Minilyong tawo ang nagpadapat sa mga prinsipyo nga gihisgotan sa nag-unang mga artikulo ug milampos sa pagwagtang sa pagkamapihigon sa ilang kasingkasing. Pero ang tinuod, dili nato ni bug-os mawala sa ato lang paningkamot. Busa imposible ba ning mawala?

Ang gobyerno sa tawo wala molampos sa pagwagtang sa pagkamapihigon sa mga tawo. Pero nagpasabot ba ni nga walay gobyerno nga makawagtang sa pagpihigpihig?

Aron bug-os nga mawala ang pagpihigpihig, nagkinahanglan tag gobyerno nga

1. 1. Magpalihok sa mga tawo sa pag-usab sa ilang panghunahuna ug pagbati sa uban.

2. 2. Makawala sa mga kasakit nga maoy hinungdan nga ang mga tawo naglisod sa pagpakitag kaayo sa uban.

3. 3. Ang mga lider niini wala gyoy pagpihigpihig ug nagpabili sa matag sakop niini.

4. 4. Makapahiusa sa mga tawo sa tanang nasod.

Ang Bibliya nagpasalig nato nga ang Diyos naghimog ingon niana nga gobyerno. Gitawag kinig “Gingharian sa Diyos.”​—Lucas 4:43.

Tagda kon unsay himoon niini nga gobyerno.

“Ang mga molupyo sa yuta makakat-on bahin sa pagkamatarong.”​—ISAIAS 26:9.

“Ang resulta sa matuod nga pagkamatarong maoy pakigdait, ug ang bunga sa matuod nga pagkamatarong maoy dumalayong kalinaw ug kasegurohan.”​—ISAIAS 32:17.

Unsay gipasabot niini? Ang Gingharian sa Diyos magtudlo sa mga tawo kon unsay husto. Dihang ang mga tawo makakat-on kon unsay husto ug sayop, mausab ang ilang panglantaw sa uban ug wala nay magpakitag inhustisya. Ang tanan makakat-on nga angayng higugmaon ang tanang klase sa mga tawo.

“Pahiran [sa Diyos] ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.”​—PINADAYAG 21:4.

Unsay gipasabot niini? Wad-on sa Gingharian sa Diyos ang tanang kasakit nga resulta sa inhustisya. Kadtong nakasinatig inhustisya dili na magdumot sa uban.

“Dili siya mohukom sumala sa makita sa iyang mga mata, ug dili siya mobadlong sumala lang sa madungog sa iyang mga dalunggan. Siya maghukom sa mga timawa uban ang pagkamatarong, ug siya magbadlong sa mga maaghop sa yuta uban ang katul-id.”​—ISAIAS 11:3, 4.

Unsay gipasabot niini? Si Jesu-Kristo, ang Hari sa Gingharian sa langit, magmando nga walay pagpihigpihig sa tibuok yuta. Walay nasod nga mas paboran niya, ug seguroon ni Jesus nga ang mga tawo sa tibuok yuta mosunod sa iyang matarong nga mga balaod.

Ang Gingharian sa Diyos magtudlo sa mga tawo sa pagbaton ug parehas nga panghunahuna ug parehas nga gugma. Sila ‘bug-os nga magkahiusa, ug usa ray gihunahuna.’​—FILIPOS 2:2.

Unsay gipasabot niini? Ang panaghiusa sa mga sakop sa Gingharian sa Diyos dili kay panggawas lang. Sila ‘bug-os nga magkahiusa’ kay sila magpakitag tinuod nga gugma sa usag usa.