Sugod Septiyembre 30 hangtod Nobyembre 3, 2024, ang mga Saksi ni Jehova gikan sa lima ka lugar miapil sa special preaching campaign sa isla nga nasod sa Malta. Miduyog sila sa 870 ka lokal nga mga igsoon aron isangyaw ang maayong balita sa English, Italian, Maltese, ug Tagalog. Panahon sa campaign, 174 ang mihangyo ug pagtuon sa Bibliya.

Samtang namalaybalay, naestorya sa duha ka Saksi ang usa ka babaye. Human mahisgoti kadiyot ang presenteng kahimtang sa kalibotan, gipatan-aw sa sister kaniya ang video nga Nganong Tun-an ang Bibliya? ug gipakita kon unsaon pagtuon ang Bibliya. Midawat ug pagtuon ang babaye ug nagpatabang siyag download sa JW Library app diha sa iyang cellphone. Sa maong panag-estorya, gitun-an nila ang leksiyon 01 sa Mabuhi Ka Hangtod sa Hangtod! nga libro ug gitan-aw ang video nga Welcome sa Imong Pagtuon sa Bibliya. Nagpadayon sa pagtuon ang babaye hangtod karon.

Usa ka buntag, naay lalaki nga miduol sa usa sa atong mga cart. Miingon ang lalaki nga padulong na unta siyang motrabaho pero nainteres siya sa atong cart. Dihang gihisgotan sa mga Saksi nga nagtanyag silag pagtuon sa Bibliya, ang lalaki nangutana: “Unsaon man pagtuon ang Bibliya?” Human mahisgoti kadiyot ang mga pangutana sa luyo sa Mabuhi Ka Hangtod sa Hangtod! nga brosyur, mihangyo ang lalaki nga iyang pangayoon ang brosyur aron mabasa ni niya human sa trabaho. Karon, pila ka beses siyang magtuon uban sa mga Saksi kada semana.

Sa unang siglo, ang mga tawo sa Malta nagpakitag “talagsaong kaayo” kang apostol Pablo dihang nalunod didto ang iyang gisakyan nga barko. (Buhat 28:2) Sa susama, giabiabi pag-ayo sa 10 ka kongregasyon sa Malta ug Gozo ang mga igsoon panahon niini nga campaign. Usa ka brader nga taga-England ang miingon: “Paghuman sa campaign, nasuod na mi pag-ayo nga morag kaugalingong kongregasyon na namo ang among biyaan, morag dili na mi bisita.”

Mapasalamaton ta kang Jehova kay iyang gipanalanginan ang paningkamot sa mga igsoon nga masangyawan ang mga tawo, bisan asa pa sila, sa maayong balita sa Gingharian.—Buhat 1:8.