Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa video

Mga Saksi ni Jehova

Cebuano

MGA BATAN-ON NANGUTANA

Unsaon Nako Pagpakig-estorya sa Akong Ginikanan Bahin sa Ilang mga Balaod Kanako?

Unsaon Nako Pagpakig-estorya sa Akong Ginikanan Bahin sa Ilang mga Balaod Kanako?

Ang gikinahanglan: Maayong paagi sa pagpakigsulti

Ang pagpakigsulti importante kaayo kay kini

  • makatabang sa uban sa pagsabot kanimo.

  • makatabang kanimo sa pagsabot kon nganong wala ka patumani sa imong gusto.

Kon gusto kag kagawasan nga gitagamtam sa mga hamtong, angay lang nga imong tun-an ang maayong paagi sa pagpakigsulti. Unsa kining mga paagiha?

Pagtuon sa pagpugong sa imong pagbati. Importante sa maayong komunikasyon ang pagpugong sa kaugalingon. Ang Bibliya nag-ingon: “Nagpagula ang hungog sa tibuok niyang espiritu, apan siya nga maalamon nagpakalma niini hangtod sa kataposan.”—Proverbio 29:11.

Busa ayaw pagbagulbol, pangluod, pagmanya, paglamba sa pultahan, o pagbundak-bundak sa tiil. Kon mag-iningon ka niini, hatagan ka hinuon ug dugang mga restriksiyon—dili dugang kagawasan.

Sabta ang panglantaw sa imong ginikanan. Pananglitan: Ingnon ta nga gidid-an ka sa imong ginikanan sa pag-adtog parti. Inay makiglalis, pangutan-a sila:

“Mosugot ba mo kon magpauban kog hamtong ug kasaligang higala?”

Tingali ang imong ginikanan dili gihapon mosugot. Apan kon nakasabot ka kon nganong gidid-an ka, makahatag kag laing solusyon aron ila kang tugtan.

Ang pagsunod sa mga balaod sa imong ginikanan susamag pagbayad ug utang sa bangko—kon kasaligan ka, ang bangko mosalig sa pagpautang kanimog mas dako-dakong kantidad

Palig-ona ang pagsalig sa imong ginikanan kanimo. Handurawa ang usa ka tawo nga nakautang ug kuwarta sa bangko. Kon untop sa panahon siya nga mobayad, ang bangko mosalig kaniya ug mahimong pautangon siyag usab.

Sama usab niini sa panimalay. Kinahanglang masaligan ka sa imong ginikanan pinaagi sa imong pagkamasinugtanon. Busa, kon pirme silang mabalo, ayawg katingala kon mawad-an silag pagsalig nimo.

Pero kon imong mapamatud-an nga kasaligan ka—bisan sa gagmayng mga butang—posible nga mosalig sila kanimo.

 

Pagkat-og Dugang

Gisukna sa mga Batan-on, Tomo 1

Alkoholikong ilimnon ug droga, seksuwal nga moralidad, pagpakigdeyt ug pagpakigtrato, pipila lang ni sa mga ulohang gihisgotan.