Ang pagkadaotan nagsugod sa yuta dihang gisulti ni Satanas ang unang bakak. Sa sinugdan, siya hingpit nga anghel, apan “siya wala mobarog sa kamatuoran.” (Juan 8:44) Naugmad niya ang tinguha nga simbahon, nga angay lamang sa Diyos. Si Satanas namakak sa unang babaye, si Eva, ug gidani siya nga mosunod kaniya imbes sa Diyos. Si Adan miduyog kang Eva sa pagsupak sa Diyos. Ang desisyon ni Adan miresultag pag-antos ug kamatayon.​—Basaha ang Genesis 3:1-6, 19.

Sa gisulsolan ni Satanas si Eva nga supakon ang Diyos, gisugdan niya ang rebelyon batok sa pagkasoberano sa Diyos, o sa iyang posisyon ingong Labing Hataas. Ang kadaghanang tawo miduyog kang Satanas sa pagsalikway sa Diyos ingong ilang Magmamando. Busa, si Satanas nahimong “magmamando niining kalibotana.”​—Basaha ang Juan 14:30; 1 Juan 5:19.

Hingpit ang tanang buhat sa Diyos. Ang mga tawo ug anghel nga gilalang niya may katakos nga bug-os mosunod kaniya. (Deuteronomio 32:4, 5) Kita gilalang sa Diyos nga may kagawasan sa pagpili sa paghimog maayo o sa paghimog daotan. Ang maong kagawasan naghatag kanatog kahigayonan nga ipakita ang atong gugma sa Diyos.​—Basaha ang Santiago 1:13-15; 1 Juan 5:3.

Sa limitadong panahon, gitugotan ni Jehova ang rebelyon batok sa iyang pagkasoberano. Ngano? Aron ipakita nga ang pagmando nga bulag kaniya  dili makahatag ug kaayohan sa tawo. (Ecclesiastes 7:29; 8:9) Human sa 6,000 ka tuig, klaro ang ebidensiya. Pakyas ang tawhanong mga magmamando sa paghanaw sa gubat, krimen, inhustisya, o sakit.​—Basaha ang Jeremias 10:23; Roma 9:17.

Sukwahi sa tawhanong pagmando, ang pagmando sa Diyos makahatag ug kaayohan niadtong magpasakop niini. (Isaias 48:17, 18) Sa dili madugay, laglagon ni Jehova ang tanang tawhanong gobyerno. Kadto lamang mopili sa pagmando sa Diyos ang makapuyo sa yuta.—Isaias 11:9; Basaha ang Daniel 2:44.

Tan-awa ang video nga Nganong Gitugotan sa Diyos ang Pag-antos?

Nangangkon si Satanas nga ang tawo nag-alagad lang kang Jehova tungod sa kahakog. Gusto ba nimong pamatud-an nga kana bakak? Makahimo ka! Ang pailob sa Diyos naghatag kanatog kahigayonan nga ipakita kon kita ba dapig sa pagmando sa Diyos o sa tawo. Ang atong pagkinabuhi magpaila sa atong gipili.​—Basaha ang Job 1:8-12; Proverbio 27:11.

Makapili ta sa Diyos ingong atong Magmamando pinaagi sa pagkat-on ug pagpakigbahin sa matuod nga pagsimba nga binase sa iyang Pulong, ang Bibliya. (Juan 4:23) Masalikway nato si Satanas ingong magmamando pinaagi sa dili pag-apil sa politika ug gubat sama kang Jesus.​—Basaha ang Juan 17:14.

Pinaagi sa iyang gahom, gipakita ni Satanas nga daw maayo ang imoral ug makadaot nga mga buhat. Kon isalikway nato kana, tingali biaybiayon o supakon ta sa pipila ka higala ug paryente. (1 Pedro 4:3, 4) Busa kinahanglan tang mopili. Makig-uban ba ta sa mga nahigugma sa Diyos? Motuman ba ta sa iyang maalamon ug mahigugmaon nga mga balaod? Kon himoon nato kana, mapamatud-an natong si Satanas namakak sa dihang siya miingon nga ang tawo dili magmasinugtanon sa Diyos kon pit-oson.​—Basaha ang 1 Corinto 6:9, 10; 15:33.

Ang gugma sa Diyos sa tawo maoy garantiya nga mawagtang ang pagkadaotan ug pag-antos. Kadtong nagpakitag pagtuo niini mabuhi sa yuta sa walay kataposan.​—Basaha ang Juan 3:16.