Niadtong Nobyembre 9, 2024, naay wildfire nga misilaob mga duha ka kilometro northwest sa World Headquarters sa mga Saksi ni Jehova sa Warwick, New York, U.S.A. Kini nga wildfire nakasunog nag mga 2,000 ka ektarya nga yuta. Gidahom sa lokal nga mga opisyales nga ang sunog magpadayon hangtod nga moulan sa maong lugar.

Sa pagkakaron, wala pa mameligro ang mga pasilidad sa Bethel sa maong lugar, apil ang Warwick, ang Ramapo construction site, ug ang broadcast studio sa duol nga Tuxedo Park. Pero ang mga igsoon nagpabiling alerto ug mihimog praktikal nga mga paagi aron maproteksiyonan ang pamilyang Bethel ug ang mga pasilidad. (Proverbio 22:3) Si Brader Luke Saladino, nga nag-alagad ingong membro sa Komite sa Sangang Buhatan sa United States, miingon: “Pagsugod sa wildfire, nagtudlo dayon mig mga igsoon nga magbantay sa sunog 24 oras kada adlaw sa Warwick. Nag-asayn pod ug mga Emergency Response Team nga maoy motangtang sa uga nga mga tanom duol sa mga pasilidad, mobisbis sa mga tanom nga naa sa atop sa mga bilding, ug mohimo sa ubang butang sa pagprotektar sa mga bilding. Gidasig pod namo ang mga membro sa pamilyang Bethel sa Warwick nga andamon ang ilang go bag ug mahimong andam nga mobakwet kon gikinahanglan. Pero sa pagkakaron, dili pa kinahanglang mobakwet.”

Ang mga bombero ug emergency crew gikan sa palibot nga mga lugar naningkamot pag-ayo nga dili mokuyanap ang kalayo. Agig pasalamat, giorganisar sa daghang departamento sa Bethel ang pagtaganag pagkaon, tubig, ug ubang suplay para niadtong naningkamot nga mapalong ang wildfire. Si Brader Saladino midugang: “Nagpasalamat mi niining mga lalaki ug babaye nga naghago para namo ug sa among mga silingan niining delikado nga kahimtang.”

Padayon natong iampo nga hatagan ni Jehova ug ‘praktikal nga kaalam ug katakos sa panghunahuna’ kadtong naapektohan niini nga wildfire.—Proverbio 3:21.