ST. PETERSBURG, Russia—Gihingusgan sa mga awtoridad sa Russia ang pagpasira sa Administrative Center sa mga Saksi ni Jehova sa Russia.

Ang Prosecutor General’s Office sa Russian Federation miisyu ug warning letter nga pinetsahag Marso 2, 2016, nga nag-ingon nga “ang relihiyosong asosasyon kinahanglang ipaagig liquidation” kon dili tangtangon sa administrative center ang “nahimong kalapasan” nga gihimohimo sa gobyerno ingong “extremist” sulod sa duha ka bulan. Si Yaroslav Sivulskiy, spokesman sa mga Saksi ni Jehova sa Russia, miingon: “Ang pagpasira sa among national headquarters mahimong naglakip sa pagkuha sa tanang propidad nga among gipanag-iya ug sa ngadtongadto sa pagdili sa kalihokan sa mga Saksi ni Jehova sa tibuok Russia.”

Administrative Center sa mga Saksi ni Jehova sa Russia.

Ang makapalibog kay gihimo kini sa gobyerno atol sa ika-25 nga anibersaryo sa unang legal registration sa mga Saksi ni Jehova sa Russia: ang Administrative Center narehistro niadtong Marso 27, 1991, ug narehistro pag-usab niadtong Abril 29, 1999. Ang hulga nga pasirad-an ang national headquarters sa mga Saksi sa Russia, nga tua sa lungsod sa Solnechnoye, mga 40 kilometros northwest sa St. Petersburg, mao ang kinaulahiang pag-atake sa gobyerno batok sa mga Saksi. Sulod sa miaging tuig, ang mga awtoridad sa Russia nagbabag sa mga gi-import nga relihiyosong mga literatura sa mga Saksi, ug ang mga Bibliya sa pinulongang Russian, ug sa tibuok kalibotan ang nasod sa Russia lang ang nagdili sa opisyal nga website sa mga Saksi, ang jw.org. “Ang mga balaod sa anti-extremism sayop nga gipadapat ngadto sa pagsimba sa mga Saksi ni Jehova sa Russia,” matod ni Mr. Sivulskiy. “Gikuwestiyon sa mga Saksi ni Jehova kining mga desisyona. Gusto namong gawasnong makasimba ug malinawong makahimo sa among buluhatong pagpanudlo bahin sa Bibliya, nga among ginahimo sa Russia sulod na sa 125 ka tuig.”

Apan gihingusgan pa sa mga awtoridad sa Russia ang ilang pagpanghasi sa mga Saksi ni Jehova tungod sa kooperasyon niini uban sa Russian Orthodox Church. Gireport sa mga international media nga kining “suod nga panag-alyansa sa gobyerno ug sa Russian Orthodox Church,” segun sa pagkahubit sa The New York Times, daw maoy nagsugnod sa pagpangatake ug paghimog mga balaod nga gituyo aron mapahunong ang kalihokan sa mga Saksi ug sa ubang gagmayng mga relihiyon sa Russia. Ang Associated Press mitaho nga ang gihimo sa gobyerno “batok sa mga Saksi ni Jehova sa Russia nakapabalaka usab sa mga aktibista sa relihiyosong kagawasan.” Ang report sa Reuters miingon nga ang maong buhat “batok sa mga Saksi ni Jehova ug sa daghan pa nalangkit sa nagkadako nga criminal prosecutions ilalom sa balaod sa Russia nga anti-extremism.” Niadtong Disyembre 2015, ang The Independent mitaho nga ang maong balaod sa Russia motabang unta nga “masumpo ang pag-atake sa mga terorista ug sa ultranationalist violence.” Apan gigamit usab kini aron “sa pagkiha sa mga membro sa malinawong mga relihiyon” sama sa mga Saksi ni Jehova, sumala sa gitaho sa The Huffington Post niadtong Marso 20, 2016. Bisan pag naningkamot ang mga Saksi nga makoreksiyonan kini nga balaod sa gobyerno diha man sa ubos nga mga korte ug sa European Court of Human Rights, ang The Moscow Times niadtong Marso 25, 2016 mireport nga ang Russia naghimog bag-ong balaod nga “naghatag ug katungod sa mga korte sa Russia sa pag-usab sa mga desisyon sa internasyonal nga mga korte.”

Mga bisita diha sa lobby sa Administrative Center.

Gigamit sa mga Saksi ang Administrative Center sa mga Saksi ni Jehova sa Russia aron sa pag-organisar ug pagsuportar sa libreng mga programa sa pagpanudlo bahin sa Bibliya para sa tanang molupyo sa Russia. Ang eksperyensiyadong mga ministro sa administrative center nagtabang usab ug nakigkomunikar sa mga boluntaryong Saksi sa Russia sa paghatag ug mga hinabang para sa mga biktima sa kalamidad. Sa Russia, nga may populasyon nga kapig 146,000,000, duna poy mga Saksi nga kapig 175,000.

Si David A. Semonian, international spokesman sa mga Saksi nga tua sa ilang world headquarters sa New York, miingon: “Wala gyod mi malipay nga hulgaon mi sa gobyerno sa Russia nga ipasira ang among branch office didto. Interesado kaayo ang mga Saksi ni Jehova ug ang uban pang mga tawo sa tibuok kalibotan kon unsa pay mahitabo sa umaabot bahin niini.”

Media Contacts:

International: David A. Semonian, Office of Public Information, tel. +1 718 560 5000

Russia: Yaroslav Sivulskiy, tel. +7 812 702 2691