Laktaw ngadto sa video

Laktaw ngadto sa secondary menu

Mga Saksi ni Jehova

Cebuano

MGA BATAN-ON NANGUTANA

Unsay Akong Himoon Aron Mawala ang Akong Kaguol?

Unsay Akong Himoon Aron Mawala ang Akong Kaguol?

“Kon ang akong mga higala naglisod tungod sa ilang problema, tabangan gyod nako sila. Apan wala mahibalo ang uban nga pag-abot nako sa balay maghilak ko sa kuwarto.”—Kellie.

“Kon maguol ko, gusto kong mag-inusara. Kon may mangimbitar nako, mangita dayon kog pasangil. Maayo kong motago sa akong kaguol gikan sa akong pamilya. Abi nilag okey lang ko.”—Rick.

Sama ka bag gibati kang Kellie o Rick? Kon mao, ayaw dayon pag-ingon nga duna kay diperensiya. Ang tinuod, kitang tanan maguol usahay. Bisan ang matinumanong mga lalaki ug babaye sa panahon sa Bibliya mibati niana.—1 Samuel 1:6-8; Salmo 35:14.

Usahay nahibalo ka kon nganong naguol ka; apan may panahon nga wala ka mahibalo. “Maguol ka bisag wala kay problema. Ambot kon ngano, pero dili gyod kana malikayan!” miingon ang 19-anyos nga si Anna.

Bisag unsa pay hinungdan—o bisag walay hinungdan—unsay imong himoon kon maguol kaayo ka? Sulayi kining mosunod:

  1. Ipakigsulti kana. Sa iyang grabeng kaguol, si Job miingon: “Ako mosulti sa kapait sa akong kalag!”—Job 10:1.

    Kellie: Migaan ang akong pamati dihang nasulti nako ang akong problema. Sa kataposan, duna nay nahibalo sa akong giantos. Sila makatunton na nakog pisi sa pagbira nako gikan sa lungag sa kaguol—maluwas na gyod ko!

  2. Isulat kana. Kon maapektohan na sa kaguol ang imong panglantaw sa kinabuhi, mahimo nimong isulat kon unsay naa sa imong hunahuna. Diha sa mga salmo ni David iyang gipahayag usahay ang iyang tumang kaguol. (Salmo 6:6) Kon imo kanang isulat, imong ‘maampingan ang praktikal nga kaalam ug katakos sa panghunahuna.’—Proverbio 3:21.

    Heather: Ang pagsulat sa akong kaguol makatabang nako sa pagpalinaw sa akong hunahuna. Kon mapadayag mo ang imong gibati ug masabtan mo kon nganong ingon ka niana, ang imong kaguol mamenosan.

  3. Iampo kana. Ang Bibliya nag-ingon nga kon iampo nimo ang imong problema, ‘ang kalinaw sa Diyos nga labaw sa tanang panghunahuna magbantay sa imong kasingkasing ug mga gahom sa pangisip.’—Filipos 4:6, 7.

    Esther: Wala ko makasabot kon nganong maguol ko. Miampo ko kang Jehova nga unta tabangan ko niya nga magmalipayon. Gikapoy na ko sa pagsigeg kaguol nga wala man unta koy rason nga maguol. Sa kataposan, nahupayan ko. Dako gyod ug tabang ang pag-ampo!

    Pinaagi sa tabang sa uban ug sa pagpaningkamot, makalingkawas ka gikan sa lawom nga lungag sa kaguol

    Himoang sumbanan ang Salmo 139:23, 24 dihang mag-ampo ka kang Jehova. Ibubo ang imong pagbati ngadto kaniya, ug hangyoa siya nga ipadayag diha kanimo ang hinungdan sa imong kaguol.

Dugang pa sa mga sugyot nga bag-o pang nahisgotan, may makuha kang bililhong tabang diha sa Pulong sa Diyos, ang Bibliya. Ang pagpuno sa imong hunahuna ug makapalig-ong mga estorya sa Bibliya dunay maayong epekto sa imong pagbati.—Salmo 1:1-3.

Kon ang kaguol dili gihapon mawala

“Si Ryan miingon: “Dunay mga buntag nga dili ko ganahang mobangon sa pag-atubang ug lain na usab nga adlaw nga walay kapuslanan.” Siya dunay depresyon, ug daghan ang sama kaniya. Sumala sa surbi, 1 sa 4 ka batan-on nag-antos ug usa ka matang sa depresyon sa dili pa mohamtong.

Unsaon nimo pagkahibalo nga duna kay depresyon? Ang pipila sa mga simtoma niini mao ang kalit nga kausaban sa disposisyon ug batasan, pag-inusara, pagkawala sa interes sa halos bisan unsang butang, dagkong kausaban sa batasan sa pagkaon ug pagkatulog, ug grabeng pagbati nga walay pulos o pagkasad-an.

Siyempre, halos tanan dunay usa o pipila niini nga mga simtoma. Apan kon ang mga simtoma magpabilin ug kapin sa usa ka semana, ipakigsulti kana sa imong ginikanan aron makapakonsulta kag doktor. Siya makatabang nimo sa pagtino kon sakit ba ang hinungdan sa imong kaguol.

Kon duna kay depresyon, ayawg kaulaw. Tungod sa pagpatambal daghan niadtong nag-antos miarang-arang—nga tingali karon pa lang nila nasinati sukad sa taas nga panahon nilang pag-antos. Busa depresyon man o dili ang hinungdan sa imong kaguol, hinumdomi ang makapahupayng mga pulong sa Salmo 34:18: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”

 

Pagkat-og Dugang

PAGMATA!

Nganong Angay Kang Magpabiling Buhi?

Nganong makahunahuna ang usa ka tawo nga higala ang kamatayon?