Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa video

Mga Saksi ni Jehova

Cebuano

Si Jesus ba Namatay sa Krus?

Si Jesus ba Namatay sa Krus?

Tubag sa Bibliya

Daghan ang nag-isip sa krus ingong labing komon nga simbolo sa Kristiyanidad. Apan, ang Bibliya wala maghubit sa instrumento nga diha niana si Jesus namatay, mao nga walay bug-os makatino sa porma niini. Bisan pa niana, ang Bibliya nagpamatuod nga si Jesus namatay, dili sa krus, kondili sa tul-id nga estaka.

Ang Bibliya sagad naggamit sa Gregong pulong nga stau·ros′ dihang magtumong sa instrumento nga diha niana si Jesus gipatay. (Mateo 27:40; Juan 19:17) Bisag sagad kining gihubad nga “krus,” daghang eskolar nagkauyon nga ang pangunang kahulogan niini maoy “tul-id nga estaka.” * Sumala sa A Critical Lexicon and Concordance to the English and Greek New Testament, ang stau·ros′ “wala gayod magkahulogag duha ka pirasong kahoy nga nagkuros.”

Ang Bibliya naggamit usab sa Gregong pulong nga xy′lon ingong sinonimo sa stau·ros′. (Buhat 5:30; 1 Pedro 2:24) Kining pulonga nagkahulogag “troso,” “estaka,” o “kahoy.” * Busa, ang The Companion Bible mihinapos: “Wala ganiy Gregong pulong diha sa B[ag-ong] T[ugon] nga nagpasabot ug duha ka pirasong kahoy.”

Dalawaton ba sa Diyos ang paggamit ug krus diha sa pagsimba?

Ang crux simplex—Latin nga termino alang sa usa ka estaka diin diha ilansang ang kriminal

Bisag unsa pay porma sa instrumento nga diha niana si Jesus namatay, ang mosunod nga mga kamatuoran ug mga teksto sa Bibliya nagpakita nga dili gayod kita angayng mogamit ug krus diha sa pagsimba.

  1. Gisalikway sa Diyos ang pagsimba nga naggamit ug mga imahen o simbolo, lakip na ang krus. Ang Diyos nagsugo sa mga Israelinhon nga dili mogamit ug “dagway sa bisan unsang simbolo” sa ilang pagsimba, ug ang mga Kristohanon gisugo usab sa ‘pagkalagiw gikan sa idolatriya.’—Deuteronomio 4:15-19; 1 Corinto 10:14.

  2. Ang unang-siglong mga Kristohanon wala mogamit ug krus diha sa pagsimba. * Ang mga pagtulon-an ug panig-ingnan sa mga apostoles naghatag ug sumbanan nga angayng sundon sa tanang Kristohanon.—2 Tesalonica 2:15.

  3. Ang paggamit ug krus diha sa pagsimba dunay paganong sinugdanan. * Gatosan ka tuig human sa kamatayon ni Jesus, dihang ang mga simbahan mitipas gikan sa iyang mga pagtulon-an, ang bag-ong mga membro sa simbahan “gitugotan sa paghupot sa ilang paganong mga timaan ug simbolo,” nga naglakip sa krus. (The Expanded Vine’s Expository Dictionary of New Testament Words) Apan, ang Bibliya wala mokonsentir sa pagsagop sa paganong mga simbolo aron makakabig ug bag-ong mga membro.—2 Corinto 6:17.

^ par. 4 Tan-awa ang New Bible Dictionary, Ikatulong Edisyon, nga giedit ni D. R. W. Wood, panid 245; Theological Dictionary of the New Testament, Tomo VII, panid 572; The International Standard Bible Encyclopedia, Rebisadong Edisyon, Tomo 1, panid 825; ug The Imperial Bible-Dictionary, Tomo II, panid 84.

^ par. 5 Tan-awa ang The Expanded Vine’s Expository Dictionary of New Testament Words, panid 1165; A Greek-English Lexicon, ni Liddell ug Scott, Ikasiyam nga Edisyon, panid 1191-1192; ug Theological Dictionary of the New Testament, Tomo V, panid 37.

^ par. 9 Tan-awa ang pulong “Cross” sa Encyclopædia Britannica, 2003; The Cross—Its History and Symbolism, panid 40; ug The Companion Bible, Oxford University Press, apendise 162, panid 186.

^ par. 10 Tan-awa ang The Encyclopedia of Religion, Tomo 4, panid 165; The Encyclopedia Americana, Tomo 8, panid 246; ug Symbols Around Us, panid 205-207.

 

Pagkat-og Dugang

Nganong ang mga Saksi ni Jehova Dili Mogamit ug Krus sa Pagsimba?

Bisag kami mga Kristohanon, kami dili mogamit ug krus sa among pagsimba. Ngano?

Kinsa si Jesu-Kristo?

Sayra kon nganong namatay si Jesus, kon unsa ang lukat, ug kon unsay ginabuhat ni Jesus karon.