Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Muwoneleli—Wa txigondo  |  Junho wa 2017

U nga divali a ti i ku ta lisima ngutu

U nga divali a ti i ku ta lisima ngutu

“Va na zive ti to ditina dako ngawe wekha u ku Jehovha, ngawe wekha u ku Nyatxitimwi ha mafuni kotshe!”—MASALMU 83:18, Tradução do Novo Mundo.

TINDANDO: 46, 136

1, 2. a) Ngu yihi mhaka ya lisima ayi yi gwesako vathu votshe? b) Ngu ku txani i di ya lisima ngutu kwathu?

VATHU vo tala nyamsi va teka mali i di yona i ku ya lisima ngutu. Vona va pimisa ngutu ngu kumana mali yo tala mwendo ku kha va lavi ku mwalalelwa ngu mali yi va ku nayo. Kasi vamwane va teka mwaya, wutomi wawe ni silo simwane i di sona i ku sa lisima ngutu.

2 Kambe ku ni mhaka ya lisima ngutu kupinda totshe. Mhaka ya kona, ngu pfaliswa ka wukoma wa Jehovha. Nda lisima ngutu ti to hi si yi divali mhaka yiya. Kambe loko hi si ti woneli, hi nga thuka hi ñoleka ngu silo sa ditshiku ni ditshiku mwendo sikarato sa wutomi ha ko za hi divala ati i ku ta lisima ngutu. Se hi txi seketela wukoma wa Jehovha ti na hi hehukela kuwonisana ni sikarato sathu ni ku hi na va hafuhi ni Jehovha.

NGU KU TXANI MHAKA YONEYO I DI YA LISIMA NGUTU?

3. Ngu tihi ti Sathane a nga ti womba mayelano ni nzila yi Jehovha a fumako ngu yona?

3 Sathane a kanakanile nzila yi Jehovha a fumako ngu yona.  Ene a lava ti to vathu votshe ve tumela ti to Jehovha i Mfumi wu a ku ni wukanganyisi ni ti to kha hi naveleli ta tinene. Sathane a tshumete e womba ti to vathu va ndina tsaka ngako va txi ti fuma vapune. (Genesisi 3:1-5) A tshumete a txi khene awalo wu a nga thembekako ka Txizimu ni ku ngako wutomi wu txi nemela ngutu, vathu va na txi tshuralela. (Jobe 2:4, 5) Ngu toneto Jehovha a lekile mbimo yo lapha yi pinda kasi ku kombisa ti to vathu kha va na kusikota kukongomisa wutomi wawe vapune i singa ene kota Mfumi.

4. Ngu ku txani ti di ni lisima kuziva wu a ku ni fanelo yo fuma?

4 Ditshuri ti to Jehovha wa tiziva ti to totshe ti Dhiyabhulosi a nga tiwomba i makuhu. Se ngu ku txani adi ningile mbimo Sathane kasi ku e kombisa ati a nga tiwomba? Xamulo yi pata vathu votshe, nzumani ni ha mafuni. (Lera Masalmu 83:18.) Adhamu ni Evha va tshuralete wukoma wa Jehovha, msana keto vamwane ni vona va mahile toneto. Eto ti mahile vamwane ve pimisa ti to Dhiyabhulosi a tiwomba ditshuri loko a txi khene awalo wu a nga thembekako ka Txizimu. Mbimo yi vathu ni tingelozi va nga si se tiziva ti to i mani a ku ni fanelo yo fuma, ku singa ni kudikha ka ditshuri ni wumwewo. Kambe msana ko ziwa ti to i Jehovha basi wu a ku ni fanelo yo fuma vathu votshe va na ta hanya ngu ha ku si gumiko. Vona va na ta va ni kudikha ni wumwewo.—Vaefesu 1:9, 10.

5. Ngako hi txi thembeka hi na va hi txi kombisa txani?

5 Wukoma wa Txizimu wu na pfaliswa, kambe wukoma wa Sathane ni wa vathu wu na ta gumiswa. Wukoma wa Txizimu ngu kuthumisa Jesu wu na ta xula. Vathu vo lulama va na ta va txikombiso txa ti to vathu va nga sikota kusimama ve thembeka ni ku seketela wukoma wa Txizimu. (Isaya 45:23, 24) Ina kha hi ti lavi ku va hagari ka vathu vonevo? Ha ti lava! Ngu toneto, ti lava hi pfisisa ti to ngu ku txani mhaka yiya i di ya lisima ngu ditshuri.

KUPFALISWA KA WUKOMA NDA LISIMA NGUTU KUPINDA KU HULUKISWA

6. Kupfaliswa ka wukoma wa Jehovha nga lisima ngutu kupinda txani?

6 Kupfaliswa ka wukoma wa Jehovha nda lisima ngutu kupinda litsako lathu. Kambe eto kha ti lavi kuwomba ti to kuhulukiswa kwathu hi nga ka txilo mwendo ku Jehovha kha nga ni mhaka ni nathu. Hi ti zivisa ku txani?

Kupfaliswa ka wukoma wa Jehovha nda lisima ngutu kupinda litsako lathu

7, 8. Kupfaliswa ka wukoma wa Jehovha ku hi wuyelisa ngu nzila yihi?

7 Jehovha wa va dhunda ngutu vathu. Ene a ningete ngu mwanana wakwe ti to hi kota kumana wutomi wo mbi guma. (Johane 3:16; 1 Johane 4:9) I ti ku Jehovha kha hetisisa txithembiso txakwe txa wumangwana wathu, Sathane ni vaxanzuki vamwane va di wombile ti to Jehovha wa hemba ni ku a vhalela vathu ti to ve tsaka  futhi ene kha fumi ngu nzila ya yinene. Vona va ndina simama va txi: “Ti gwitisile ku txani ta wule ku nga thembiswa ti to wa ta kani? Nguko, kukhukhela vatate vathu ve fa, ti ngadi zumbisile tona ti i nga ti tona kukhatani ka m’tumbuluko wa ditiko.” (2 Pedro 3:3, 4) Kambe Jehovha a na hetisisa sithembiso sakwe. Ene a ti vekile ha kubasani ti to kupfaliswa ka wukoma wakwe kupata kuhulukiswa ka vathu vo thembeka. (Lera Isaya 55:10, 11.) Wukoma wa Jehovha wu seketetwe ka lirando. Hi nga tsaniseka ti to ene mbimo yotshe wa hi randa ni ku a teka malanda akwe i di a lisima.—Eksodha 34:6.

8 Hambiku wukoma wa Jehovha i ku wa lisima ngutu, eto kha tiwombi ti to kuhulukiswa kwathu hi nga ka lisima kwakwe. Jehovha wa hi khatalela. Kuziva ati i ku ta lisima ti na hi vhuna kusimama hi thembeka ni kuseketela wukoma wa Jehovha.

JOBE A TXITXILE MAWONELO AKWE NGU NZILA YIHI?

9. Ngu tihi a ti Sathane a nga tiwomba ngu Jobe? (Wona mfota wu wu ku makhatoni.)

9 Ti ni lisima ngutu ku va ni mawonelo a manene ngu wukoma wa Jehovha. Hi nga tiwona eto ngu kugonda dibhuku da Jobe, dimwedo da mabhuku ya o khata kubhalwa. Kona hi gonda ti to Sathane a wombile ti to ngako Jobe a txo xaniseka ngutu, ene a na tshuralela Txizimu. Sathane a kombete Txizimu ti to txi maha Jobe e xaniseka. Kambe Jehovha kha tumela, ene a tumelete Sathane ti to e duka Jobe ngu kuwomba tiya: “Sotshe si a ku naso na si veka mtamoni kwako.” (Lera Jobe 1:7-12.) Msana keto, Jobe a luzeketwe ngu sithumi, tithomba, kumweko ni vanana vakwe va 10. Kambe Sathane a ti mahile tiwoneka nga ova Jehovha a nga vanga phango yile. (Jobe 1:13-19) Ngu kulondisela, Sathane a xasete Jobe ngu wulwati wo thisa awu wu nga txi mvangela kukarateka. (Jobe 2:7) I singeto dwe, a thumisile msikati wa Jobe ni vangana vakwe vararu va makuhu ti to ve mpfisa kupanda ngu mapswi ya ma si vhuniko txilo.—Jobe 2:9; 3:11; 16:2.

10. a) Jobe a wu kombisile ngu nzila yihi wuthembeki wakwe ka Txizimu? b) Ngu ku txani ti nga txi lava ku Jobe e lulamiswa mawonelo akwe?

10 Ina ati Sathane a nga tiwomba i ti ditshuri? Ahim-him. Nguko hambiku Jobe a nga xaniseka ngutu kha nga za e tshuralela Jehovha. (Jobe 27:5) Kambe ngu mbimonyana, Jobe a divate ati i nga ti ta lisima se ekhata ku tiemelela. Ene a wombile ti to a sa nga maha txilo txo biha, se a kombete Txizimu ti to txi mu gela txivangelo txa kuxaniseka kwakwe. (Jobe 7:20; 13:24) Ti nga maha hi womba tiya: ‘Phela ka ti a nga xuphekisa tona Jobe, ta pfisiseka ku va a di mahile eto.’ Kambe Jehovha a ti tiziva ti to Jobe a ti ni mawonelo o biha, ni ku ene a mlulamisile. Ngu nzila yihi?

11, 12. Jehovha a vhuni Jobe ti to e maha txani? Kambe a xamute ngu nzila yihi?

11 A ti Jehovha a nga tiwomba ti ka dibhuku da Jobe ndima 38 kala 41. Jehovha kha nga txhamusela txivangelo txa kuxaniseka ka Jobe. Kambe ene a ti lava ku m’vhuna ti to e pfisisa ti to ene i m’dotho ngutu ka Txizimu. A gondisile Jobe ti to ene mbwa lisima ngutu kupinda sikarato sakwe. (Lera Jobe 38:18-21.) Mapswi a  Jehovha ma vhuni Jobe ti to e lulamisa mawonelo akwe.

12 Ina Jehovha a bhongile mbimo yi a nga ti wombawomba ni Jobe ka totshe ti ti nga m’humelela? Ahim-him. Jobe a tumete kulaywa ngu Jehovha. Ene a ti khene: “Ngu kota yeto, na ti laya, kambe na pandiseka mbiluni, ni txi tola lithule ni dikhuma.” (Jobe 42:1-6) Makhatoni Elihu a vhuni Jobe ti to e lulamisa mawonelo akwe. (Jobe 32:5-10) Msana keto Jobe a engisete mlayo wa lirando waJehovha e tshumela e lulamisa mawonelo akwe. Jehovha a wombile ti to wa ti guleta ngu kuthembeka ka Jobe.—Jobe 42:7, 8.

13. M’layo wa Jehovha wu m’vhunisile ku txani Jobe msana kova sikarato sakwe si di pindile?

13 M’layo wa Jehovha wu vhuni Jobe msana kova sikarato sakwe si di pindile. “Jehovha a to katekisa kuhanya ka wumbidi ka, Jobe kupinda kukhatani kwakwe.” Ngu mbimo yoneyo, ene “a to amukela kambe vanana va mazambi va mtxhanu ni vambidi, ni vanana vararu va mahorana”. (Jobe 42:12-14) Aku Jobe a nga ti va dhunda vanana vakwe, ngu ditshuri a ti va xuva ngutu mbimo yi va nga di fite. Ni ku kha si divala sikarato sotshe si si nga ti mu humelete ene ni mwaya wakwe. Hambiku Jobe a nga ziva txivangelo txa kuxaniseka kwakwe, ti nga maha a di tiwotisile ti to ngu ku txani Txizimu txi di tumelete ti to ni xaniseka ngutu. Hambiku a nga ti thuka e va ni mapimo onewo, ene a ti simama e alakanyisisa ngu mapswi a Jehovha. Eto ti m’thavelete ni ku m’vhuna ti to e va ni mawonelo a manene.—Masalmu 94:19, wona txhamuselo ya hahatshi.

Ina hi nga ti kota ku ti vekisela ka wukoma wa Jehovha, i singa ka sikarato si hi mananako naso? (Wona ndimana 14)

14. Hi gonda txani ka ti ti nga humelela Jobe?

14 Kualakanyisisa ngu ti ti nga humelela Jobe ti nga hi vhuna ti to hi lulamisa mawonelo athu ni ku hi thavelela. Phela a ti ti nga bhalwa ka dibhuku da Jobe “ti bhaletwe ku ti txi hi gondisa, kasiku hi mana txithembo ngu kuhonisela ni thavelelo yi hi yi manako a mu ka Mibhalo yo basa”. (Varoma 15:4)  Atiya ti hi gondisa ti to kha ha fanela hi kareteka ngutu ngu sikarato sathu a ha ko za hi divala kupfaliswa ka wukoma wa Jehovha. Kufana ni Jobe, hi kombisa ti to hi seketela wukoma wa Jehovha ngu kusimama hi thembeka kwakwe hambi hi di ka siemo si si nemelako.

15. Ngako hi txi tsanisela hi na kota kumaha txani?

15 Txikombiso txa Jobe txi nga hi thavelela nguko txi kombisa ti to kuva hi txi xaniseka kha ti wombi ti to Jehovha a to hi henyela. Sikarato si hi ninga mkhanjo wo kombisa kuseketela wukoma wa Jehovha. (Mavingwa 27:11) Mbimo yi hi tsaniselako hi tsakisa Jehovha ni ku themba yathu ngu wumangwana ya tsana. (Lera Varoma 5:3-5.) Txikombiso txa Jobe txi tshumela txi hi kombisa ti to “Mkoma a na ni wumbilu ni divalelo”. (Jakobe 5:11) I di ti to hi seketela wukoma wa Jehovha, ene a na hi hakela. Kuziva toneto ti na hi vhuna “kutimisela tatinene ni kuhunisela ngu kutsaka”.—Vakolosa 1:11.

SIMAMA U NINGA LISIMA WUKOMA WA JEHOVHA

16. Ngu ku txani mbimo yotshe hi di fanete kukhumbula lisima la kuseketela wukoma wa Jehovha?

16 Ditshuri ti to ti nga karata kutivekisela ka kupfaliswa ka wukoma wa Jehovha mbimo yi hi mananako ni sikarato sa wutomi. Hambi i di sidotho, kambe si nga va sa hombe ngako hi txi zumbela kualakanya ngu sona. Ngu toneto mbimo yotshe hi fanete hi khumbula ti to txa lisima ngutu ngu seketela wukoma wa Jehovha ti singa ni mhaka ni sikarato si hi mananako naso.

Kusimama hi ñoleka ngu mthumo wo txhumeyela ta hi vhuna kukhumbula a ti i ku ta lisima

17. Womba txikombiso a txi txi kombisako ti to kuñoleka ngu mthumo wo txhumayela ta hi vhuna ku ti vekisela ka ti i ku ta lisima.

17 Kusimama hi ñoleka ngu mthumo wo txhumeyela ta hi vhuna kukhumbula a ti i ku ta lisima. Ngu txikombiso, mwanathu wu a dhanwako ku i Renee a ti ni wulwati wo oma siro, ni mbeva ayi yi nga ti mu xanisa ngutu. Mbimo yi a nga ti bhaxarile sibhejela a ti txhumayela va dhokodhela, ava a nga ti bhaxarile navo kumweko ni va va  nga ti tsula ve ya mpfuxela. Ka mavhiki mambidi ni hafu ya a nga ma heta a di sibhejela ene a mahile 80 wa maora. Hambi mbimo yi a nga ti ha fuhi ni ku fa, kha divala a ti i ku ta lisima. Kuziva ti to a ti seketela wukoma wa Jehovha ti mu tsakisile ngutu.

18. Txikombiso txa Jennifer txi hi gondisa txani mayelano ni kuseketela wukoma wa Jehovha?

18 Hi nga tshumela hi seketela wukoma wa Jehovha mbimo yi hi mananako ni sikarato sa ditshiku ni ditshiku. Mwanathu wu a dhanwako ku i Jennifer a hetile masiku mararu a di txititxhini ka maganune a txi emela kutsula mtini. Maganune ya ma nga ti londiselana ma ti thindekile li pfhumba. Ene a ti karatekile ngutu, futhi a ti pfite i ti ene ekha. Kambe hahanze ko ti tsetsa, ene a kombete txivhuno ka Jehovha ti to e kota kutxhumayela vathu va va nga ti ka txiemo txo fana ni txakwe. Ngu magwito a txhumayete vathu vo tala e tshumela e ningela mabhuku o tala. Jennifer a khene: “Ni ti pfite ti to Jehovha a ni katekisile ni ku ni tsanisa ka txiemo txile txo nemela ti to ni ningela wufakazi mayelano ni nene.”

19. Ngu yihi nzila yimwane yi yi kombisako wukholzeli wa ditshuri?

19 Vathu va Jehovha basi va pfisisako lisima la wukoma wa Jehovha. Kupfisisa koneko i nzila yimwane yo kombisa wukhozeli wa ditshuri. Ngu toneto mmweyo ni mmweyo a fanete kuseketela wukoma wa Jehovha.

20. Jehovha a ti pfisa ku txani ngu mizamo yi u yi mahako ti to u seketela wukoma wakwe?

20 Jehovha wa yi ninga lisima mizamo yi u yi mahako ti to u seketela wukoma wakwe kota dilanda dakwe do thembeka ni kutsanisela siduko. (Masalmu 18:25) Msungu wu wu londiselako hi na ta wona sivangelo simwane so hi seketela wukoma wa Jehovha ngu mbilu yotshe.