Laktaw ngadto sa video

Laktaw ngadto sa secondary menu

Mga Saksi ni Jehova

Cebuano

MARSO 20, 2014
TIBUOK KALIBOTANG BALITA

Guy H. Pierce, Membro sa Nagamandong Lawas sa mga Saksi ni Jehova, Namatay

Guy H. Pierce, Membro sa Nagamandong Lawas sa mga Saksi ni Jehova, Namatay

NEW YORK—Si Guy H. Pierce, membro sa Nagamandong Lawas (Governing Body) sa mga Saksi ni Jehova sa ilang hedkuwarter sa Brooklyn, New York, namatay niadtong Marso 18, adlawng Martes, sa edad nga 79.

Siya nag-alagad sa lainlaing komite nga nagdumala sa kalihokan sa mga Saksi ug sa ilang tibuok kalibotang buluhaton sa pagtudlo bahin sa Bibliya. Tungod sa iyang responsibilidad, kanunay siyang magbiyahe ug gigamit niya kini nga kahigayonan aron dasigon ang mga Saksi sa tibuok kalibotan. Bisag puliki kaayo, mohatag siyag panahon niadtong nagkinahanglag tabang o tambag, ug siya mopahiyom ug mopasiaw aron dili mataha niya ang uban. Kadtong mga suod niya miingon nga ang lainlaing klase sa mga tawo dili maulawng moduol niya. Sa iyang pakigpulong sa usa ka graduwasyon sa full-time nga mga ministro, iyang gisulti ang usa ka butang nga pirme niyang ginahimo: “Kinahanglang lig-on mo kon unsay husto, pero dili pod sobra ka estrikto. Ayaw pakamenosa ang mga tawo sa inyong asaynment tungod lang kay lahi silag kultura.”

Si Guy Hollis Pierce natawo sa Auburn, California, niadtong Nobyembre 6, 1934. Siya nabawtismohan ingong Saksi ni Jehova niadtong Agosto 14, 1955 sa edad nga 20. Naminyo siya kang Penelope (Penny) Wong, nga usa pod ka Saksi, niadtong Mayo 30, 1977 ug sila nakabatog mga anak. Silang duha nahimong full-time nga mga magtutudlo sa Bibliya (gitawag sa mga Saksi ug regular payunir). Unya nahimo siyang nagapanawng ministro sa mga Saksi ni Jehova sa tibuok United States aron dasigon ang ubang full-time nga mga magtutudlo sa Bibliya ug mga membro sa kongregasyon. Sa 1997, ang magtiayon giimbitar nga mag-alagad sa sangang buhatan (branch office) sa mga Saksi ni Jehova sa United States. Niadtong Oktubre 2, 1999, gipahibalo nga si Guy Pierce nahimong bag-ong membro sa Nagamandong Lawas.

Siyay tsirman sa ika-129 nga tinuig nga miting sa Watch Tower Bible and Tract Society of Pennsylvania niadtong Oktubre 5 ug 6, 2013. Nakapahimulos sa programa ang 1,413,676 sa 31 ka nasod diin ang kadaghanan nakakita niini pinaagig webcast. Sumala pa sa website sa mga Saksi, kini ang kinadak-ang panagkatigom sa mga Saksi ni Jehova sukad.

Mingawon gyod niya ang iyang asawa nga si Penny, ilang unom ka anak, mga apo, ug mga apo sa tuhod. Dili pod siya malimtan sa mga Saksi ni Jehova sa tibuok kalibotan nga giisip niyang pamilya.

Ang iyang kaubang mga membro sa Nagamandong Lawas mikomento bahin sa iyang “lig-ong pagtuo ug baroganan sa mga balaod ug prinsipyo ni Jehova.” Sila midugang: “Ang iyang gipakitang kalig-on ug pagkamatinumanon padayong magdasig namo hangtod sa umaabot nga katuigan.”

Media Contact(s):

International: J. R. Brown, Office of Public Information, tel. +1 718 560 5000