Laktaw ngadto sa video

Todd Aki/Moment Open via Getty Images

GIDISENYO BA KINI?

Ang Paagi sa Sanga sa Pagsala

Ang Paagi sa Sanga sa Pagsala

 Ang mga sanga (manta ray) mokaon pinaagi sa pagsikop ug tubig sa dagat nga may plankton (gagmayng organismo sa dagat) gamit ang ilang baba samtang kini maglangoy. Ang nasikop niini moagig salaan mao nga ang plankton mobanda paingon sa tilaok sa sanga ug matulon. Ang tubig molahos sa salaan ug ipagawas agi sa hasang sa sanga. Pero ang mga sanga makasala ug plankton nga mas gamay pa sa entrada sa salaan niini. Sumala sa science journalist nga si Ed Yong, kini nga abilidad “morag imposible.”

 Hunahunaa: Ang porma sa salaan sa sanga morag lima ka arko, ug ang matag arko morag sulod nga sudlay. Ang ubang ngipon-ngipon sa sudlay nakaplastar nga nag-atubang ug ang uban nagtalikod. Pinaagi niini nga mga ngipon-ngipon, mabahin ang tubig; ang uban moagi sa ibabaw niini ug ang uban moagi sa tunga sa mga ngipon-ngipon. Ingong resulta, maporma ang gagmayng lilo.

 Dihang ang plankton o ubang pagkaon maigo sa tumoy sa mga ngipon-ngipon, mobanda ni ug maanod sa tubig paingon sa tilaok sa sanga, ug kini matulon. Dunay gagmayng plankton nga masulod ra unta sa tunga sa mga ngipon-ngipon pero tungod sa gagmayng lilo, dili ni masulod. Hinuon, mabanda ni ug maanod paingon sa tilaok sa sanga. Tungod niini nga paagi sa pagsala, makaon sa sanga ang gagmayng pagkaon nga molahos unta sa tunga sa mga ngipon-ngipon ug mabalik sa dagat.

 Dugang pa, dunay kaayohan ang paagi sa sanga sa pagsala ug sa pagkaon. Dili mabara ang salaan niini ug makalimpiyo ni sa kaugalingon, bisag unsa pa ka paspas ang paglangoy sa sanga ug ka daghan sa plankton diha sa tubig.

 Gustong sundogon sa mga researcher ang paagi sa sanga sa pagsala aron makadisenyog mga salaan nga makalimpiyog hugaw nga tubig ug makatangtang sa makadaot nga mga microplastic (gagmay kaayong plastic).

 Unsay imong hunahuna? Ang paagi ba sa sanga sa pagsala resulta sa ebolusyon? O gidisenyo kini?