SI Reneé, usa ka sister nga mga 35 anyos, nagdako sa usa ka dasig nga pamilya sa Australia. “Kadaghan mi magbalhinbalhin aron sa pagtabang sa mga dapit diin gikinahanglan pag-ayo ang mga magsasangyaw sa Gingharian,” siya miingon. “Gihimo kana ni Papa ug Mama nga makapainteres, makapahinam, ug makalingaw! Dihang nakabaton na kog duha ka anak, gusto nakong maeksperyensiyahan nila ang maong kinabuhi.”

 Ingon usab niana ang tumong sa bana ni Reneé nga si Shane, nga hapit nang mag-40 anyos. Siya miingon: “Human matawo ang among ikaduhang anak, among nabasa sa Bantayanang Torre ang bahin sa usa ka pamilyang Saksi nga namalhin sa habagatan-kasadpang Pacific sakay sa ilang yate aron mosangyaw sa mga isla sa Tonga. a Tungod niana, misulat mi sa branch office sa mga Saksi ni Jehova sa Australia ug New Zealand sa pagpangutana kon unsang mga dapita ang nagkinahanglan pag-ayo ug mga magsasangyaw sa Gingharian. b Agig tubag, gidapit mi nga mobalhin sa Tonga—ang mismong dapit nga among nabasahan!”

Mga usa ka tuig human sa ilang pagbalhin sa Tonga, si Shane, Reneé, ug ang ilang mga anak, si Jacob ug Skye, napugos pagbalik sa Australia tungod sa sunodsunod nga mga rayot, pero tumong gihapon nila ang pagpalapad sa ilang ministeryo. Sa 2011, sila mibalhin sa Norfolk Island, usa ka gamayng isla sa Pacific nga mga 1,500 ka kilometro sidlakan sa Australia. Unsay resulta? Karon ang ilang 14 anyos nga anak nga si Jacob miingon, “Wala lang mi atimana ni Jehova, kondili gihimo pod niyang makapalipay ang among ministeryo!”

Sama kang Shane, Reneé, ug sa ilang mga anak, daghang pamilyang Saksi ang kinabubut-ong nagtanyag sa ilang kaugalingon aron mag-alagad ingong mga “need greater.” Nganong gihimo nila kana?

Si Burnett ug Simone, magtiayon nga mga 35 anyos, ug ang ilang mga anak nga si Eston ug Caleb, karon 12 ug 9 anyos na, mibalhin sa Burketown, usa ka hilit nga lungsod sa Queensland, Australia. “Makasangyaw lang ang mga Saksi didto matag tulo o upat ka tuig,” miingon si Burnett. “Daghan ang interesado sa maayong balita. Gusto namo silang dumalahan ug regular nga pagtuon sa Bibliya.”

Si Mark ug Karen, nga karon mga 50 anyos na, nag-alagad kaniadto sa pipila ka kongregasyon duol sa Sydney, Australia, sa wala pa sila mobalhin uban sa ilang tulo ka anak, si Jessica, Jim, ug Jack, didto sa Nhulunbuy, usa ka minahan sa Northern Territory. Si Mark miingon: “Ganahan kong motabang, maong gusto nakong moadto sa dapit diin daghan kog mahimo sa kongregasyon ug sa ministeryo.” Apan si Karen nagduhaduha sa pagbalhin. “Pero gidasig ko ni Mark ug sa uban,” matod niya, “mao nga gusto nakong sulayan kana. Karon, nagpasalamat ko nga ako nang gihimo!”

Sa 2011, si Benjamin ug Carolyn ug ang ilang duha ka gagmayng anak nga babaye, si Jade ug Bria, nga nagpuyo sa Queensland, Australia, mibalik sa Timor-Leste, usa ka gamayng nasod sa Timor Island sa kapuloan sa Indonesia. “Kami ni Carolyn mga espesyal payunir kanhi sa Timor-Leste,” miingon si Ben. “Nag-enjoy mi sa pagsangyaw didto, ug ang mga igsoon matinabangon kaayo. Naguol mi pagbiya namo. Pero, determinado ming mobalik. Dihang nangatawo ang among mga anak, wala una namo dayona ang among plano pero gusto gihapon namong mobalik didto.” Si Carolyn midugang: “Gusto namong makauban sa among mga anak ang mga misyonaryo, Bethelite, ug espesyal payunir aron masinati nila ang nindot kaayong mga eksperyensiya sa pag-alagad.”

Giingnan ni Jesus ang iyang mga sumusunod: “Kinsa kaninyo nga buot magtukod ug torre nga dili una molingkod ug kuwentahon ang gasto?” (Luc. 14:28) Sa susama, kon ang usa ka pamilya naghunahunang mobalhin sa laing lugar, kinahanglang planohon nila kinig maayo. Unsay angay nilang konsiderahon?

ESPIRITUWAL: “Gusto namong motabang sa uban ug dili makapabug-at nila,” matod ni Ben. “Busa sa wala pa mi mobalhin, among giseguro nga lig-onon una ang among espirituwalidad. Mas daghang panahon usab ang among gigahin sa ministeryo ug sa ubang buluhaton sa kongregasyon.”

Si Jacob, nga gihisgotan ganina, miingon: “Sa wala pa mi mobalhin sa Norfolk Island, nagbasa mig mga sugilanon sa kinabuhi diha sa Bantayanang Torre ug Pagmata! bahin sa mga pamilya nga nag-alagad  diin gikinahanglan pag-ayo ang mga magsasangyaw. Among gihisgotan ang mga suliran nga ilang giatubang ug kon giunsa sila pag-atiman ni Jehova.” Ang iyang 11 anyos nga igsoon, si Skye, midugang: “Kadaghan ko mag-ampo—nga ako ra ug kauban ni Mama ug Papa!”

EMOSYONAL: Si Reneé miasoy: “Ganahan kaayo ko sa dapit nga among gipuy-an ug duol mi sa mga paryente ug suod nga mga higala, maong nalisdan ko sa pagbiya. Pero imbes magsigeg hunahuna sa akong isakripisyo, akong gihunahuna kon sa unsang paagi ang pagbalhin makabenepisyo sa among pamilya.”

KULTURA: Agig pagpangandam, daghang pamilya ang mag-research una bahin sa lugar nga ilang adtoan. “Nagsige mig basa bahin sa Nhulunbuy,” miingon si Mark. “Ang mga igsoon nga nagpuyo didto nagpadala namog mga mantalaan sa maong lungsod, nga naghatag namog ideya bahin sa mga tawo didto ug sa ilang kultura.”

Si Shane, nga mibalhin sa Norfolk Island, midugang: “Labaw sa tanan, akong gipaningkamotan ang pagpakita sa Kristohanong mga hiyas. Nahibalo ko nga kon ako sinsero, malumo, matinud-anon, ug kugihan, makapasibo ra ko bisan asa.”

Ang malamposong mga “need greater” nag-ingon nga importante ang pagkahimong mapailin-ilinon ug positibo dihang mag-atubang ug wala damhang mga problema. Tagda kini nga mga pananglitan:

Si Reneé miingon: “Nakakat-on ko nga sulayan ang lainlaing paagi sa pagbuhat sa mga butang. Pananglitan, kon dagko ang balod sa Norfolk Island, ang mga barko nga magdalag suplay dili makadunggo ug mahimong monihit ang palaliton ug motaas ang presyo niana. Busa dihang magluto ko, nakakat-on ko sa pagpaigo kon unsay naa.” Ang iyang bana, si Shane, miingon usab: “Dili sab mi magsigeg gasto aron dili mahurot ang among badyet sa tibuok semana.”

Lahi usab ang problema sa ilang anak, si Jacob. “Sa among bag-ong kongregasyon walo ra mi ug ako ray bata. Maong wala koy higala nga parehas nakog edad! Pero dihang miuban ko sa mga hamtong diha sa ministeryo, nasuod dayon ko nila.”

Kini sab ang nasinatian ni Jim, nga karon 21 anyos na. “Ang kinadul-ang kongregasyon sa Nhulunbuy maoy kapig 725 kilometros ang gilay-on, busa pahimuslan gyod namo ang mga asembliya ug mga kombensiyon. Mosayo mig abot aron maestorya ang  mga igsoon. Para namo, importante kaayo ning mga okasyona!”

Ang Bibliya nag-ingon: “Ang panalangin ni Jehova—mao kana ang makapadato.” (Prov. 10:22) Sa tibuok kalibotan, naeksperyensiyahan mismo sa daghang “need greater” nga tinuod kana.

“Ang kinadak-ang panalangin mao ang epekto sa among pagbalhin diha sa among mga anak,” matod ni Mark. “Ang dagko na namong anak masaligon gayod nga si Jehova mag-atiman niadtong nag-una sa Gingharian. Dili nimo kabayrag sapi ang maong pagsalig.”

Si Shane miingon: “Mas nasuod ko sa akong asawa ug mga anak. Malipay kaayo ko dihang madungog nako sila nga mag-estorya kon giunsa sila pag-atiman ni Jehova.” Ang iyang anak, si Jacob, miuyon: “Nag-enjoy gyod ko. Nalipay kaayo ko nga nanganhi mi!”