Laktaw ngadto sa video

Laktaw ngadto sa secondary menu

Mga Saksi ni Jehova

Cebuano

MGA BATAN-ON NANGUTANA

Unsaon Ko Pagkontrolar sa Akong Kasuko?

Unsaon Ko Pagkontrolar sa Akong Kasuko?

 Quiz

  • Ka pila ka masuko?

    • halos dili

    • panagsa ra

    • kada adlaw

  • Unsa ka grabe ka masuko?

    • medyo manginit

    • manginit

    • magbukal-bukal

  • Kang kinsa ka lagmit masuko?

    • ginikanan

    • igsoon

    • higala

Kon problema nimo ang pagkontrolar sa imong kasuko, kini nga artikulo makatabang nimo! Tagda una ang mga rason kon nganong hinungdanong magpabiling kalmado dihang dunay makapasuko nimo.

 Kon nganong angay nimo kining tagdon

Ang imong panglawas. Sumala sa Bibliya, “ang kasingkasing nga anaa sa kalinaw nagahatag ug kinabuhi sa lawas.” (Proberbio 14:30, Ang Biblia Bag-ong Hubad Nga Binisaya) Sa laing bahin, ang Journal of Medicine and Life nag-ingon nga “ang kasuko makahatag ug mga sakit sa kasingkasing.”

Ang imong mga higala. Ang Bibliya nag-ingon: “Ayaw pagpakig-uban kang bisan kinsa nga masuk-anon; ug sa tawo nga daling mosilaob sa kaaligutgot.” (Proverbio 22:24) Busa kon dali ra kang masuko, ayawg kahibulong kon ang mga tawo maglikay kanimo. “Kon dili ka maningkamot sa pagkontrolar sa imong kasuko,” matod pa ni Jasmine, “dili nimo ma-enjoy kon unsa ang tinuod nga panaghigalaay.”

Ang imong dungog. “Kon dili ka makapugong sa imong kasuko,” nag-ingon ang 17 anyos nga si Ethan, “mahibaloan kini sa uban ug madaot ang ilang pagtan-aw kanimo.” Pangutan-a ang imong kaugalingon, ‘Unsay gusto nako nga mailhan ko—kalmado ug dili gustog away o samag bomba nga mobotohay?’ Ang Bibliya nag-ingon: “Siya nga mahinay sa kasuko dagaya sa katakos sa pag-ila [o pagsabot], apan ang walay pailob nagabayaw sa kabuangan.”—Proverbio 14:29.

Walay gustong makig-uban sa tawo nga mosilaob sa kasuko

 Ang imong mahimo

Tagda ang mosunod nga mga teksto ug komento, ug pangutan-a ang imong kaugalingon sa mga pangutana sa ubos niini.

  • Proverbio 29:22: “Ang tawo nga masuk-anon nagapukaw sa panaglalis, ug ang maaligutgoton daghan ug kalapasan.”

    “Sa tin-edyer pa ko, naglisod kog pugong sa akong kasuko. Ang mga paryente nako sa amahan dali sab masuko. Kaliwat gyod namo ni. Maglisod gyod mig pugong sa among kasuko!”—Kerri.

    Dali ba kong masuko? Kon ganahan ko nga dayegon ko sa akong maayong mga hiyas, nan, angay bang ipasangil kining dili maayo nga kinaiya ngadto sa akong kaliwat?

  • Proverbio 15:1: “Ang tubag, kon malumo, makapahilayo sa kaaligutgot, apan ang pulong nga makapasakit makapapukaw sa kasuko.”

    “Ang sekreto mao ang pagtuon sa pagkontrolar sa imong pagbati. Kon imong ugmaron ang malumong personalidad ug hunahunaon ang positibo, dili ka dayon masuko.”—Daryl.

    Dihang mahagit sa kasuko, nganong importanteng bantayan nako ang akong reaksiyon?

  • Proverbio 26:20: “Kon walay sugnod nga kahoy ang kalayo mapalong.”

    “Kon motubag ko nga malumo, kasagaran mokalma ang akong kaestorya ug magkaestoryahay kami nga dili manginit sa kasuko.”—Jasmine.

    Ang ako bang sinultihan o aksiyon lagmit makahaling sa kasuko?

  • Proverbio 22:3: “Maalamon ang tawo nga nakakita sa katalagman ug nagtago sa iyang kaugalingon, apan ang walay kasinatian moagi ug magaantos sa silot.”

    “Usahay mobiya ko aron makapalandong sa nahitabo, ug ayha na ko makighusay kon bugnaw na ang akong ulo.”—Gary.

    Kanus-a ang mas maayong panahon sa pagbiya gikan sa init nga situwasyon nga dili makahatag ug impresyon nga gibalewala nimo ang nasuko kanimo?

  • Santiago 3:2: “Kitang tanan mangapandol sa makadaghan.”

    “Angay natong basolan ang atong kasaypanan, pero angay sab tang makakat-on gikan niini. Kon kita matumba, mobarog gyod ta ug maningkamot nga dili na himoon pag-usab ang kasaypanan.”—Kerri.

Sugyot: Paghimog tumong nga magpabiling kalmado, tingali sa usa ka bulan. Isulat sa diary kon kapila ka nasuko ug susiha ang pag-uswag nga imong nahimo.

Pagkat-og Dugang

PAGMATA!

Kon Unsaon Pagpugong sa Imong Kasuko

Lima ka binase sa Bibliya nga mga lakang nga makatabang nimo sa pagpugong sa imong kasuko.

ANG BANTAYANANG TORRE

Ang Pagsabot Makapahinay sa Kasuko

Ang usa ka hitabo sa kinabuhi ni Haring David sa Israel makatabang nimo sa pagkontrolar sa imong kasuko kon ikaw masilo o maglagot.

TUBAG SA MGA PANGUTANA BAHIN SA BIBLIYA

Tabangan ba Ko sa Diyos Kon Moampo Ko?

Nagtagad ba gayod ang Diyos sa atong mga problema?