KASAGARAN, ang mga tawo gusto gyong magmalipayon. Pero niining kataposang mga adlaw, kitang tanan nag-atubag mga kalisdanan nga “lisod sagubangon.” (2 Tim. 3:1) Ang inhustisya, sakit, kawalay trabaho, pagbangotan, o ubang hinungdan sa kabalaka ug kaguol mahimong anam-anam nga makapawala sa kalipay sa pipila. Bisan ang mga alagad sa Diyos usahay mahimong madismayar ug anam-anam nga mawad-ag kalipay. Kon nahitabo ni kanimo, unsay imong mahimo aron magmalipayon ka pag-usab?

Aron matubag kana, kinahanglang masabtan unâ nato kon unsa ang tinuod nga kalipay ug kon unsay gihimo sa uban aron magmalipayon bisan pa sa kalisdanan. Dayon, atong makat-onan kon unsay buhaton aron magpabilin tang malipayon ug mas malipayon pa gani.

Atong hinumdoman nga ang kalipay dili lang basta pagsadya o pagmaya. Sa pag-ilustrar: Human makainom ug daghang ilimnon, ang palahubog tingali magsigeg katawa. Pero, dihang mahuwasan na, dili na siya mokatawa, ug tingali mobalik siya sa iyang kinabuhi nga puno sa kaguol ug problema. Ang iyang temporaryong pagmaya dili tinuod nga kalipay.​—Prov. 14:13.

Sa laing bahin, ang kalipay maoy hiyas nga naggikan sa kasingkasing. Kini gihubit ingong “pagbati nga mapukaw tungod sa pagkabaton o pagdahom sa usa ka maayong butang.” Ang usa nga naa nianang hiyasa magpabiling malipayon​—maayo man o dili ang iyang kahimtang. (1 Tes. 1:6) Gani, mahimong matugaw siya bahin sa usa ka butang pero malipayon gihapon siya. Pananglitan, ang mga apostoles gibunalan tungod sa pagsulti bahin kang Kristo. Bisan pa niana, “sila milakaw gikan sa atubangan sa Sanhedrin, nga nagmaya tungod kay giisip sila nga takos pakaulawan tungod sa iyang ngalan.” (Buh. 5:41) Siyempre, wala sila maglipay tungod sa pagbunal kanila. Pero ingong mga alagad sa Diyos, tinuod silang nagmalipayon tungod sa pagpabiling matinumanon Kaniya.

Wala ta matawo nga naa na niana nga kalipay; dili pod ta awtomatikong mahimong ingon ana. Ngano? Tungod kay ang kalipay bahin sa bunga sa balaang espiritu sa Diyos. Sa tabang sa espiritu sa Diyos, bug-os natong maugmad ang “bag-ong pagkatawo,” nga nag-apil sa kalipay. (Efe. 4:24; Gal. 5:22) Ug sa dihang naa ta niana nga kalipay, mas sayon para nato ang pag-atubang sa mga problema sa kinabuhi.

Katuyoan ni Jehova nga molambo ang maayong mga butang sa yuta, dili ang daotang mga butang nga atong makita karon. Bisan pa niana, ang daotang mga buhat wala makapawala sa kalipay ni Jehova. Ang Pulong sa Diyos nag-ingon: “Ang kusog ug kalipay anaa sa iyang dapit.” (1 Cron. 16:27) Dugang pa, ang nabuhat nga maayo sa iyang mga alagad ‘nakapalipay sa kasingkasing’ ni Jehova.​—Prov. 27:11.

Masundog nato si Jehova dihang dili ta sobrang mabalaka kon wala matuman ang atong gidahom. Imbes mawad-ag kalipay, makapokus ta sa maayong mga butang nga naa nato  karon ug mapailobong maghulat sa maayong mga butang sa umaabot. a

Makakita sab tag daghang ehemplo sa mga tawo diha sa Bibliya kinsa nagmalipayon bisan sa lisod nga mga kahimtang. Usa nila si Abraham. Siya nakaagom ug peligrosong mga situwasyon ug kalisdanan nga gipahinabo sa uban. (Gen. 12:10-20; 14:8-16; 16:4, 5; 20:1-18; 21:8, 9) Bisan pa niana, si Abraham nagmalipayon. Sa unsang paagi nahimo niya kana? Klaro diha sa iyang hunahuna ang paglaom nga mabuhi sa bag-ong kalibotan ilalom sa pagmando sa Mesiyas. (Gen. 22:15-18; Heb. 11:10) Si Jesus miingon: “Si Abraham nga inyong amahan nagmaya sa hilabihan sa paglaom nga makita ang akong adlaw.” (Juan 8:56) Masundog nato si Abraham pinaagi sa pagpamalandong sa malipayong kinabuhi sa umaabot.​—Roma 8:21.

Sama kang Abraham, si apostol Pablo ug ang iyang kaubang si Silas nagpokus sa mga saad sa Diyos. Lig-on ang ilang pagtuo, ug nagmalipayon sila bisan pa sa dili maayong mga eksperyensiya. Pananglitan, human makaagom ug sakit nga pagbunal ug pagkapriso, “sa mga tungang gabii [sila] nanag-ampo ug nanagdayeg sa Diyos pinaagig awit.” (Buh. 16:23-25) Gawas nga nalig-on sila tungod sa ilang paglaom, si Pablo ug Silas nagmalipayon kay sila nag-antos tungod sa ngalan ni Kristo. Masundog nato si Pablo ug Silas pinaagi sa paghunahuna sa maayong mga resulta sa matinumanong pag-alagad sa Diyos.​—Filip. 1:12-14.

Karon, daghan sa atong mga igsoon ang maayong ehemplo sa pagpabiling malipayon bisan pa sa kalisdanan. Pananglitan, niadtong Nobyembre 2013, ang Super Typhoon Yolanda miigo sa Visayas, nga nakaguba sa mga balay sa kapig 1,000 ka pamilya nga Saksi. Si George, nga taga-Tacloban City kinsa nawad-ag pinuy-anan tungod sa bagyo, miingon: “Bisan pa sa nahitabo, malipayon ang mga igsoon. Lisod ipahayag ang kalipay nga among gibati.” Dihang makaeksperyensiya tag grabeng kalisdanan, magmalipayon ta kon atong pamalandongon ug apresyahon ang nahimo ni Jehova para nato. Unsa pay gihatag ni Jehova nga makapalipay nato?

Ang kinadak-ang rason kon nganong malipayon ta mao ang atong relasyon sa Diyos. Hunahunaa: Nakaila ta sa Magmamando sa Uniberso. Siya ang atong Amahan, Diyos, ug Higala!​—Sal. 71:17, 18.

Gipabilhan sab nato ang regalo nga kinabuhi ug ang kalipay sa pagkinabuhi. (Eccl. 3:12, 13) Ingong intelihenteng mga linalang nga gikabig ni Jehova, nakasabot ta sa iyang kabubut-on para nato. (Col. 1:9, 10) Busa, may tinuod nga katuyoan ug direksiyon ang atong kinabuhi. Sa laing bahin, ang kadaghanan wala mahibalo sa katuyoan sa kinabuhi. Sa pagpasiugda niana nga kalainan, si Pablo misulat: “‘Ang mata wala makakita ug ang dalunggan wala makadungog, ni misantop sa kasingkasing sa tawo ang mga butang nga giandam sa Diyos alang kanilang nahigugma kaniya.’ Kay kini gipadayag sa Diyos kanato pinaagi sa iyang espiritu.” (1 Cor. 2:9, 10) Dili ba nakapalipay nato ang pagkahibalo sa kabubut-on ug katuyoan ni Jehova?

Konsideraha ang uban pang nahimo ni Jehova para sa iyang katawhan. Dili ba nakapalipay nato nga mahimong mapasaylo ang atong mga sala? (1 Juan 2:12) Tungod sa kaluoy sa Diyos, malaomon ta nga hapit nang moabot ang bag-ong kalibotan. (Roma 12:12) Bisan karon, si Jehova nagtaganag maayong grupo sa mga kaigsoonan. (Sal. 133:1) Ang Pulong sa Diyos nagpasalig usab kanato nga protektahan ni Jehova ang iyang katawhan batok kang Satanas ug sa mga demonyo. (Sal. 91:11) Kon atong pamalandongon kining tanang panalangin sa Diyos, mahimo tang mas malipayon.​—Filip. 4:4.

Ang malipayon ba nga Kristohanon puwede pang mahimong mas malipayon? Si Jesus nag-ingon: “Kining mga butanga akong  gisulti kaninyo, aron ang akong kalipay maanaa kaninyo ug ang inyong kalipay mabug-os.” (Juan 15:11) Dili ba nagpakita kini nga puwede tang mahimong mas malipayon? Ikakomparar nimo ang kalipay sa paghaling ug kalayo. Kinahanglan nimong sugnoran ang kalayo aron mas modilaab ni. Sa susama, kinahanglan nimong pauswagon ang imong espirituwalidad aron mahimong mas malipayon. Hinumdomi: Ang balaang espiritu makatabang nimo nga magmalipayon. Busa, mahimo kang mas malipayon pinaagi sa regular nga pagpangayog tabang sa espiritu ni Jehova ug sa pagpamalandong sa iyang giniyahan sa espiritu nga Pulong.​—Sal. 1:1, 2; Luc. 11:13.

Mahimo pod kang mas malipayon pinaagi sa pagkahimong aktibo sa mga buluhatong makapalipay kang Jehova. (Sal. 35:27; 112:1) Ngano? Tungod kay gilalang ta nga mahimong ‘mahinadlokon sa matuod nga Diyos ug motuman sa iyang mga sugo, kay kini mao ang tibuok nga obligasyon sa tawo.’ (Eccl. 12:13) Sa laing pagkasulti, gidisenyo ta nga buhaton ang kabubut-on sa Diyos. Busa, dihang mag-alagad ta kang Jehova, natural lang nga magmalipayon ta. b

Samtang ugmaron nato ang kalipay nga gikan sa Diyos, matagamtam nato ang uban pang kaayohan. Pananglitan, mahimo tang mas dalawaton sa atong langitnong Amahan samtang malipayon tang nag-alagad kaniya bisan pa sa atong mga problema. (Deut. 16:15; 1 Tes. 5:16-18) Dugang pa, kay tinuod nga malipayon, atong malikayan ang materyalistikong pagkinabuhi ug maningkamot hinuon sa paghimog mas dagkong sakripisyo para sa Gingharian sa Diyos. (Mat. 13:44) Kon makita nato ang maayong mga resulta, kita mahimong mas malipayon, mas mobating mapuslanon, ug makatabang aron mahimong mas malipayon ang uban.​—Buh. 20:35; Filip. 1:3-5.

“Kon malipayon ug tagbaw ka sa imong kinabuhi karon, lagmit mas himsog ka sa umaabot.” Kanay gisulat sa usa ka researcher sa University of Nebraska sa United States human siya magtuon bahin sa kahimsog. Mao pod nay giingon sa Bibliya: “Ang kasingkasing nga malipayon maayo nga tambal.” (Prov. 17:22) Oo, dihang mahimo kang mas malipayon, lagmit mahimo kang mas himsog.

Busa, bisag daghan ang problema karon, maugmad nato ang tinuod ug malungtarong kalipay. Mahimo nato nâ sa tabang sa balaang espiritu pinaagi sa pag-ampo, pagtuon, ug pagpamalandong sa Pulong ni Jehova. Mahimo pod tang mas malipayon pinaagi sa pagpamalandong sa atong mga panalangin, pagsundog sa pagtuo sa uban, ug pagpaningkamot sa pagbuhat sa kabubut-on sa Diyos. Pinaagi niana, maeksperyensiyahan nato ang giingon sa Salmo 64:10: “Ang matarong magamaya diha kang Jehova ug modangop gayod kaniya.”