Ang atong Maglalalang mas maalamon kay kanato. Ingong mahigugmaong Amahan, siya nagmahal kanato. Gawas pa, dili niya katuyoan nga kita mag-independente. (Jeremias 10:23) Ingon nga ang bata nagkinahanglag giya sa ginikanan, kitang tanan nagkinahanglag giya sa Diyos. (Isaias 48:17, 18) Ang mga prinsipyo sa Bibliya nagsilbing giya, nga gasa gikan sa Diyos.​—Basaha ang 2 Timoteo 3:16.

Ang mga balaod ug prinsipyo ni Jehova nagtudlo kanato sa kinamaayohang pagkinabuhi karon ug nagpakita kon sa unsang paagi madawat nato ang walay kataposang mga panalangin sa umaabot. Kay ang Diyos maoy naglalang nato, angay lang nga atong pabilhan ang iyang giya.​—Basaha ang Salmo 19:7, 11; Pinadayag 4:11.

Ang mga prinsipyo sa Bibliya maoy pangunang mga kamatuoran, samtang ang mga balaod maoy alang sa espesipikong mga kahimtang. (Deuteronomio 22:8) Angayng gamiton nato ang atong katakos sa panghunahuna sa pagsabot kon unsaon pagpadapat ang usa ka prinsipyo sa usa ka kahimtang. (Proverbio 2:10-12) Pananglitan, ang Bibliya nagtudlo nga ang kinabuhi gasa gikan sa Diyos. Kana nga prinsipyo makagiya kanato diha sa trabahoan, sa balay, ug samtang nagbiyahe. Kana magpalihok usab kanato nga magmaampingon.​—Basaha ang Buhat 17:28.

Si Jesus naghisgot ug duha ka prinsipyo nga labing hinungdanon. Ang unang prinsipyo nagpadayag  sa mismong katuyoan sa kinabuhi sa tawo—ang pag-ila, paghigugma, ug matinumanong pag-alagad sa Diyos. Kini kinahanglang konsiderahon sa tanan natong desisyon. (Proverbio 3:6) Kadtong nagsunod nianang prinsipyoha mahimong higala sa Diyos, makabatog tinuod nga kalipay, ug mabuhi sa walay kataposan.​—Basaha ang Mateo 22:36-38.

Ang ikaduhang prinsipyo makagiya kanato nga magmakigdaiton sa uban. (1 Corinto 13:4-7) Ang pagpadapat niining prinsipyoha naglangkit sa pagsundog sa paagi sa Diyos sa pagtratar sa mga tawo.​—Basaha ang Mateo 7:12; 22:39, 40.

Ang mga prinsipyo sa Bibliya nagtudlo sa mga pamilya kon sa unsang paagi mahiusa sila sa gugma. (Colosas 3:12-14) Aron mapanalipdan usab ang pamilya, ang Pulong sa Diyos nagtudlog laing prinsipyo—nga ang kaminyoon angayng mahangtoron.​—Basaha ang Genesis 2:24.

Ang pagsunod sa mga pagtulon-an sa Bibliya makahatag kanatog materyal ug emosyonal nga kaayohan. Pananglitan, ang mga amo gustog mga trabahanteng nagsunod sa mga prinsipyo sa Bibliya bahin sa kamatinud-anon ug kakugihan. (Proverbio 10:4, 26; Hebreohanon 13:18) Ang Pulong sa Diyos nagtudlo usab kanato nga makontento sa kon unsa ray atong gikinahanglan ug mas pabilhan ang atong relasyon sa Diyos kay sa materyal nga mga butang.​—Basaha ang Mateo 6:24, 25, 33; 1 Timoteo 6:8-10.

Ang pagpadapat sa mga prinsipyo sa Bibliya manalipod sa atong panglawas. (Proverbio 14:30; 22: 24, 25) Pananglitan, ang pagsunod sa balaod sa Diyos nga dili maghuboghubog manalipod kanato batok sa makapatayng mga sakit ug aksidente. (Proverbio 23:20) Si Jehova nagtugot nga kita moinom ug alkoholikong ilimnon apan kasarangan lang. (Salmo 104:15; 1 Corinto 6:10) Makabenepisyo kita sa mga prinsipyo sa Bibliya kay kini nagtudlo kanato nga bantayan dili lang ang atong mga buhat kondili ang atong mga hunahuna usab. (Salmo 119:97-100) Apan, dili lang sa kaugalingong kaayohan nga ang matuod nga mga Kristohanon nagsunod sa mga sukdanan sa Diyos. Sila nagsunod aron pasidunggan si Jehova.​—Basaha ang Mateo 5:14-16.