Ang panumpa maoy “seryoso kaayo ug pormal nga deklarasyon o saad nga himoon ang usa ka butang, nga sagad maghisgot sa Diyos . . . ingong saksi.” Ang panumpa himoon pinaagig pagsulti o pagsulat.

Ang uban maghunahuna tingali nga sayop ang pagpanumpa kay si Jesus miingon: “Ayaw gayod panumpa . . . Himoa ang inyong ‘Oo’ nga oo, ang inyong ‘Dili,’ dili, kay ang kapin niini naggikan sa usa nga daotan.” (Mat. 5:33-37) Siyempre, nahibalo si Jesus nga ang Balaod ni Moises nagsugo sa mga Israelinhon nga manumpa sa pipila ka kahimtang ug nga nanumpa pod ang ubang matinumanong alagad sa Diyos. (Gen. 14:22, 23; Ex. 22:10, 11) Kabalo pod siya nga si Jehova mismo nanumpa. (Heb. 6:13-17) Busa ang giingon ni Jesus wala magpasabot nga dili gyod ta angayng manumpa. Hinuon, ang iyang gisulti maoy pasidaan nga dili nato angayng sayonsayonon ang pagpanumpa. Angay nato ning isipon nga sagrado, maong tumanon gyod nato kon unsay atong isulti.

Busa unsay imong himoon kon papanumpaon ka? Una, paneguroa nga matuman nimo ang imong ipanumpa. Kon dili ka segurado, mas maayo nga dili na lang ka manumpa. Ang Pulong sa Diyos nagpasidaan: “Mas maayo pang dili ka manaad kay sa manaad ka apan dili nimo tumanon.” (Eccl. 5:5) Dayon konsideraha ang mga prinsipyo sa Bibliya nga mapadapat sa maong panumpa, ug paghimog desisyon nga dili makahasol sa imong konsensiya nga nabansay sa Bibliya. Unsay mga pananglitan sa mga prinsipyo sa Bibliya nga angayng konsiderahon?

Ang ubang panumpa dili supak sa kabubut-on sa Diyos. Pananglitan, ang mga Saksi ni Jehova manumpa dihang kaslon sila. Atubangan sa Diyos ug sa mga saksi, ang gikasal manaad nga ilang higugmaon, mahalon, ug tahoron ang usag usa ug himoon nila kana “samtang [silang] duha buhi.” (Lahi tingali nga mga pulong ang gibungat sa ubang magtiayon dihang gikasal sila, pero nanumpa gihapon sila atubangan sa Diyos.) Unya, ipahibalo nga sila magtiayon na, ug ang ilang kaminyoon magpadayon sa tibuok nilang kinabuhi. (Gen. 2:24; 1 Cor. 7:39) Ang panumpa sa kaminyoon haom ug subay sa kabubut-on sa Diyos.

Ang ubang panumpa supak sa kabubut-on sa Diyos. Ang tinuod nga Kristohanon dili mohimo niana nga mga panumpa, sama sa pagpanumpa nga mogamit ug armas sa pagdepensa sa nasod ug sa pagsalikway sa atong pagtuo sa Diyos. Kon ato nang himoon, malapas nato ang mga sugo sa Diyos. Ang mga Kristohanon ‘dili bahin sa kalibotan,’ busa dili ta puwedeng mag-apil-apil sa mga giyera o isyu sa mga nasod.—Juan 15:19; Isa. 2:4; Sant. 1:27.

 Ang ubang panumpa nagdepende sa konsensiya. Usahay, kinahanglan tingali natong timbangtimbangon pag-ayo ang usa ka panumpa base sa tambag ni Jesus nga ‘ibayad kang Cesar ang iya sa Cesar, apan ngadto sa Diyos ang iya sa Diyos.’​—Luc. 20:25.

Pananglitan, ibutang ta nga ang usa ka Kristohanon mag-aplay ug citizenship o passport unya mahibaloan niya nga kinahanglan diay siyang manumpa nga magmaunongon sa nasod. Kon nianang nasora, ang maong panumpa nagpasabot nga manaad siya nga mohimog butang nga supak sa balaod sa Diyos, ang iyang konsensiya nga nabansay sa Bibliya dili motugot nga iya nang himoon. Pero basig tugotan siya sa gobyerno nga usbon ang mga pulong sa panumpa aron dili ni mahimong supak sa iyang konsensiya.

Dihang mausab na ang mga pulong sa panumpa, basin subay na ni sa prinsipyo sa Roma 13:1 nga nag-ingon: “Ang matag tawo kinahanglang magpasakop sa labaw nga mga awtoridad.” Busa ang usa ka Kristohanon modesisyon tingali nga walay sayop kon manumpa siya sa pagbuhat sa usa ka butang nga gisugo sa Diyos nga iyang himoon.

Importante pod nga sundon ang nabansay sa Bibliya nga konsensiya dihang pamostrahon o pagamiton kag usa ka butang samtang manumpa. Ang mga Romano ug Sityanhon sa karaang panahon manumpa gamit ang ilang mga espada, nga naggamit sa simbolo sa ilang diyos sa giyera ingong garantiya nga matinud-anon sila. Ang mga Grego mag-isa sa ilang kamot ngadto sa langit dihang manumpa sila. Ilang giila nga naay diyos nga nakasaksi sa gisulti ug gihimo, kang kinsa manubag ang mga tawo.

Siyempre, ang alagad ni Jehova dili manumpa gamit ang bisan unsang simbolo sa nasod nga konektado sa bakak nga pagsimba. Pero komosta man kon sultihan ka sa korte nga ipatong ang imong kamot sa Bibliya ug papanumpaon nga mohatag ug tinuod nga testimonya? Niana nga kahimtang, tingali imo nang himoon, kay ang Bibliya naghisgot bahin sa matinumanong mga alagad sa Diyos nga nagmostra samtang nanumpa. (Gen. 24:2, 3, 9; 47:29-31) Importanteng hinumdoman nga dihang imo nang himoon, nanumpa ka atubangan sa Diyos nga mosulti ka sa tinuod. Kinahanglan nga tubagon nimo nga matinud-anon ang bisan unsang ipangutana kanimo.

Kay gipabilhan nato ang atong relasyon kang Jehova, angay natong konsiderahon pag-ayo ang bisan unsang panumpa nga ipahimo kanato, ug seguroon nato nga dili ni supak sa atong konsensiya o sa mga prinsipyo sa Bibliya. Kon modesisyon ka nga manumpa, paneguroa nga imo ning tumanon.​—1 Ped. 2:12.