Laktaw ngadto sa video

Kanus-a Natawo si Jesus?

Kanus-a Natawo si Jesus?

Tubag sa Bibliya

 Ang Bibliya wala maghisgot ug espesipikong petsa sa pagkatawo ni Jesu-Kristo, ingon sa gipakita niini nga mga reperensiya:

  •   “Wala mahibaloi ang tinuod nga petsa sa pagkatawo ni Kristo.”—New Catholic Encyclopedia.

  •   “Wala mahibaloi ang eksaktong petsa sa pagkatawo ni Kristo.”—Encyclopedia of Early Christianity.

 Bisag ang Bibliya dili direktang nagtubag sa pangutanang, ‘Kanus-a natawo si Jesus?’ kini naghubit sa duha ka panghitabo panahon sa iyang pagkatawo nga mitultol sa daghan sa paghinapos nga wala siya matawo sa Disyembre 25.

Dili sa tingtugnaw

  1.   Ang pagparehistro. Sa hapit nang matawo si Jesus, si Cesar Agusto nagpagula ug mando “nga magparehistro ang tanan sa gipuy-ang yuta.” Ang tanan kinahanglang magparehistro sa “iyang kaugalingong siyudad,” nga lagmit nagkinahanglag usa ka semana o kapin pa nga panaw. (Lucas 2:1-3) Kana nga mando, nga lagmit gihimo aron sa pagpangolektag buhis ug pagreklutag mga sundalo, dili gayod maangayan sa mga tawo sa bisan unsang panahon sa tuig. Ug seguradong dili pasuk-on ug samot ni Agusto ang iyang mga ginsakpan pinaagi sa pagpugos kanila sa paghimog dugay nga panaw panahon sa tingtugnaw.

  2.   Ang mga karnero. Ang mga magbalantay sa karnero “nagpuyo sa gawas ug nagpadayon sa pagbantay sa ilang mga panon sa kahayopan sa kagabhion.” (Lucas 2:8) Ang librong Daily Life in the Time of Jesus nag-ingon nga ang mga karnero anaa ra sa gawas sugod sa “semana una pa sa Paskuwa [ulahing bahin sa Marso]” hangtod sa tunga-tunga sa Nobyembre. Dayon, midugang kini: “Sila magpalabay sa tingtugnaw diha sa mga silonganan; ug bisag base lang niini, atong makita nga ang naandang petsa sa Pasko, panahon sa tingtugnaw, dili gayod husto, kay ang Ebanghelyo nag-ingon nga ang mga magbalantay sa karnero diha sa gawas.”

Sa sayong bahin sa tinghunlak

 Atong mabanabana kon kanus-a natawo si Jesus pinaagi sa pag-ihap ug paatras gikan sa iyang kamatayon sa Paskuwa, Nisan 14 sa tingpamulak sa tuig 33 C.E. (Juan 19:14-16) Si Jesus mga 30 anyos sa dihang nagsugod siya sa iyang tulo ka tuig ug tunga nga ministeryo, busa natawo siya sa sayong bahin sa tinghunlak sa 2 B.C.E.—Lucas 3:23.

Nganong gisaulog ang Pasko sa Disyembre 25?

 Sanglit walay pamatuod nga si Jesu-Kristo natawo sa Disyembre 25, nganong gisaulog man ang Pasko niining petsaha? Ang Encyclopædia Britannica nag-ingon nga ang mga lider sa simbahan lagmit nagpili niana “aron motakdo sa pagano nga Romanhong pista nga nagtimaan sa ‘adlawng-natawhan sa dili-mabuntog nga adlaw,’” atol sa winter solstice. Sumala sa The Encyclopedia Americana, daghang eskolar ang nagtuo nga gihimo kini “aron ang Kristiyanidad mahimong mas makahuloganon alang sa paganong mga kinabig.”