Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa video

Mga Saksi ni Jehova

Cebuano

Nagminyo ba si Jesus? Naa ba Siyay mga Igsoon?

Nagminyo ba si Jesus? Naa ba Siyay mga Igsoon?

Tubag sa Bibliya

Tin-awng gipakita sa Bibliya nga walay asawa si Jesus, bisag wala kini espesipikong maghisgot bahin niana. * Tagda ang mosunod.

  1. Ang Bibliya kanunayng naghisgot sa pamilya ni Jesus maingon man sa mga babaye nga nanguban niya sa iyang ministeryo ug nakakita sa dihang siya gipatay. Apan wala kini sukad maghisgot nga siya dunay asawa. (Mateo 12:46, 47; Marcos 3:31, 32; 15:40; Lucas 8:2, 3, 19, 20; Juan 19:25) Ang labing katuohang rason kon nganong wala maghisgot ang Bibliya bahin niini mao nga siya wala gayod magminyo.

  2. Kini ang giingon ni Jesus sa iyang mga tinun-an bahin sa pagpabiling dili minyo aron mas daghan silag panahon sa pag-alagad sa Diyos: “Siya nga makahatag ug luna alang niini [pagpabiling dili minyo] magahatag ug luna niini.” (Mateo 19:10-12) Siya mismo naghatag ug ehemplo para niadtong dili magminyo aron mas makapokus sila sa pag-alagad sa Diyos.—Juan 13:15; 1 Corinto 7:32-38.

  3. Una mamatay si Jesus, giseguro niya nga maatiman ang iyang inahan. (Juan 19:25-27) Kon minyo pa si Jesus o may mga anak, iya pod untang paneguroon nga maatiman sila.

  4. Sa Bibliya, si Jesus gihimong ehemplo para sa mga bana, apan wala kini magtumong sa pagtratar niya ug literal nga asawa. Hinuon, kini nag-ingon: “Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini.” (Efeso 5:25) Kon tinuod pang minyo si Jesus samtang dinhi siya sa yuta, dili ba mas maayo untang gamiton sa teksto ang iyang hingpit nga ehemplo ingong literal nga bana?

Naa bay mga igsoon si Jesus?

Oo, gani dili moubos sa unom ang igsoon ni Jesus. Lakip kanila si Santiago, Jose, Simon, Judas, ug mga duha ka babaye. (Mateo 13:54-56; Marcos 6:3) Sila maoy mga anak gyod ni Jose ug Maria, inahan ni Jesus. (Mateo 1:25) Gitawag sa Bibliya si Jesus nga “panganay” ni Maria, nga nagpakitang naa pa siyay ubang anak.—Lucas 2:7.

Sayop nga pagtuo bahin sa mga igsoon ni Jesus

Aron iduso ang ideya nga si Maria nagpabiling birhen sa tibuok niyang kinabuhi, ang uban naghatag ug lainlaing kahulogan sa terminong “mga igsoon.” Pananglitan, may mga nagtuo nga ang mga igsoon ni Jesus maoy mga anak ni Jose sa unang asawa. Apan gipakita sa Bibliya nga napanunod ni Jesus ang legal nga katungod sa pagkahari nga gisaad kang David. (2 Samuel 7:12, 13; Lucas 1:32) Kon duna pay mga anak si Jose nga mas magulang kang Jesus, ang panganay nila mao untay legal nga manununod ni Jose.

Ang terminong “mga igsoon” nagtumong ba sa mga tinun-an, o espirituwal nga mga igsoon ni Jesus? Kini nga ideya sukwahi sa Kasulatan kay ang Bibliya nag-ingon nga kaniadto “ang iyang mga igsoon wala magpasundayag ug pagtuo kaniya.” (Juan 7:5) Gipakita sa Bibliya nga ang mga igsoon ni Jesus lahi sa iyang mga tinun-an.—Juan 2:12.

Sumala sa laing teoriya, ang mga igsoon ni Jesus nagtumong sa iyang mga ig-agaw. Apan ang Gregong Kasulatan [o, Bag-ong Tugon] naggamit ug espesipikong mga termino para sa “igsoon,” “paryente,” ug “ig-agaw.” (Lucas 21:16; Colosas 4:10) Daghang eskolar sa Bibliya ang mouyon nga ang mga igsoon ni Jesus maoy iya gyong mga igsoon sa unod. Pananglitan, ang The Expositor’s Bible Commentary nag-ingon: “Ang labing natural nga pagsabot sa terminong ‘mga igsoon’ ... mao nga kini nagtumong sa mga anak ni Maria ug Jose, sa ato pa, mga igsoon ni Jesus sa inahan.” *

^ par. 3 Sa Bibliya, si Jesus gitawag nga pamanhonon, apan klarong gipakita sa palibot nga mga teksto nga kini simboliko lamang.—Juan 3:28, 29; 2 Corinto 11:2.

^ par. 13 Tan-awa usab ang The Gospel According to St. Mark, Second Edition, ni Vincent Taylor, panid 249, ug ang A Marginal Jew—Rethinking the Historical Jesus, ni John P. Meier, Tomo 1, panid 331-332.

Pagkat-og Dugang

Kinsa si Jesu-Kristo?

Sayra kon nganong namatay si Jesus, kon unsa ang lukat, ug kon unsay ginabuhat ni Jesus karon.

Kon Nganong Makasalig Ka sa mga Ebanghelyo sa Bibliya

Susiha ang ebidensiya gikan sa karaang mga manuskrito.