Ndaka u ya ka dijanela da mndani

Tifakazi ta Jehovha

Sawula lidimi Txitxopi

“Dipswi da Txizimu . . . di ni mtamo”

“Dipswi da Txizimu . . . di ni mtamo”

“Dipswi da Txizimu da hanya, di ni mtamo.”—VAHEBHERU 4:12.

TINDANDO: 114, 113

1. Nji txani atxi txi ku tsanisako ti to Dipswi da Txizimu di ni mtamo? (Wona mfota wu wu ku makhatoni.)

VATHU va Jehovha va kholwa ti to dipswi dakwe, ma dungula akwe ka vathu, ma ‘hanya ni ku ma ni mtamo’. (Vahebheru 4:12) Se hi wu woni mtamo wa Bhiblia wu txi thuma kwathu mwendo ka vamwane. Vamwane na va si se va Tifakazi i ti makhamba, vadhahi ni magelegele. Vamwane va ti ni male ni nduma, kambe va pfite ti to ku ni ti ti nga txi kelela ka wutomi wawe. (Eklesiaste 2:3-11) A ti ti tsakisako ngu ti to, wungi wa va va nga ti si na themba ni ku tipfa va di vokha konkuwa se va ni themba ni ku va mani mkongomiso. Ha tsaka ngu kugonda ngu matimu a vathu va va nga txitxa wutomi wawe ka mxaxamelo wa misungo yi yi ku “A Bíblia Muda a Vida das Pessoas” ka direvhista da Muwoneleli. Kambe hambi loko i di Makristu vathu va fanete kusimama ve tsanisa wuxaka wawe ni Jehovha ngu kuvunwa ngu Bhiblia.

2. Mtamo wa Dipswi da Txizimu wu mahile txani ka vathu ngu dilembe dizana do khata?

 2 Kha ti hi xamalisi aku vathu vo tala va nga maha kutxitxa ka hombe ka wutomi wawe mbimo yi va nga gonda ditshuri. Vasawuleki va dilembe dizana do khata ni vona va mahile ti ti fanako. (Lera 1 Vakorinto 6:9-11.) Mbimo yi Paulo a nga wombawomba ngu va va no mbi dya thomba ya Mfumo wa Txizimu, a tshumete a txi khene: “Vamwane kwanu i ti vo nga toneto.” Dipswi da Txizimu ni moya wo sawuleka si va vhuni ti to ve txitxa wutomi wawe. Kambe hambi mbimo yi se i nga ti Makristu vamwane va mahile siwonho sa wombe asi si gwesa wuxaka wawe ni Jehovha. Ngu txikombiso, Bhiblia yi wombawomba ngu msawuleki wamweyo awu a nga ti fanete e thaviswa dibanzani. Msana ko va a di txitxile, a ndina tshumela e va txiro txa dibanza kambe. (1 Vakorinto 5:1-5; 2 Vakorinto 2:5-8) Ta hi tsanisa kuziva ti to vanathu va ti koti kutxitxa ngu kuvhunwa ngu Dipswi da Txizimu.

3. Hi na xolisisa txani ka msungo wuwa?

3 Dipswi da Txizimu di ni mtamo wa hombe. Aku Jehovha a nga hi ninga, a lava ti to hi di thumisa kwati. (2 Timoti 2:15) Ka msungu wuwa hi na xolisisa ti to hi nga wu thumisisa ku txani mtamo wa dipswi da Txizimu ka: (1) wutomi wathu, (2) mthumo wa thembwe ni ka (3) kugondisa dibanzani. Toneto ti na hi vhuna kukombisa kubonga ni lirando ali hi ku nalo ngu Tate wathu wa nzumani awu a hi gondisaku ti to hi vhuneka.—Isaya 48:17.

KA WUTOMI WATHU

4. a) Hi nga maha txani ti to mtamo wa Dipswi da Txizimu wu thuma kwathu? b) U mahisa ku txani ti to u mana mkama wo gonda Bhiblia?

4 Ti to mtamo wa Dipswi da Txizimu wu thuma kwathu ti lava hi di gonda mbimo yotshe. Hi nga zama ku di lera ditshiku ni ditshiku. (Joxuwa 1:8) Hambiku hotshethu hi zumbako hi di ñolekile ngu mithumo, kupata ni wutixamuleli wu hi ku nawo, kha ha fanela kuleka kulera Bhiblia. (Lera Vaefesu 5:15, 16.) Ngu yihi mbimo yo gonda? Ti nga maha hi mana mbimo ni mixo, mwendo ni mtshikari mwendo ni minova. Hi fana ni m’bhali wa Masalmu wu a nga khene: “Mlayo wako na wu randa ngutu! Na wu alakanyela otshe masiku?”

Txiwalo txi hi fanelako ku txi tumelela txi hi lekisa kulera Bhiblia, kupata ni wutixamuleli wathu

5, 6. a) Ngu ku txani ti txi lava hi alakanyisisa? b) Hi nga maha txani ti to hi alakanyisisa kwati? c) Kulera Bhiblia ni kualakanyisisa, ti ku vhunisile ku txani?

5 Kambe kulera Bhiblia dwe, kha ta enela. Ti lava hi alakanyisisa ni kupimisa kha kwati ngu ti hi nga lera. (Masalmu 1:1-3) O va toneto ti no hi vhuna kuthumisa wuzivi wa Bhiblia ka wutomi wathu. Ngu toneto, hambi hi txi lera ka Bhiblia yipune, mwendo ngu ha ka mtxhini, hi lava kutumelela Dipswi da Txizimu di hi txitxa.

6 Hi nga maha txani ti to hi alakanyisisa kwati? Ngako hi txi lera Bhibla, ti lava hi emanyana, hi ti wotisa: ‘Mhaka yiya yi ni  gondisa txani ngu Jehovha? Ati ni nga lera, ni ti thumisisa ku txani ka wutomi wangu? Ngu tihi ati ti lavako ni tshukwatisa?’ Ngako hi txi alakanyisisa ngu Dipswi da Txizimu ni kumaha mkombelo, hi na tsakela kuthumisa ati hi nga gonda. Eho ngu ha hi no pfa mtamo wa Bhiblia ka wutomi wathu.—2 Vakorinto 10:4, 5.

KA MTHUMO WA THEMBWE

7. Hi nga mahisa ku txani ti to hi di thumisa kwati Dipswi da Txizimu ka mthumo wathu wa thembwe?

7 Ti ni lisima kuthumisa Dipswi da Txizimu mbimo yotshe hi txi txhumayela ni kugondisa. Mwanathu mmwane a ti khene: “Ngako u txo tsimbila ni Jehovha apune mi txi txhumayela ngu mti ni mti, ina u ndina thuma kuwombawomba wekha, u si mu leki nene e wombawomba?” Ngako hi txi lerela m’thu Bhiblia, hi leka Jehovha e wombawomba nayo. M’bhalo wu wu nga sawulwa kwati, wu ni mtamo kupala totshe ati athu hi nga ti wombako. (1 Vatesalonika 2:13) Ina wa zama kulera Bhiblia makhambi o tala mbimo yi u ku thembweni?

Ngako hi txi lerela m’thu Bhiblia, hi leka Jehovha e wombawomba nayo

8. Ngu ku txani ti txi lava hi txhamusela m’bhalo wu hi nga lerela m’thu?

8 Hambiketo, kulerela m’thu wu hi m’txhumayelako m’bhalo wa Bhiblia, kha ta enela. Vathu vo tala kha va yi pfisisi Bhiblia. Eto ti mahekile ka dilembe dizana do khata, se ni nyamsi ta maheka. (Varoma 10:2) Kha hi na kuwomba ti to nyane wa mti wa wu pfisisa m’bhalo wu hi nga lera. Hi nga m’vhuna ngu kuwuyeleta mapswi ya ma nga ñola mhaka, ni ku txhamusela ati ma wombako tona. Hi txi maha toneto, Dipswi da Txizimu, di na gwesa mapimo ni timbilu ta vathu.—Lera Luka 24:32.

9. Mapswi athu o khata ma nga va vhunisa ku txani vathu ti to ve xonipha Bhiblia? Womba txikombiso.

9 Ati hi wombako hi txi lava kulera m’bhalo ti nga vhuna m’thu ti to e xonipha Bhiblia. Ngu txikombiso, hi nga khathu: “He woni ati M’vangi wathu a wombako tona ngu mhaka yiya.” Se ngako hi txi wombawomba ni m’thu wu a si kholwiko ka Kristu, hi nga khathu: “He woni ati Mibhalo yo Sawuleka yi hi gelako tona.” Ngako hi txi mana awu a si khongeliko, hi nga mu wotisa: “Ina u khala ku ma pfa mapswi awa a kale?” Ngako hi txi khumbula ti to m’thu ni m’thu a ni ti a kholwako ka tona, hi na zama kuwombawomba ngu nzila yo tsakisa.—1 Vakorinto 9:22, 23.

10. a) Mwanathu mmwane a humeletwe ngu txani? b) Awe u wu wonisile ku txani mtamo wa Dipswi da Txizimu ka mthumo wako wa thembwe?

10 Wungi wa vanathu va woni ti to kuthumisa Dipswi da Txizimu ta gwesa vathu ava va va txhumayelako. Ngu txikombiso, mwanathu mmwane a endete wamweyo wa tate awu se a nga ti ni malembe a txi teka marhevhista. Se hahanze ko ya mninga direvhista da diphya da Muwoneleli a mu lerete m’bhalo wa wumwewo. A lerile  2 Vakorinto 1:3, 4, wu wombako tiya: “Tate wa wumbilu, Txizimu txa kotshe kuthavelela, txona txi hi thavelela ka sotshe sixaniso sathu.” M’bhalo wonewo wu mu gwesile ngutu wamwamna eyo wo kumba ha koza e kombela ti to mwanathu e lera kambe. Wamwamna eneyo a gwitile a txi khene ene ni msikati wakwe, va ti lava kuthavelelwa. M’bhalo wuwa wu mahile ti to e lava kuziva to tala ngu Bhiblia. Ngu ditshuri kuthumisa Dipswi da Txizimu ka wuthumeli wathu wa thembwe ti ni mtamo!—Mithumo 19:20.

HI TXI GONDISA DIBANZANI

11. Ngu wuhi wutixamuleli wa va va ku ni sienge ka mitshangano?

11 Ha ti dhunda kuxalela mitshangano ya dibanza, ya txigava ni ya m’ganga. Txivangelo txa hombe txo ya ka mitshangano yoneyo, ngu khozela Jehovha. Kambe ha tshumela hi vhuneka ka ti hi ti gondako. Ngu txikombiso, vanathu va va ku ni sienge va ni lungelo ni wutixamuleli wa hombe. (Jakobe 3:1) Phela va fanete ve tsaniseka ti to ati va ti gondisako, ti seketetwe ka Dipswi da Txizimu. Ngako u di nayo lungelo yiya, u nga mahisa ku txani ti to u gwesa timbilu ta vaengiseli?

12. Awu a ku ni m’wombawombo a nga tsaniseka ngu nzila yihi ti to wu seketetwe ka Bhiblia?

12 Mibhalo yi fanete yi va yona yi ku ni lisima ngutu ka txienge txako. (Johane 7:16) Ngu toneto, ti lava ti to u tiwonela ti to ka txienge txako, sikombiso ni sidinganiso  sako si si vi ni lisima kupala Bhiblia. U nga divale ti to, kulera to kari mu ka Bhiblia, ta hambana ni kugondisa to kari ngu Bhiblia. Se ngako u txo lera mibhalo yo tala ngutu, vaengiseli va nga yi divala. Se sawula kha kwati mibhalo yi u no yi thumisa. U gwita u va ni mbimo yo lera, u txhamusela, u veka txidinganiso, ni ku wu thumisa kwati. (Nehemiya 8:8) Ngako m’wombawombo wako wu di seketetwe ka diphepha da wona, tsaniseka ti to u gondile kwati ni totshe tindimana ati u ti thumisako. Duketa kupfisisa ti to mhaka ya kona yi yelana hani ni mibhalo yi yi nga kombiswa. Se thumisa mibhalo yoneyo ti to u gondisa ati ti ku ka diphepha da m’wombawombo. (Ka Beneficie-se da Escola do Ministério Teocrático, estudos 21 a 23, u nga mana sialakanyiso sa sinene.) Txa lisima ngutu, u nga divale kukombela Jehovha e kuvhuna ti to u gondisa timhaka ta mu ka Bhiblia.—Lera Esdra 7:10; Mavingwa 3:13, 14.

13. a) Mbhalo wu wu nga gondwa mitshanganoni wu gwesile mwanathu mmwane wa txisikati ngu nzila yihi? b) Awe u ta nga gweswa ngu nzila yihi ngu mibhalo yi yi lerwako mitshanganoni?

13 Mwanathu mmwane wa txisikati wa ditiko da Austrália a xuphekile ngutu i di ngadi mwanana. Kambe hambi mbimo yi a nga gonda ditshuri mayelano ni Jehovha, a si tsaniseki kwati to Jehovha wa mu dhunda. Kambe a ti ya pfa m’bhalo wu wu nga mu gwesa a di mitshanganoni. A alakanyisisile ni kumaha wuxolisisi aha a  nga ya hoka ka wumwane m’bhalo kambe. A tsanisekile ti to Jehovha wa m’dhunda. *(Wona txhamuselo ya hahatshi.) Ina awe u ta nga pfa m’bhalo wu wu nga kugwesa, u di ka mitshangano ya dibanza, ya txigava mwendo ya m’ganga?—Nehemiya 8:12.

14. Hi nga mahisa ku txani ti to hi kombisa kubonga Dipswi da Jehovha?

14 Ha mu bonga ngutu Jehovha ngu ku a nga hi ninga Dipswi dakwe, i ku Bhiblia. Txithembiso txakwe txo vhikela Bhiblia ditshuri. (1 Pedro 1:24, 25) Ngu toneto, hi lava kumaha totshe ti hi nga ti kotako ti to hi yi lera mbimo yotshe, hi yi thumisa ka wutomi wathu, ni ku yi thumisa hi txi vhuna vamwane. Ngako hi txi maha toneto, hi na kombisa ti to ha yi dhunda ni ku yi ninga lisima thomba yiya ya lisima, ni Nyane wa yona Jehovha Txizimu.

^ par. 13 Wona dibhokiso di di ku “ Ni zile ni tipfisisa.”