“Kon mangayo mo sa Amahan ug bisan unsa, kini iyang ihatag kaninyo pinaagi sa akong ngalan.”​—Juan 16:23.

Klarong gipakita sa giingon ni Jesus nga gusto ni Jehova nga mag-ampo ta dili pinaagig mga imahen, santos, anghel, o namatayng mga katigulangan, kondili pinaagi sa ngalan ni Jesu-Kristo. Dihang mag-ampo ta sa Diyos sa ngalan ni Jesus, atong giila ang importanteng papel ni Jesus. “Walay makaadto sa Amahan kon dili pinaagi kanako,” miingon si Jesus.​—Juan 14:6.

“Ibubo ang inyong kasingkasing kaniya.”​—Salmo 62:8.

Dihang mag-ampo ta kang Jehova, isipon nato nga nakig-estorya ta sa usa ka mahigugmaong amahan. Imbes nga basahon o memoryahon ang atong iampo, angay tang makig-estorya kaniya nga matinahoron ug gikan sa kasingkasing.

“Bisan unsay atong pangayoon uyon sa iyang kabubut-on, maminaw siya nato.”​—1 Juan 5:14.

Sa Bibliya, gisulti ni Jehova kon unsay iyang himoon para kanato ug kon unsay gusto niya nga atong himoon para kaniya. Aron dawaton sa Diyos ang atong mga pag-ampo, kinahanglang moampo ta “uyon sa iyang kabubut-on.” Aron mahimo kana, kinahanglang tun-an nato ang Bibliya aron mas mailhan nato siya. Ingong resulta, ang atong mga pag-ampo makapalipay kaniya.

Iampo ang Imong Panginahanglan. Makaampo ta sa Diyos sa atong adlaw-adlawng panginahanglan​—pagkaon, sinina, ug puy-anan. Makaampo sab ta alang sa giya aron makahimog hustong desisyon ug alang sa kusog aron makalahutay sa mga kalisdanan. Puwede tang moampo nga palig-onon ang atong pagtuo ug mangayog kapasayloan ug tabang sa Diyos.​—Lucas 11:3, 4, 13; Santiago 1:5, 17.

Iampo ang Uban. Malipay ang mga ginikanan kon ang ilang mga anak magpakitag gugma sa usag usa. Mga anak ta ni Jehova, ug gusto sab niya nga ang iyang mga anak magpakitag gugma sa usag usa. Busa angay lang nga iampo nato ang atong bana o asawa, mga anak, pamilya, ug mga higala. “Pag-ampo alang sa usag usa,” misulat ang tinun-ang si Santiago.​—Santiago 5:16.

Magpasalamat sa Diyos. Bahin sa atong Maglalalang, ang Bibliya nag-ingon: “[Ang Diyos] naghatag kaninyog ulan gikan sa langit ug mabungahong mga panahon, nga nagbuhong kaninyog pagkaon ug nagpuno sa inyong mga kasingkasing ug kalipay.” (Buhat 14:17) Dihang atong hunahunaon ang tanang gibuhat sa Diyos para kanato, seguradong pasalamatan nato siya sa atong pag-ampo. Siyempre, angay sab natong ipakita ang atong pagkamapasalamaton sa Diyos pinaagi sa atong pagsunod kaniya.​—Colosas 3:15.

Usahay, maguol ta kay wala dayon tubaga ang atong sinserong mga pag-ampo. Nagpasabot ba na nga way pagtagad ang Diyos kanato? Wala. Ipakita sa mosunod nga mga eksperyensiya kon unsa ka importante nga padayon tang mag-ampo.

Si Steve, nga gihisgotan sa nag-unang artikulo miingon, “Kon wala pa ko nagpadayon sa pag-ampo, dugay na kong nawad-ag paglaom sa kinabuhi.” Unsay nakatabang niya nga dili mohunong sa pag-ampo? Nagtuon siya sa Bibliya ug nakat-onan niya nga kinahanglan siyang magpadayon sa pag-ampo. “Gipasalamatan nako ang Diyos sa mahigugmaong suporta nga akong nadawat gikan sa suod nga mga higala,” miingon si Steve. “Mas malipayon na ko karon.”

Komosta si Jenny, kinsa mibati nga dili siya angayng paminawon sa Diyos? Siya miingon, “Dihang mibati ko nga walay pulos, mihangyo ko sa Diyos nga tabangan ko nga makasabot sa akong gibati.” Sa unsang paagi nakatabang niya ang pag-ampo? “Ang pagpakig-estorya sa Diyos nakatabang nako sa pagbaton ug hustong panglantaw sa kaugalingon, nga bisag hukman ko sa akong kasingkasing nahibalo ko nga gimahal ko sa Diyos. Nakatabang sab ni nako nga dili mosurender ug padayong maningkamot.” Unsay resulta? “Pinaagi sa pag-ampo, akong nakita nga si Jehova maoy tinuod ug mahigugmaon nga Diyos, Amahan, ug Higala. Siya andam gyod nga motabang nako basta pirme kong maningkamot nga mosunod niya.”

Tagda sab ang eksperyensiya ni Isabel. Dihang namabdos siya, giingnan siya sa iyang mga doktor nga ang iyang anak matawong baldado. Naguol kaayo siya. Gitambagan pa gani siya sa uban nga magpa-abort. “Mora kog mamatay sa akong grabeng kaguol.” Unsay iyang gihimo? Siya miingon: “Kanunay kong nag-ampo nga tabangan ko sa Diyos.” Sa ulahi, siya nanganak kang Gerard, ug baldado kini. Gibati ba ni Isabel nga gitubag ang iyang mga pag-ampo? Oo. Sa unsang paagi? Si Isabel miingon: “Samtang magtan-aw ko sa akong anak, nga 14 anyos na ug malipayon bisan sa iyang kahimtang, akong nakita nga siya ang pinakanindot nga tubag sa akong mga pag-ampo, ang pinakadakong panalangin nga gihatag ni Jehova nga Diyos kanako.”

Ang mga kasinatian nga sama niana magpahinumdom nato sa giingon sa salmista: “Patalinghogan nimo ang hangyo sa mga maaghop, Oh Jehova. Palig-onon nimo ang ilang kasingkasing ug tagdon sila pag-ayo.” (Salmo 10:17) Kini nagdasig gyod kanato nga magpadayon sa pag-ampo!

Daghan sa mga pag-ampo ni Jesus ang narekord sa Bibliya. Ang pinakailado mao kadtong iyang gitudlo sa iyang mga tinun-an. Unsay atong makat-onan sa maong pag-ampo?