Laktaw ngadto sa video

Laktaw ngadto sa kaundan

SUGILANON SA KINABUHI

Ang Tanan Posible Kang Jehova

Ang Tanan Posible Kang Jehova

“WALA nay kamatayon, ug bisan ang mga patay mabanhaw.” Nadunggan ni sa akong asawang si Mairambubu samtang nagsakay sa bus. Nainteres siya ug gustong makakat-og dugang. Dihang mihunong ang bus ug nanganaog ang mga pasahero, gigukod niya ang babaye nga nagsulti niana. Siya si Apun Mambetsadykova nga usa ka Saksi ni Jehova. Peligroso ang pagpakig-estorya kaniadto sa mga Saksi, pero ang nahibaloan namo sa ulahi gikan kang Apun nakabag-o sa among kinabuhi.

NAGTRABAHO SUKAD SA KADLAWON HANGTOD SA KILUMKILOM

Natawo ko sa 1937 sa usa ka kolkhoz, o uma nga gidumala sa gobyerno, duol sa Tokmok, Kyrgyzstan. Kyrgyz ang among pamilya ug Kyrgyz ang among pinulongan. Ang akong ginikanan mga trabahador sa uma, ug magtrabaho sila sa kolkhoz sukad sa kadlawon hangtod sa kilumkilom. Ang mga trabahador sa uma regular nga suplayag pagkaon, pero kas-a sa usa ka tuig lang sila suweldoan. Naglisod si Mama sa pag-atiman nako ug sa akong manghod nga babaye. Human sa lima lang ka tuig nga pag-eskuyla, full-time na sab kong nagtrabaho sa kolkhoz.

Kabukiran sa Teskey Ala-Too

Sa among dapit, daghan kaayo ang pobre, ug kinahanglang maghago aron matagan-an ang panginahanglan. Sa batan-on pa ko, wala kaayo ko maghunahuna sa katuyoan sa kinabuhi o sa kaugmaon. Wala gyod ko magdahom nga ang nindot nga mga kamatuoran bahin kang Jehova nga Diyos ug sa iyang katuyoan makabag-o sa akong kinabuhi. Eksayting kaayo ang estorya kon sa unsang paagi ang maong mensahe nakaabot ug mikaylap sa Kyrgyzstan. Nagsugod ni sa among dapit sa amihanang Kyrgyzstan.

KANHING MGA BINIHAG NAGDALA SA KAMATUORAN NGADTO SA KYRGYZSTAN

Ang kamatuoran bahin kang Jehova nagsugod pagturok sa Kyrgyzstan sa katuigan sa 1950. Aron motubo ni, kinahanglang isalikway ang nakagamot nang ideolohiya. Ngano? Ang Kyrgyzstan karon sakop kaniadto sa Union of Soviet Socialist Republics (USSR). Sa tibuok USSR, ang mga Saksi ni Jehova nagpabiling neyutral sa politika. (Juan 18:36) Busa, giisip sila ingong mga kaaway sa Komunistang gobyerno. Pero walay ideolohiya nga makapugong sa Pulong sa Diyos sa pagtandog sa kasingkasing sa matinud-anong mga tawo. Gani, ang usa sa importante kaayong leksiyon nga akong nakat-onan sa tibuok nakong kinabuhi mao kini: Kang Jehova, “ang tanang butang posible.”​—Mar. 10:27.

Si Emil Yantzen

Tungod sa paglutos, midaghan ang mga Saksi ni Jehova sa Kyrgyzstan. Ngano man? Sakop sa USSR ang Siberia, diin gipugos pagdala ang mga kaaway sa gobyerno. Dihang gibuhian ang maong mga binihag, daghan ang namuyo sa Kyrgyzstan, ug dala sa pipila kanila ang kamatuoran. Usa nila si Emil Yantzen, nga natawo sa Kyrgyzstan niadtong 1919. Si Emil gipadala ngadto sa kampo sa pinugos nga pagtrabaho ug nakailailag mga Saksi didto. Gidawat niya ang kamatuoran ug mipauli siya niadtong 1956. Si Emil mipuyo duol sa Sokuluk, nga dili layo sa among lungsod. Sa Sokuluk natukod ang unang kongregasyon sa Kyrgyzstan niadtong 1958.

Si Victor Vinter

Mga usa ka tuig sa ulahi, si Victor Vinter mibalhin sa Sokuluk. Kining matinumanong igsoon daghag naagomang kalisdanan. Kaduha siya naprisog tagtulo ka tuig tungod sa pagpabiling neyutral, dayon napriso na pod siyag 10 ka tuig, ug gipapuyo siya sa Siberia ug lima ka tuig. Bisan pa niana, wala makapugong ang paglutos sa pag-uswag sa matuod nga pagsimba.

NAKAABOT ANG KAMATUORAN SA AMONG LUNGSOD

Si Eduard Varter

Pagka-1963 dihay mga 160 ka Saksi sa Kyrgyzstan, daghan kanila taga-Germany, Ukraine, ug Russia. Apil nila si Eduard Varter, usa ka binihag nga nabawtismohan sa Germany niadtong 1924. Sa katuigan sa 1940, gipadala siya sa mga Nazi sa usa ka kampo konsentrasyon, ug pipila ka tuig sa ulahi, ang mga Komunista sa USSR nagpadala kang Eduard sa Siberia. Pagka-1961 kining matinumanong brader mibalhin sa lungsod sa Kant, nga duol kaayo sa among lungsod.

Si Elizabeth Fot; si Aksamai Sultanalieva

Si Elizabeth Fot, nga usa ka maunongong alagad ni Jehova, nagpuyo sab sa Kant. Sastre siya. Kay maayo kaayo siyang manahi, sa iya magpatahi ang mga propesyonal sama sa mga doktor ug titser. Usa sa iyang mga kustomer si Aksamai Sultanalieva nga asawa sa usa ka opisyal sa piskaliya. Si Aksamai miadto kang Elizabeth aron magpatahi, pero daghan siyag pangutana bahin sa katuyoan sa kinabuhi ug sa kahimtang sa mga patay. Gitubag ni Elizabeth ang iyang mga pangutana gamit ang Bibliya. Si Aksamai nahimong madasigong magsasangyaw sa maayong balita.

Si Nikolai Chimpoesh

Nianang panahona, si Nikolai Chimpoesh, nga taga-Moldova, natudlo nga tigdumala sa sirkito, nga iyang pribilehiyo sulod sa mga 30 ka tuig. Wala lang moduaw si Nikolai ug mga kongregasyon kondili giorganisar sab niya ang pagkopya sa atong literatura gamit ang makina ug pag-apod-apod niana. Nahibaloan sa mga awtoridad ang iyang kalihokan. Busa, gihatagan siya ni Eduard Varter ug makapadasig nga sugyot: “Kon pangutan-on gani ka sa mga awtoridad, sultii sila nga ang literatura gikan sa atong hedkuwarter sa Brooklyn. Tan-aw sa mata sa KGB agent. Wa kay angayng kahadlokan.”​—Mat. 10:19.

Wala madugay human niana, si Nikolai gipatawag sa hedkuwarter sa KGB sa Kant. Giestorya niya ang sunod nga nahitabo: “Nangutana ang agent kon diin gikan ang among literatura. Miingon ko nga sa Brooklyn. Wala siya mahibalo kon unsay itubag. Gipalakaw lang ko niya ug wala na ko ipatawag pag-usab.” Ang maong maisogong mga Saksi padayon ug mainampingong nagpakaylap sa maayong balita sa among dapit sa amihanang Kyrgyzstan. Sa katuigan sa 1980, dihang nakaabot sa among pamilya ang bililhong kamatuoran bahin kang Jehova, ang akong asawang si Mairambubu ang unang nakadungog niana.

NAILA DAYON SA AKONG ASAWA ANG KAMATUORAN

Si Mairambubu taga-Naryn Region sa Kyrgyzstan. Usa ka adlaw niadtong Agosto 1974, mibisita siya sa balay sa akong manghod, diin una ming nagkaila. Nakagusto dayon ko kang Mairambubu. Naminyo mi nianang adlawa mismo.

Si Apun Mambetsadykova

Niadtong Enero 1981, dihang nagsakay si Mairambubu sa bus paingon sa merkado, nadunggan niya ang panag-estoryahay nga gihisgotan sa sinugdan. Gusto sa akong asawa nga mahibalo pag dugang, busa gipangayo niya sa babaye ang ngalan ug adres niini. Miingon ang babaye nga Apun ang iyang ngalan, pero nag-amping siya kay bisan sa katuigan sa 1980, gidili ang buluhaton sa mga Saksi. Imbes ihatag ni Apun ang iyang adres, ang among adres ang iyang gipangayo. Lipay kaayo ang akong asawa pag-uli.

“Nindot kaayo ang akong nadunggan,” matod ni Mairambubu. “Giingnan ko sa usa ka babaye nga sa dili madugay ang mga tawo dili na mamatay. Bisan ang ihalas nga mga mananap mahimo nang anad.” Para nako, morag dili to katuohan. Miingon ko, “Hulaton na lang nato inigduaw niya aron ipatin-aw ang iyang gisulti.”

Si Apun mibisita namo tulo ka bulan sa ulahi. Gisundan kanag dugang mga pagduaw, diin nailaila namo ang pipila sa unang Kyrgyz nga mga Saksi. Gitudloan mi niini nga mga sister sa nindot nga kamatuoran bahin kang Jehova ug sa iyang katuyoan sa katawhan. Gigamit nila ang librong Gikan sa Paraisong Nawala Ngadto sa Paraisong Nabatonan Pag-usab. a Ug kay sa Tokmok usa ra may kopya nianang libroha, amo ning gikinamot pagkopya.

Usa sa una namong nakat-onan mao ang tagna sa Genesis 3:15. Matuman kini pinaagi kang Jesus ingong Mesiyanikong Hari. Importanteng mensahe kana nga angayng mahibaloan sa tanan! Busa, kinahanglan gyod ming moapil sa pagsangyaw. (Mat. 24:14) Wala madugay, anam-anam nga gibag-o sa kamatuoran ang among kinabuhi.

MGA TIGOM UG BAWTISMO BISAG GIDILI ANG BULUHATON

May brader sa Tokmok nga nag-imbitar namo sa usa ka kasal. Namatikdan dayon namo sa akong asawa nga lahi ang mga Saksi. Walay makahubog nga ilimnon sa maong kasal, ug hapsay ang okasyon. Lahi kaayo ni sa ubang kasal nga among natambongan, diin ang mga bisita sagad mangahubog, mohimog dili maayo, ug mamalikas.

Mitambong sab mig pipila ka tigom sa kongregasyon sa Tokmok. Himoon kini sa kakahoyan, kon maayo ang klima. Nahibalo ang mga igsoon nga gipanid-an mi sa mga polis, busa may brader nga magbantay sa palibot. Sa tingtugnaw, magtigom mi diha sa usa ka balay. Pipila ka beses miadto ang mga polis sa maong balay ug nangutana sila kon nag-unsa mi. Dihang nabawtismohan mi ni Mairambubu niadtong Hulyo 1982 sa Chüy River, kinahanglan ming magbantay. (Mat. 10:16) Ang mga igsoon wala magdungag pangabot ug nagtigom sa lasang. Nanganta mig awit sa Gingharian ug namati sa pakigpulong sa bawtismo.

GIPAUSWAG NAMO ANG AMONG MINISTERYO

Niadtong 1987 gihangyo ko sa usa ka brader sa pagduaw sa usa ka interesado nga nagpuyo sa lungsod sa Balykchy. Aron makaabot didto, kinahanglan kong mobiyaheg upat ka oras sa tren. Human sa pipila ka higayon nga pagsangyaw sa Balykchy, daghan mig nakaplagang interesado. Klaro nga kahigayonan kini nga mapauswag ang among ministeryo.

Kami ni Mairambubu mag-adtoan sa Balykchy. Halos kada hinapos sa semana moestar mi didto, mosangyaw, ug magpahigayon ug mga tigom. Daghan ang ganahan sa atong mga publikasyon. Magdala mig mga publikasyon gikan sa Tokmok. Isulod ni namo sa mishok, sako nga gamiton sa pagbiyaheg patatas. Dili paigo ang duha ka sakong literatura kada bulan. Bisan sa tren paingon sa Balykchy ug pauli, makasangyaw mi sa mga pasahero.

Pagka-1995 usa ka kongregasyon ang natukod sa Balykchy​—walo ka tuig human sa among unang pagduaw nianang lungsora. Dakong kantidad ang magasto sa pagngadto nganhi sa Tokmok ug Balykchy. Dili mi dato, pero nganong nahimo to namo? May brader nga tighatagan namog kuwarta aron makasapar sa mga galastohan. Nakita ni Jehova ang among paningkamot sa pagpauswag sa among ministeryo, ug iyang gibuksan kanamo “ang mga ganghaan sa tubig sa kalangitan.” (Mal. 3:10) Tinuod gyod nga ang tanang butang posible kang Jehova!

PULIKI SA PAMILYA UG SA MINISTERYO

Pagka-1992, natudlo ko ingong ansiyano, ang unang Kyrgyz nga ansiyano sa among nasod. Sa among kongregasyon sa Tokmok, nabuksan ang bag-ong mga pribilehiyo sa pag-alagad. Daghan mig giestadihan nga batan-ong Kyrgyz nga nag-eskuyla sa mga vocational school. Usa nila nag-alagad na karon sa Komite sa Sangang Buhatan, ug duha ang espesyal payunir. Naningkamot sab mi sa pagtabang sa uban diha sa mga tigom. Sa unang bahin sa katuigan sa 1990, ang atong mga publikasyon ug mga tigom gihimo diha sa Russian nga pinulongan. Pero nagkadaghan diha sa kongregasyon ang Kyrgyz ug pinulongan. Busa ako ang mag-interpret, nga nakatabang nila nga daling masabtan ang kamatuoran.

Uban sa akong asawa ug walo sa among mga anak, 1989

Puliki sab mi ni Mairambubu sa pag-atiman sa among nagkadako nga pamilya. Iuban namo ang among mga anak sa sangyaw ug sa mga tigom. Ang among anak nga babayeng si Gulsayra​—nga 12 anyos pa niadtong tungora—​ganahang makig-estorya sa mga lumalabay bahin sa Bibliya. Ang among mga anak ganahan sab magmemoryag mga teksto. Niining paagiha, ang among mga anak, ug sa ulahi ang among mga apo, aktibo kaayo sa kongregasyon. Sa 9 ka anak ug 11 ka apo nga buhi pa, 16 ang nag-alagad kang Jehova o tigtambongag mga tigom uban sa ilang ginikanan.

TALAGSAONG MGA KAUSABAN

Ang minahal nga mga igsoon nga nagsugod sa buluhaton ni Jehova sa among dapit sa katuigan sa 1950 matingala sa mga kausaban nga among naeksperyensiyahan. Pananglitan, sukad sa katuigan sa 1990, mas dako na mig kagawasan sa pagsangyaw sa maayong balita ug sa pagpahigayog mga asembliya.

Uban sa akong asawa diha sa ministeryo

Pagka-1991 kami sa akong asawa mitambong sa among unang kombensiyon sa Alma-Ata, karon Almaty, sa Kazakhstan. Ug pagka-1993 ang mga igsoon sa Kyrgyzstan nagpahigayog kombensiyon sa Spartak Stadium sa Bishkek sa unang higayon. Unâ ang kombensiyon, gidangtag usa ka semana ang pagpanglimpiyo sa mga igsoon sa estadyum. Nakadayeg kaayo ang direktor maong wala mi pabayra sa pasilidad.

Pagka-1994 diha na say laing talagsaong hitabo. Ang among mga publikasyon giimprenta na diha sa Kyrgyz nga pinulongan. Karon, usa ka translation team ang regular nga maghubad sa mga literatura ngadto sa Kyrgyz, sa sangang buhatan sa Bishkek. Niadtong 1998, ang buluhaton sa mga Saksi legal nga giila sa Kyrgyzstan. Miuswag ang organisasyon, ug karon kapig 5,000 na ang magmamantala. Karon, duna nay 83 ka kongregasyon ug 25 ka grupo sa Chinese, English, Kyrgyz, Russian, Russian Sign Language, Turkish, Uighur, ug Uzbek. Kining minahal nga mga igsoon nga lainlaig kagikan nagkahiusa sa pag-alagad kang Jehova. Si Jehova ang nagpaposible niining tanang talagsaong kausaban.

Gibag-o sab ni Jehova ang akong kinabuhi. Nagdako ko sa pobre nga pamilya ug nakaeskuyla lag lima ka tuig. Bisan pa niana, gigamit ko ni Jehova sa pag-alagad ingong ansiyano ug sa pagtudlo sa bililhong mga kamatuoran ngadto sa mga tawo nga mas edukado kay kanako. Tinuod gyod nga si Jehova magpaposible nga mahitabo ang talagsaon kaayong mga butang. Ang akong eksperyensiya nagpalihok nako nga magmaunongon sa pagpamatuod bahin kang Jehova, kang kinsa “ang tanang butang posible.”​—Mat. 19:26.

a Giimprenta kaniadto sa mga Saksi ni Jehova.