon nganong gilalang ta—ang pagsimba sa atong langitnong Amahan, si Jehova.—Deut. 10:​12, 13.

10. Base sa Salmo 37:​29, unsay kaugmaon niadtong mga naglaom kang Jehova?

¹⁰ Daghan ang nagtuo nga mao ra ni ang kinabuhi, mao nga nagpokus lang sila sa ilang trabaho, pamilya, ug pagtigom ug kuwarta. Wala silay gilaoman nga nindot nga kaugmaon gikan sa Diyos. Pero lahi ta kanila. Ingong mga alagad ni Jehova, naglaom ta kaniya ug sa iyang mga saad. (Sal. 25:​3-5; 1 Tim. 6:17) Naa tay pagsalig sa atong Diyos ug Higala, ug nahibalo ta nga iya gyong tumanon ang iyang mga saad. Naa pod tay paglaom nga makasimba niya hangtod sa hangtod sa Paraiso.—Basaha ang Salmo 37:29.

11. Unsay atong gibati sa atong pagpakigsuod sa Diyos, ug unsa poy gibati ni Jehova?

¹¹ Daghan pag rason kon nganong maayo gyod ang pagpakigsuod sa Diyos. Pananglitan, si Jehova nagsaad nga iyang pasayloon ang mga sala niadtong mga suod kaniya kon maghinulsol sila. (Isa. 1:18) Tungod ana, dili na ta magsigeg hunahuna ug makonsensiya sa nangagi natong mga sala. (Sal. 32:​1-5) Dugang pa, ang atong pagpakigsuod kang Jehova makapalipay pod niya. (Prov. 23:15) Seguradong naa pa kay laing mahunahunaan nga mga panalangin tungod sa imong suod nga relasyon sa Diyos. Pero unsay imong himoon aron mas masuod pa gyod ka niya?

KON UNSAON NGA MAS MASUOD SA DIYOS

12. Unsa nay imong gihimo aron mas masuod sa Diyos?

¹² Kon bawtismado na ka, daghan na kag gihimo aron masuod kang Jehova. Nagtuon ka bahin kang Jehova nga Diyos ug kang Kristo Jesus, naghinulsol sa nangaging mga sala, nagpakitag dakong pagtuo sa Diyos, ug naningkamot nga magmatinumanon kaniya. Pero aron mas masuod ta sa Diyos, kinahanglang padayon nato ning himoon.—Col. 2:6.

13. Unsa ang tulo ka butang nga makatabang nato nga padayong masuod kang Jehova?

¹³ Unsay makatabang nato aron padayon tang masuod kang Jehova? (1) Kinahanglang padayon natong basahon ug tun-an ang Bibliya. Tumong nato nga dili lang basta makakat-on sa pangunang mga butang bahin sa Diyos. Hinuon, maningkamot ta nga sabton kon unsa ang kabubut-on sa Diyos para nato ug magkinabuhi uyon sa mga prinsipyo sa Bibliya. (Efe. 5:​15-17) (2) Kinahanglang palig-onon nato ang atong pagtuo pinaagi sa pagpamalandong sa daghan kaayong ebidensiya nga gimahal ta niya. (3) Kinahanglang padayon natong dumtan ang mga butang nga makapasuko kang Jehova ug dili ta makigsuod sa mga tawo nga naghimo nianang mga butanga.—Sal. 1:1; 101:3.

14. Base sa 1 Corinto 10:​31, unsa ang mga butang nga puwede natong himoon kada adlaw aron mapalipay nato si Jehova? (Tan-awa sab ang mga hulagway.)

¹⁴ Basaha ang 1 Corinto 10:31. Kinahanglan gyong maningkamot ta sa paghimo sa mga butang nga makapalipay kang Jehova. Mapalipay nato si Jehova dili lang pinaagi sa atong ministeryo ug pagtambong sa mga tigom, kondili pinaagi pod sa maayong mga butang nga  atong ginahimo kada adlaw. Pananglitan, kon matinud-anon ug mahinatagon ta, mapalipay nato si Jehova. (2 Cor. 8:21; 9:7) Gusto pod niya nga pabilhan nato ang regalo nga kinabuhi. Mas masuod ta sa Tinubdan sa kinabuhi kon dili ta magpalabig kaon ug inom ug kon atimanon nato ang atong panglawas sa uban pang paagi. Kon maningkamot ta nga mapalipay si Jehova bisan sa ginagmayng paagi, mas higugmaon pa ta niya.—Luc. 16:10.

15. Unsay gusto ni Jehova nga atong ipakita sa uban?

¹⁵ Si Jehova nagpakitag kaayo sa mga matarong ug dili matarong. (Mat. 5:45) Ug gusto niya nga mao pod nay atong ipakita ngadto sa uban. Pananglitan, “dili [ta] magsultig daotan kang bisan kinsa, dili palaaway, kondili . . . magpakitag kalumo sa tanang tawo.” (Tito 3:2) Mao nga dili nato lantawon ang uban nga mas ubos tungod lang kay lahi silag tinuohan. (2 Tim. 2:​23-25) Mas masuod ta kang Jehova kon magpakita tag kaayo ug konsiderasyon sa tanang tawo.

PABILING SUOD SA DIYOS BISAG MASAYOP KA

16. Human sa taastaas nga panahon sa pag-alagad kang Jehova, unsay gibati sa magsusulat sa Salmo 73?

¹⁶ Usahay, mobati tingali ka nga dili takos sa gugma ni Jehova tungod sa mga sayop nga imong nahimo. Sa nahisgotan na, morag ingon ana pod ang gibati sa magsusulat sa Salmo 73. Siya miingon: “Hapit nang mahisalaag ang akong mga tiil; hapit nang maligas ang akong mga lakang.” (Sal. 73:2) Siya miangkon nga “nagmasulub-on” siya ug nahimong “dili makataronganon,” nga ‘nahisamag walay buot nga mananap’ atubangan kang Jehova. (Sal. 73:​21, 22) Mibati kaha siya nga wala na gyod siyay paglaom ug dili na siya pasayloon ni Jehova tungod sa iyang mga sayop?

17. (a) Bisan pag naguol pag-ayo ang salmista, unsa tingali ang iyang gihimo? (b) Unsay atong makat-onan sa iyang gihimo? (Tan-awa sab ang mga hulagway.)

 ¹⁷ Kon mibati ang salmista nga gisalikway siya ni Jehova, segurado nga wala ra to magdugay. Tingali sa panahon nga guol kaayo siya, naamgohan niya nga kinahanglan siyang moduol sa Diyos, ug makita nato na sa iyang giingon: “Apan karon padayon kong nagauban kanimo [Jehova]; gikuptan nimo ang akong tuong kamot. Gigiyahan ko nimo pinaagi sa imong tambag, ug sa ulahi tultolan ko nimo sa himaya.” (Sal. 73:​23, 24) Sama sa salmista, kinahanglang moduol ta kang Jehova, ang atong lig-ong Bato, dihang mobati tag kaluya o kaguol. (Sal. 73:26; 94:18) Bisan pag maligas ta o masayop, puwede tang mobalik kang Jehova ug makasalig ta nga siya “andam sa pagpasaylo.” (Sal. 86:5) Busa dihang mobati tag grabeng kaguol, ilabinang angay tang maningkamot nga masuod sa atong Diyos.—Sal. 103:​13, 14.

PAKIGSUOD SA DIYOS HANGTOD SA HANGTOD

18. Nganong puwede tang makigsuod kang Jehova hangtod sa hangtod?

¹⁸ Walay limitasyon ang pagpakigsuod kang Jehova. Puwede tang makigsuod niya hangtod sa hangtod ug padayong makakat-on bahin kaniya. Ang Bibliya nag-ingon nga ang paagi, kaalam, ug kahibalo ni Jehova “dili gayod matugkad,” mao nga kada adlaw naa gyod tay makat-onan bahin kaniya.—Roma 11:33.

19. Unsang pasalig ang gihatag kanato sa basahon sa Salmo?

¹⁹ Ang Salmo 79:13 nag-ingon: “Kami, nga imong katawhan ug mga karnero sa imong sibsibanan, magpasalamat kanimo hangtod sa hangtod; ug dayegon ka namo hangtod sa sunodsunod nga kaliwatan.” Kon padayon kang makigsuod sa Diyos, makasalig pod ka nga imong mabatonan ang walay kataposang mga panalangin. Ug makaingon pod ka: “Ang Diyos mao ang bato sa akong kasingkasing ug ang akong bahin hangtod sa hangtod.”—Sal. 73:26.