Laktaw ngadto sa video

Si Brader Sanderson nga nakig-estorya sa mga boluntaryo ug mga refugee didto sa Poland

MAYO 18, 2022
POLAND

Espesyal nga Pagbisita Para sa mga Boluntaryo ug mga Ukrainian Refugee sa Poland

Espesyal nga Pagbisita Para sa mga Boluntaryo ug mga Ukrainian Refugee sa Poland

Niadtong Dominggo, Mayo 1, 2022, gibisita ni Brader Mark Sanderson sa Nagamandong Lawas sa mga Saksi ni Jehova, kauban ang tulo ka membro sa Branch Committee, ang mga igsoon nga mibakwet sa Ukraine paingon sa Poland. Sa ilang pagbisita, nadunggan ni Brader Sanderson ug sa iyang mga kauban ang naeksperyensiyahan sa mga refugee. Ug ilang gipasaligan sila sa gugma ug suporta sa Nagamandong Lawas.

Gikan sa wala patuo: Si Tomasz Wolczko nga membro sa Branch Committee sa Poland, Mark Sanderson, Vesa Väänänen nga membro sa Branch Committee sa Poland, ug Tommi Kauko nga membro sa Branch Committee sa Finland

Giestoryahan nila duol sa border ang bahin sa paghatag ug hinabang

Sulod sa unom ka adlaw, ang ilang grupo mibiyahe ug kapin sa 2,500 kilometros aron bisitahon ang mga refugee nga naa sa ubang lokasyon. Apil niini ang upat ka Assembly Hall ug pipila ka Kingdom Hall. Nakigkita pod sila sa mga boluntaryo diha sa border sa Poland ug Ukraine.

Usa ka Ukrainian nga brader ang miingon, “Nadasig kaayo mi ug nahupayan sa ilang pagbisita, sama nig bugnaw nga tubig sa init nga panahon.”

“Nasorpresa gyod mi sa ilang pagbisita!” miingon ang usa ka Ukrainian nga sister. “Nakita namo nga gimahal gyod mi ni Jehova.”

Ang laing Ukrainian nga sister miingon, “Pag-abot namo sa Poland, wa gyod mi dala. Pero salamat kang Jehova kay natagan-an ang tanan namong panginahanglan.”

Grupo sa mga drayber ug ubang boluntaryo sa gawas sa Assembly Hall sa Stęszew, Poland

Gibisita pod sa grupo ang mga boluntaryo nga mitabang sa mga refugee. Gipaabot ni Brader Sanderson ang gugma sa Nagamandong Lawas kanila pinaagi sa paghisgot sa Hebreohanon 6:10 ug sa pagpahinumdom kanila nga ‘dili kalimtan ni Jehova ang ilang buhat.’ Midugang sab siya, “Dili pod mi malimot.” Ang mga boluntaryo miingon nga nalipay sila nga makatabang sa ilang mga igsoon.

Edarang mga sister nga gikan sa Ukraine gibisita diha sa gawas sa Kingdom Hall sa Radymno, Poland

Si Brader Vesa Väänänen, membro sa Branch Committee sa Poland, miingon: “Makapalig-on gyod nga makita nga kontrolado ni Jehova ang mga butang. Gitagana ni Jehova kon unsa gyoy gikinahanglan sa eksaktong panahon pinaagi sa giya sa Nagamandong Lawas ug sa mga igsoon nga andam motabang.”

Mga boluntaryo sa Assembly Hall sa Stęszew, Poland, diin giandam ang mga hinabang

Samtang giatiman sa atong mga igsoon ang panginahanglan sa usag usa, bisan pa sa ilang kahimtang, gibati nila ang kalipay sa paghatag nga gisaad ni Jesus.—Buhat 20:35.