DISYEMBRE 11, 2024
RUSSIA

‘Nagbarog Dapig Kang Jehova’

I-PLAY

Niadtong Disyembre 2, 2024, gihukmang sad-an sa Leninskiy District Court sa Kursk si Brader Dmitriy Chausov; iyang asawa, si Sister Oksana Chausova; ug si Brader Nikolay Kupriyanskiy. Si Dmitriy ug Oksana parehong gisentensiyahan ug duha ka tuig ug unom ka bulan nga pagkapriso. Si Nikolay gisentensiyahan ug unom ka tuig nga pagkapriso. Silang tulo gipriso dayon human sa husay.

Mga Profile

Dmitriy Chausov

Natawo: 1988 (Kursk)

Nabawtismohan: 2014

Mubong Impormasyon: Nagtrabaho ingong welder

Naminyo kang Oksana niadtong 2012

Kaso: Pagpakighisgot sa Bibliya ug pagdumalag mga tigom sa mga Saksi ni Jehova

Kapig unom ka bulan sa pretrial detention. Sa kapig siyam ka bulan nga gi-house arrest si Dmitriy, wala siya tugoti nga moipon ug puyo sa iyang asawa

Sentensiya: Duha ka tuig ug unom ka bulan nga pagkapriso

Ang Iyang Giingon

Unsay nakatabang nimo nga makalahutay samtang naa sa pretrial detention center?

Naay brader nga misulat nako ug gitambagan ko niya: “Kon dawaton dayon nimo ang imong bag-ong kahimtang, mas sayon nimo ning maatubang.” Kining nindot nga tambag nakatabang nako nga masabtan nga kinahanglan kong mangitag mga rason aron magmalipayon kada adlaw. Maong nagmatikod ko sa gagmayng mga butang sama sa sidlak sa adlaw diha sa bentana sa selda, tingog sa langgam sa gawas, o bisan sa pahiyom sa mga tawo sa akong palibot. Nakakat-on ko ani nga bisag asa pa ko, naa gyoy mga rason nga magmalipayon. Nagkinahanglag paningkamot ang pagpabiling malipayon, pero importante ni aron makalahutay nga matinumanon.

Oksana Chausova

Natawo: 1986 (Kazakhstan)

Nabawtismohan: 2014

Mubong Impormasyon: Nagtrabaho ingong nail technician

Naminyo kang Dmitriy niadtong 2012

Kaso: Pagpakighisgot sa Bibliya ug pagpakigbahin sa relihiyosong mga tigom sa mga Saksi ni Jehova

Kapig unom ka bulan nga gi-house arrest

Sentensiya: Duha ka tuig ug unom ka bulan nga pagkapriso

Ang Iyang Giingon

Unsay nakatabang nimo nga dili sobrang maluya samtang nag-atubang niining lisod nga situwasyon?

Kay parehas mig kaso sa akong bana, wala mi tugoti nga mag-ipon ug puyo, mag-estorya, o magsinulatay. Aron makaya nako ni, mibasa kog mga estorya sa kinabuhi sa mga igsoon nga nakalahutay sa paglutos sa Nazi Germany ug sa kanhing Soviet Union. Kini nga mga eksperyensiya nagpahinumdom nako nga dili milagrosong sulbaron ni Jehova ang tanan nakong problema. Bisag naa gihapon koy mga problema ug kagul-anan, determinado kong magpokus sa pribilehiyo sa among pamilya nga mobarog dapig kang Jehova ug suportahan ang iyang pagkasoberano. Nakapalipay gyod ni nako.

Nikolay Kupriyanskiy

Natawo: 1967 (Kursk)

Nabawtismohan: 1999

Mubong Impormasyon: Naminyo kang Tatyana niadtong 1986. Naa silay anak nga lalaki ug babaye

Kaso: Pagdumalag mga tigom sa mga Saksi ni Jehova

Halos usa ka tuig ug upat ka bulan nga gi-house arrest

Sentensiya: Unom ka tuig nga pagkapriso

Ang Iyang Giingon

Unsay imong nakat-onan sa ehemplo sa uban?

Pirme kong maghunahuna bahin kang Jose. Samtang napriso siya, ang Bibliya nag-ingon nga “si Jehova padayong nag-uban kang Jose ug nagpakitag maunongong gugma kaniya.” (Genesis 39:21) Masaligon ko nga si Jehova mag-uban pod nako bisan asa pa ko, maong wala koy angayng kahadlokan. Makapadasig pod kaayong makig-estorya niadtong nakaatubang ug mga pagsulay nga sama sa akong naatubang. Ang resulta sa ilang pagtuo nagpahinumdom nako nga importante nga padayong mosalig kang Jehova imbes maningkamot nga mabatonan ang hustisya. Hinaot ang akong eksperyensiya makadasig pod sa uban.

Masaligon ta nga padayong suportahan ni Jehova si Dmitriy, Oksana, ug Nikolay, kay ‘dili niya ihikaw ang bisan unsang maayo gikan niadtong nagalakaw uban ang integridad.’—Salmo 84:11.

Basin Ganahan Pod Ka

TIBUOK KALIBOTANG BALITA

Mga Saksi ni Jehova nga Gipriso Tungod sa Ilang Relihiyon—Matag Lugar

Mga lugar diin gipriso ang mga Saksi ni Jehova, usahay diha sa lisod kaayong mga kahimtang, tungod sa ilang relihiyon ug paglihok subay sa pangunang tawhanong katungod.