Laktaw ngadto sa video

Laktaw ngadto sa kaundan

Pagkamapihigon​—Natakdan ba Ka?

Pagkamapihigon​—Natakdan ba Ka?

Ang pagkamapihigon samag virus. Peligroso kini ug dili dayon mamatikdan niadtong natakdan niini.

Daghan ang nagmapihigon dili lang niadtong lahig nasod, rasa, tribo, o pinulongan kondili niadtong lahi pod ug relihiyon, sekso, o kahimtang sa kinabuhi. Hukman sab sa uban ang mga tawo base sa ilang edad, edukasyon, sakit, o hitsura. Pero naghunahuna sila nga dili sila mapihigon.

Posible ba nga natakdan ka sa pagkamapihigon? Sagad dali natong makita ang pagkamapihigon sa uban. Pero dili dayon nato ni mamatikdan sa atong kaugalingon. Ang tinuod kitang tanan dunay pagkamapihigon, namatikdan man nato kini o wala. Dihang ang mga tawo negatibog hunahuna sa usa ka grupo ug dayon naa silay mahibalag nianang grupoha, ang sociology professor nga si David Williams miingon, “lahi ang ilang pagtratar sa maong tawo ug wala sila makaamgo sa ilang gihimo.”

Pananglitan, sa usa ka nasod sa Europe diin nagpuyo si Jovica, dunay gamayng grupo sa mga nitibo. “Nagtuo ko nga walay maayong tawo nianang grupoha,” siya miingon. “Pero para nako wala ko magpihigpihig. Naghunahuna ko, ‘mao man pod nay tinuod.’”

Daghang gobyerno ang naghimog mga balaod aron mapugngan ang pagpihig sa rasa ug ubang klase sa diskriminasyon. Pero nagpadayon ang pagpihigpihig. Ngano? Kay ang maong mga balaod limitado lang sa binuhatan sa mga tawo. Dili kini makapugong sa ilang hunahuna ug pagbati. Ug ang pagpihigpihig magsugod sa hunahuna ug kasingkasing. Nagpasabot ba ni nga dili na mawala ang pagpihigpihig? Duna bay paagi aron mawala kini?

Hisgotan sa mosunod nga mga artikulo ang lima ka prinsipyo nga nakatabang sa daghang tawo nga dili magpihigpihig sa ilang hunahuna ug kasingkasing.