Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Muwoneleli—Wa txigondo  |  Outubro wa 2016

Ina u ti ti ziva?

Ina u ti ti ziva?

Ina kale m’thu a ndina thuka e bela thembweni ka mmwane e phaya nyansavari?

Digesto wa 1468 wa Justiniano, txhayimeni ya Roma. Dona di ni maphepha o tala aya ma wombawombako ngu milayo ya kale

NGU kuya ngu Matewu 13:24-26, Jesu a ti khene: “Mfumo wa nzumani wu fanana ni m’thu a nga phaya mbewu ya yinene thembweni kwakwe. Aniko, hagari ka wusiku, vathu, va di otete, a tile mlala wakwe a ta phaya nyasavari hagari ka fulaho, se ngu msana e huma. Mbimo yi fulaho yi nga mila yi txi veleka, ku to humelela nyasavari.” Vabhali vamwane va womba ti to mfananiso wonewo wu nga thumiswa ngu Jesu wu si na kumaheka. Kambe ngu kuya ngu mabhuku mamwane ya ditiko da kale da Roma, mhaka yoneyo yi ndina maheka.

Dibhuku dimwane da titxhamuselo ta Bhiblia di kombisa ti to, mlayo wa kale wa Roma, wu ti womba ti to, kuphaya timbewu thembweni ka m’thu mmwane amu ku ku ni siyalo, i ti wugevenga. Se toneto ti kombisa ti to mhaka yiya yi ti humelela. Wamwamna mmwane awu a pfisisako kwati timhaka ta milayo ditina dakwe i ku Alastair Kerr a wombile ti to ngu 533 msana kova Kristu a di hanyile hawa mafuni, Justiniano txhayimeni ya Roma a humesile mabhuku o tala aya ma wombawombako ngu ta milayo ya ditiko da Roma. Mabhuku onewo ma dhanwa ku i Digesto. Ona ma wombawomba ngu sizivi simwane sa mlayo si nga hanya ka 100 a 250 wa malembe msana kova Kristu a di hanyile hawa mafuni. Mmwane wawe i Ulpian. Ene a wombawombile ngu mhaka yi yi nga nga humelela ngu dilembe dizana da wumbidi, ya m’thu mmwane a nga dayela timbewu ta mmwane ngu ku ya thela nyasavari thembweni ka mmwane. Mabhuku onewo ma wombile ti to awu a nga maha toneto ku ti laveka ti to e hakela ngu ti a nga maha.

Ngu toneto, mhaka yoneyo yi kombisa ti to Jesu a ti wombawomba ngu mhaka yi ngu ditshuri yi mahekako.