Ang International Mother Language Conference and Festival maoy usa ka academic conference nga giapilan sa mga educator, international policy maker, researcher, ug mga eskolar gikan sa 12 ka nasod. Gihimo ni pinaagig videoconference sugod sa Pebrero 21 hangtod Marso 20, 2021. Ang tsirman sa conference nga si Dr. Ricardo Ma. Nolasco gikan sa Department of Linguistics sa University of the Philippines Diliman nag-imbitar ug mga representante gikan sa sangang buhatan sa Pilipinas nga moapil sa maong conference. Niadtong Marso 9, 2021, si Brader Elnathan Lee ug Israel Aves, nga mga maghuhubad, naghatag ug mga presentasyon bahin sa buluhatong paghubad sa mga Saksi ni Jehova. Kini nga conference gitambongan online sa 320 ka tawo.

Sumala kang Dr. Ricardo Ma. Nolasco, gipakita sa usa ka surbi sa Pilipinas nga Bibliya ang pinakapopular nga basahon gawas sa mga textbook sa eskuwelahan. Haom gyod niini ang tema sa usa ka sesyon sa conference nga nag-ulohang “Bible Translation in Philippine Languages.” Kini nga tema ang gihisgotan sa atong mga igsoon.

Gipresentar ni Brader Aves ang tema nga “Tukma, Daling Basahon, o Parehas? Lumad nga mga Pinulongan ug ang Kalisdanan sa Paghubad sa Bibliya.” Iyang gipatin-aw kon sa unsang paagi giseguro sa mga maghuhubad sa Bag-ong Kalibotang Hubad sa Balaang Kasulatan (NWT) nga ang hubad tukma ug daling basahon. Si Brader Aves miingon: “Kay ang ilang pangunang tumong mao ang pagtudlo bahin sa Bibliya, gipaningkamotan sa mga Saksi ni Jehova nga ang NWT mabatonan bisan sa mga pinulongan nga dili kaayo daghan ang nagsulti. Libre ning mabatonan online o sa hard copy diha sa lokal nga mga kongregasyon sa mga Saksi ni Jehova, ug inyo mismong makita nga tukma ug daling basahon ni nga hubad sa Pulong sa Diyos.”

Gihisgotan usab ni Brader Lee ang kadako sa buluhatong pagpanghubad nga gihimo sa mga Saksi ni Jehova sa iyang presentasyon nga nag-ulohang “Pagtigom sa Katawhan sa Tanang Nasod ug Pinulongan: Ang Tibuok Kalibotang Buluhatong Pagpanghubad sa mga Saksi ni Jehova.” Siya miingon nga kapig 6,000 ka maghuhubad ug uban pang boluntaryo ang nagsuportar niini nga buluhaton. Giasoy niya ang kasaysayan sa atong buluhatong paghubad gikan sa pagsugod niini niadtong mga tuig 1890 hangtod karon, ug kon sa unsang paagi kini miuswag. Gihisgotan niya nga niadtong Nobyembre 2019, ang jw.org—ang website nga nahubad sa kinadaghanang pinulongan sa tibuok kalibotan—aduna nay impormasyon nga nahubad sa 1,000 ka pinulongan.

Sa iyang konklusyon, si Brader Lee miingon: “Giisip sa mga maghuhubad sa mga publikasyon sa mga Saksi ni Jehova nga serbisyo publiko ang ilang trabaho. Tumong nila mao nga makahimo silag hubad nga daling masabtan, ma-enjoy sa tanan sa tibuok kalibotan, ug nga kini makatudlo ug makadasig.”

Nalipay ta niini nga kahigayonan nga nahatagan natog impormasyon ang uban bahin sa atong buluhatong paghubad. Nagpamatuod ni nga ang maayong balita ginasangyaw “ngadto sa matag nasod ug tribo ug pinulongan.”—Pinadayag 14:6.