Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa video

Mga Saksi ni Jehova

Cebuano

MGA BATAN-ON NANGUTANA

Unsay Angay Nakong Mahibaloan Bahin sa Makahubog nga Ilimnon?

Unsay Angay Nakong Mahibaloan Bahin sa Makahubog nga Ilimnon?

Wala gidili sa Bibliya ang pag-inom ug makahubog nga ilimnon sa igong gidaghanon, kon kini gitugot sa balaod. Pero kini nagdili sa paghuboghubog.Salmo 104:15; 1 Corinto 6:10.

Pero komosta kon mapresyur ka sa pag-inom bisag gidili kini sa balaod o gidid-an ka sa imong mga ginikanan?

  • Hunahunaa ang mga resulta

  • Paghimog desisyon

  • Ang giingon sa ubang batan-on

Hunahunaa ang mga resulta

Ang uban nimong higala tingali naghunahuna nga ang pag-inom ug makahubog nga ilimnon gikinahanglan aron malingaw. Pero unsa kahay resulta human niana?

  • Makasupak sa balaod. Kon moinom kag makahubog nga ilimnon sa mga lugar nga gidili kini, pamultahon ka, kasohan, kuhaag lisensiya, paserbisyohon sa komunidad, o prisohon pa gani.Roma 13:3.

  • Makadaot sa reputasyon. Ang makahubog nga ilimnon makapawalag kontrol sa kaugalingon. Tungod niini, makasulti o makabuhat kag mga butang nga mahayan nimo sa ulahi. (Proverbio 23:31-33) Ang imong ginahimo dakog epekto sa imong reputasyon, ilabina karon nga uso kaayo ang social media.

  • Makapameligro sa kaugalingon. Ang makahubog nga ilimnon makapaduol nimo sa pisikal ug seksuwal nga kapeligrohan. Tungod niini, dali kang maimpluwensiyahan sa uban sa paghimog delikado o ilegal nga mga buhat.

  • Makaadik. Gipakita sa mga pagtuon nga kon nagsugod ka pag-inom samtang bata pa, dakog purohan nga magdepende na lang ka niini. Kon pirme kang moinom dihang naay problema, maguol, o laayon, mas maglisod ka sa pag-undang.

  • Makamatay. Sa miaging mga tuig, ang pagdrayb nga nakainom miresultag usa ka aksidente sa matag 52 minutos didto sa United States. Dihay lima ka tuig diin sa matag tuig, kapig 1,500 ka tawo nga nag-edad ug 21 ang namatay sa aksidente sa motor kay nakainom. Bisag wala ka makainom, mameligro gihapon ka kon nakainom ang nagdrayb sa imong gisakyan.

Paghimog desisyon

Malikayan nimo ang kapeligrohan ug daotang resulta sa sobrang pag-inom kon maghunahuna ka daan kon unsay imong himoon.

Prinsipyo sa Bibliya: “Maalamon ang tawo nga nakakita sa katalagman ug nagtago sa iyang kaugalingon.” (Proverbio 22:3) Kon nakainom, dili maalamon nga magdrayb o makigbahin sa mga kalihokan nga nagkinahanglan ug bug-os nga atensiyon.

Desisyon: ‘Moinom ra ko kon dili supak sa balaod ug naa sa hustong lugar.’

Prinsipyo sa Bibliya: “Kamo mga ulipon niya tungod kay kamo nagasugot kaniya.” (Roma 6:16) Kon ikaw moinom tungod lang kay ang imong mga kauban moinom, gitugotan nimo sila nga kontrolahon ka. Kon moinom ka aron mawala ang imong kalaay o problema, dili ka makakat-on sa pagpangitag paagi aron masulbad kini.

Desisyon: ‘Dili ko mosugot nga presyuron ko sa uban sa pag-inom.’

Prinsipyo sa Bibliya: “Ayaw pagpakig-uban sa mga labihan ka hinginom.” (Proverbio 23:20) Ang dili maayong mga kauban makapahuyang sa imong desisyon. Gipameligro nimo ang imong kaugalingon kon nakig-uban ka sa mga tawong palainom.

Desisyon: ‘Dili ko makig-uban sa mga tawong hilig ug inom.’

Pagkat-og Dugang

Unsay Giingon sa Bibliya Bahin sa Alkoholikong Ilimnon? Sala ba ang Pag-inom Niini?

Ang Bibliya naghisgot nga ang bino ug uban pang alkoholikong ilimnon dunay maayong mga epekto kanato.

Ang Giingon sa Bibliya Bahin sa Alkoholikong Ilimnon

Sayra kon unsang mga prinsipyo sa Bibliya ang makatabang nimo nga makabaton ug balanse nga tinamdan bahin sa alkoholikong ilimnon.