Niadtong Marso 21, 2017, adlawng Martes, gidasig sa Nagamandong Lawas sa mga Saksi ni Jehova ang mga igsoon sa tibuok kalibotan nga moapelar pinaagig sulat ngadto sa kinalabwang mga awtoridad nga nagplanong idili ang atong buluhaton sa tibuok Russia. Bisag wala mahibaloi kon unsa ka daghang sulat ang nadawat sa mga awtoridad sa Russia, daghan sa nagsulat ang nakadawat ug opisyal nga sulat ingong balos. Bisan tuod wala aksiyoni sa gobyerno sa Russia ang matinahorong hangyo ug sayop nilang gigamit ang ilang awtoridad aron atakehon ang pagsimba sa atong mga igsoon, ang kampanya maoy dakong pamatuod nga ang organisasyon ni Jehova nagkahiusa sa tibuok kalibotan. Kini milampos sa pagpakita sa atong mga igsoon sa Russia nga ang mga igsoon sa tibuok kalibotan andam sa pagsuportar kanila.​—1 Pedro 2:17.

Batang babaye sa Bolivia nga miapil sa kampanya.

Grabe ang paningkamot sa daghang Saksi aron makaapil sa kampanya. Sa ubang nasod, mahal kaayo ang pagpadalag sulat sa Russia maong ang mga arang-arangan miamot ug dako aron makaapil ang mga naglisod sa pinansiyal. Sa ubang kahimtang, gipadala sa mga igsoon ang ilang sulat pinaagi sa ilang mga higala sa ubang nasod diin barato ang pagpadalag sulat. Daghang igsoon ang nag-uban ingong pamilya o kongregasyon sa paghimog sulat ug gipadala kini nga binulto. Busa gawas nga nakadaginot sila, gihimo nila ang kampanya ingong memorableng espirituwal nga okasyon.

Naa gani mga report nga ang mga trabahante sa postal service misuportar sa kampanya. Pananglitan, usa ka manedyer sa parcel service sa Barranquilla, Colombia, miingon: “Bilib kaayo ko kay nagkahiusa mo sa tibuok kalibotan, ug nagkahiusa mo para sa maayong katuyoan sama niining sa Russia. Nagtuo ko nga kining inyong ginahimo dinhi sa Barranquilla mao poy ginahimo sa matag siyudad sa tibuok kalibotan. Grabe ni nga mensahe kay tibuok kalibotan ni, ug unta makaamgo sab ang uban kon unsa ni ka importante nga mensahe.” Sa Anseong, South Korea, usa ka postmaster ang mihimog special window para sa mga Saksi ni Jehova sa pagpadalag sulat ug mihatag pa gani siya sa mga igsoon ug libreng sobre nga gidisenyo para sa internasyonal nga mga sulat.

Mga igsoon sa Guinea nagtapok aron maghimog mga sulat.

Si Yaroslav Sivulskiy, tigpamaba sa mga Saksi ni Jehova, miingon: “Pagkadungog sa mga igsoon sa Russia nga ang Nagamandong Lawas nag-organisar ug tibuok kalibotang kampanya sa pagsulat para kanila, sila nahibalo nga bisag unsa pay desisyon sa korte, ang mga igsoon nagsuportar nila.”

Si Mark Sanderson nga membro sa Nagamandong Lawas miingon: “Kini nga kampanya sa pagsulat nagpakita nga ang katawhan ni Jehova nagkahiusa gyod. Samtang nagkaduol ang kataposan niining sistemaha sa mga butang, importante ang panaghiusa para sa kaluwasan. Samtang nagpaabot ta kon unsaon pagmaniobra ni Jehova ang kahimtang sa Russia, himoon nato ang tanan aron tabangan ang atong mga igsoon. Maghiusa sab ta sa paghangyo kang Jehova, uban ang pagsalig nga tabangan ta niya sa matag kahimtang.”​—Salmo 65:2.