Ndaka u ya ka menu ya wumbidi

Ndaka u ya ka dijanela da mndani

Tifakazi ta Jehovha

Txitxopi

Muwoneleli—Wa txigondo  |  Maio wa 2017

U nga leki lirando lako li hola

U nga leki lirando lako li hola

“Se ngu mhaka ya kutala ka wubihi, lirando la wungi wa vathu li na hola.”—MATEWU 24:12.

TINDANDO: 60, 135

1, 2. a) Mapswi a Jesu ka Matewu 24:12, ma humelete ka va mani? b) Ngu ku ya ngu dibhuku da Mithumo, ina lirando la otshe makristu a mbimo yile li hote? (Wona mfota wu wu ku makhatoni.)

MBIMO yi Jesu a nga ti ha mafuni, a womawombile ngu mazumbelo a vathu va masiku a magwito. Ati khene: “Lirando la wungi wa vathu li na hola.” (Matewu 24:3, 12) Vajudha va dilembe dizana do khata va ti womba ti to vona mbathu va Txizimu, kambe va lekile lirando lawe ka Txizimu li hola.

2 Hambiketo, Makristu o tala a mbimo yile kha ma leka lirando la ona li hola. Ona ma ti khutala ku txhumayelani ka “mahungu a maphya a Jesu Kristu” ngu litsako. Ona ma ti randa makholwa kuwowe ni vamwane ava va nga ti si se ziva ditshuri. Makristu onewo ma tsanisile lirando lawe ka Txizimu. (Mithumo 2:44-47; 5:42) Kambe vamwane kwawe, va lekile lirando lawe li hola. Hi ti zivisa ku txani?

3. Nji txani txi nga holisa lirando la Makristu mamwane?

3 Jesu a gete Makristu a Efesu a txi khene: “U lekile  lirando lako lo khata.” (Mtuletelo 2:4) Ti nga maheka ti to Makristu a Efesu, ma ti belelwa ngu moya wa vathu va mule kwawe, ava va nga ti si khatali ngu vamwane. (Vaefesu 2:2, 3) Didhoropa da Efesu di ti ganyile, vathu va ti khatala ngutu ngu kulava silo sa tshuko kupinda timwane. Wungi wawe va ti ni mahanyelo o biha, nem va si khatali ngu milayo ya Txizimu. Va ti khatala ngutu ngu kutitsakisa kupinda kukombisa lirando la ditshuri ka Txizimu ni ka vamwane.

4. a) Nyamsi lirando li nga holisa ku txani? b) Ngu yahi makhalo aya hi fanelako kutsanisa lirando ka ona?

4 Ina mapswi a Jesu mayelano ni kuhola ka lirando ma thuma ni nyamsi? Inna, ma thuma. Vathu vo tala nyamsi kha va na lirando ka Txizimu. Vathu va timiliyoni va themba tisengeletano ta vathu ti to ti lulamisa sikarato, kha va thembi Jehovha. Lirando lawe li ya li hola. Phela lirando ali Makristu ma ku nalo ngu Jehovha konkuwa li nga hola, nga ti ti nga maheka ka dibanza da Efesu. Ngu toneto, he bhuleni ngu makhalo mararu aya hi fanelako kuxayisa lirando lathu ka ona: 1) kuranda Jehovha, 2) kuranda ditshuri da Bhiblia ni 3) ni kuranda vanathu.

KURANDA JEHOVHA

5. Ngu ku txani hi di fanete hi randa Txizimu?

5 I mani wu hi fanelako ku m’randa kupala votshe? Jesu a xamute a txi khene: “‘Randa Mkoma Txizimu txako, ngu yotshe mbilu yako, ngu wotshe moya wako ni otshe mapimo ako.’ Atxiya ngu txona i ku txirumo txa hombe txo khata.” Lirando lathu ka Jehovha li hi maha hi engisa sirumo sakwe, hi tsanisela sikarato ni kunyenya to biha. (Lera Masalmu 97:10) Kambe Sathane ni mafu akwe va duketa kudaya lirando lathu ka Txizimu.

6. Kumaheka txani ngu vathu ava va si randiko Txizimu?

6 Nyamsi wa ditshiku vathu va dhunda timhaka to biha. Vathu kha va randi Txizimu, kambe “vo ti randa vapune”. (2 Timoti 3:2) Txawe ngu “kunavela ka mmidi, kunavela ka maso ni ku ti kulisa ngu tithomba”. (1 Johane 2:16) Mpostoli Pawulo a wombile ati ti nga humelelako hi txi lava ku titsakisa. A ti khene: “Ngukusa kuxuva ka mmidi ngu lifo.” Ngu ku txani? Nguko, ava va mahako toneto, va timaha valala va Txizimu. (Varoma 8:6, 7) Vathu va va hetako mbimo yawe va txi lava tithomba ni ku tidila ngu wugelegele, magwito awe ndingana dwe.—1 Vakorinto 6:18; 1 Timoti 6:9, 10.

7. Ngu yahi mawonelo aya Makristu ma fanelako me tiwonela ka ona?

7 Vathu va va si kholwiko ti to Txizimu txi ho, ni va va kholwako ti to silo si to timahekela, va zama kumaha ti to vamwane ni vona ve fana navo. Va hangalasa mawonelo a ti to awu a tumelako ti to ku ni M’vangi, a vhilekile futhi txipumbu. I singeto dwe, vathu vo tala va xonipha ngutu timhaka ta mu ka mabhuku a siyensiya kupinda ta mu ka Bhiblia. (Varoma 1:25) Makristu ti lava me tiwonela ka timhaka toneto. Ngu ku txani? Nguko, wuxaka wathu ni Jehovha wu nga thuka wu dawa ni lirando lathu li nga hola.—Vahebheru 3:12.

8. a) Ngu sihi sikarato asi si nga godholisako vathu va Jehovha? b) Masalmu 136:23, yi hi tsanisa ngu nzila yihi?

 8 Aku hi hanyako ka matsimbitiselo awa o biha a sa mafu, hi randetwe ngu tiphango to tala. Se hi nga thuka hi va ni dikhodho. (1 Johane 5:19) Se ngako hi txi tumelela ti to hi va ni dikhodho ngutu, likholo lathu li nga fa ni lirando lathu ka Txizimu li nga hola. Ngu txikombiso, hi nga va ni sikarato so kumba, malwati kumweko ni wusiwana. Litsako lathu li nga mwalala ngako hi txi tandeka kumaha ati hi ti lavako. Ti nga maha hi va ni tingana ngako hi txi wona ti to ati hi nga ti ti emete kha ta maheka. Kambe hambi hi txo manana ni txani ni txani, hi nga pimiseni ti to Jehovha a hi lekile. Nditxe txitsaniso txa mu ka Masalmu 136:23: “Ene a hi alakanyile kuxanisekani kwathu, nguko lirando lakwe la simama kala kupinduka!” Hi nga tsaniseka ti to Jehovha wa engisa ni kuxamula “dipswi da mkombelo” wathu.—Masalmu 116:1; 136:24-26.

9. Nji txani txi nga vhuna Paulo ti to eva ni lirando lo tsana ka Txizimu?

9 Mpostoli Paulo a zumbile a di tsani. Nji txani txi nga m’vhuna? Ngu alakanyisisa ngu nzila yi Jehovha a nga m’vhuna ngu yona ka timwane. A ti khene: “Mkoma ngene txivhuno txangu, kha ni nambi thava txilo; m’thu a nga ni maha txani, kani?” (Vahebheru 13:6) Kuthemba kwakwe Jehovha ti m’vhuni ti to e wonisana ni sixaniso sa wutomi. Mbimo yi Paulo a nga va ni sikatato sa hombe, themba yakwe ka Jehovha kha ya mwalala. Hambi mbimo yi a nga ti jele, a sikoti kuvhuna vanathu mabanzani ngu ku va bhalela mapapilo e va tsanisa. (Vaefesu 4:1; Vafilipiya 1:7; Filimoni 1) Ku singa ni mhaka ni ti to Paulo a manani ni txani, ene a simamile eva ni lirando lo tsana ka Jehovha. (2 Vakorinto 1:3, 4) Hi nga tekelela Paulo ngu nzila yihi?

Kombisa lirando ka Jehovha (Wona ndimana 10)

10. Hi nga mahisa ku txani ti to lirando lathu ka Jehovha li tsana?

 10 Hi nga mahisa ku txani ti to lirando lathu ka Txizimu li tsana? Paulo a ti khene: “Khongelani mi si karali.” A gwitile a txi khene: ‘Simamisani kukhongelani’. (1 Vatesalonika 5:17; Varoma 12:12) Ti mahisa ku txani ti to kukhongela ti hi yisa hafuhi ka Txizimu? Phela hi txi maha mkombelo, hi wombawomba ni Jehovha. Eto ti maha ti koteka ti to hi va ni wuxaka wa wunene ni Jehovha. (Masalmu 86:3) Ngako hi txi gela Tate wathu wa nzumani totshe ati hi ti pimisako ni ti hi ti lavako, hi maneka hi di hafuhi nayo. (Masalmu 65:2) I singeto basi, mbimo yi hi wonako ti to Jehovha wa xamula mikombelo yathu, lirando lathu ngu ngene la kula. Ha tsaniseka ti to: “MKOMA a hafuhi ka vale va m’dhanako.” (Masalmu 145:18) Hi nga vhunwa ngu txani ti to hi xula sikarato sa konkuwa ni sa mbimo yi tako? Hi nga vhunwa ngu themba yi hi ku nayo ya ti to Jehovha wa hi randa ni ku wa hi khatalela.

DHUNDA DITSHURI DA BHIBLIA

11, 12. Hi nga mahisa ku txani ti to hi kulisa nzila yi hi dhundako ditshuri da Bhiblia ngu yona?

11 Aku hi ku Makristu ha di dhunda ditshuri. Bhiblia ngu yona yi ku ni ditshuri. Jesu a gete Jehovha a txi khene: “Dipswi dako ngu dona ditshuri.” (Johane 17:17) Kasiku hi dhunda ditshuri da Bhiblia, hi fanete hi ziva kwati ati Bhiblia yi ti wombako. (Vakolosa 1:10) Kambe ku ni timwane. Masalmu 119 yi kombisa ati hi fanelako ku ti maha. (Masalmu 119:97-100.) Ditshiku dotshe hi fanete hi zumba hi txi alakanya, mwendo kualakanyisisa ngu ti hi nga lera mu ka Bhiblia. Ngako hi txi alakanyisisa ngu wuyelo yo thumisa ditshuri da mu ka Bhiblia, ti na hi maha hi yi dhunda ngutu.

12 M’bhali wa Masalmu a tshumete a txi khene: “Mapswi ako ma tshamba ngutu; ma lombela ngutu kupinda wulombe!” (Masalmu 119:103) Mabhuku aya ma nga seketelwa mu ka Bhiblia, aya ma lulamiselwako ngu sengeletano ya Txizimu ma tshamba kufana ni mndiwo wo tshamba. Ngako hi txi wumana mndiwo wonewo wo tshamba, hi kulula ni mbiya. Ngu ha kufanako, mabhuku ya hi ma manako ti lava hi ma gonda kwati. Hi na va hi txi tidila ngu “mavingwa o tsakisa” a ditshuri, ngu toneto ti na hi hehukela kukhumbula ati hi nga lera ni ku hi na tshumela hi vhuna vamwane.—Eklesiaste 12:10.

13. Nji txani txi nga maha ti to Jeremiya e dhunda mapswi a Txizimu? Ene a tipfisile ku txani?

13 Mprofeti Jeremiya a ti dhunda mapswi a Txizimu. A ti khene: “Mapswi ako i sakudya sangu, hani ni hani ni ma manako kona; dipswi dako i litsako langu, ni kunengela ka mbilu yangu, nguko ditina dako di zivilwe ngu mhaka yangu, awe MKOMA, Txizimu nyane wa mtamo wotshe!” (Jeremiya 15:16) Jeremiya a alakanyisisile ngu mapswi o tshamba a Txizimu. A ti tsakete ku va muemeli wa Jehovha ni kuhuwelela didungula dakwe. Ngako hi txi dhunda ditshuri da Bhiblia, ha sikota kuwona lungelo yo sawuleka yi hi ku nayo yo va Tifakazi ta Jehovha ni kutxhumayela ngu Mfumo ka masiku awa o gwita.

Kombisa lirando ka ditshuri da Bhiblia (Wona ndimana 14)

14. Hi nga maha txani kambe ti to hi kulisa lirando lathu ngu ditshuri da Bhiblia?

 14 Nji txani txi no hi vhuna kukulisa lirando lathu ngu ditshuri da Bhiblia? Ngu ya mitshanganoni mbimo yotshe kasiku hi ya gondiswa ngu Jehovha. Nzila yimwane ya lisima ayi hi gondiswako ngu yona i gondo ya Bhiblia ngu kuthumisa Muwoneleli. Kambe hi txi lava kuvhuneka ngu gondo yoneyo, ti lava hi khata ngu kululamisela i di ngadi mbimo. Ngu txikombiso, u nga lera totshe tindimana ta Bhiblia ati ti nga kombiswa. Nyamsi vo tala va nga bhaxara Muwoneleli ka internet nguko da maneka kambe ka site ya jw.org ni ka JW Library. Makhambi o tala aya di manekako ka mitxhini ta hehuka ni kumana ndimana ya Bhiblia yi yi nga kombiswa. Hambi hi txi sawula kugonda msungo wa mhaka wumwewo ngu wumwewo, ngako hi txi xolisisa kwati m’bhalo wu wu nga komiswa, lirando lathu ngu ditshuri da Bhiblia li na ya li kula.—Lera Masalmu 1:2.

KURANDA VANATHU

15, 16. a) Ngu txihi txirumo atxi Jesu a nga hi ninga txi ku ka Johane 13:34, 35? b) Lirando lathu ka Txizimu ni Bhiblia li yelana ngu nzila yihi ni lirando li hi ku nalo ngu vanathu?

15 Ngu ditshiku do gwitisa ha mafuni, Jesu a ti khene: “Na mi ninga mlayo wa wuphya: Randanani! Nga ti ani ni nga mi randa, nananu mi fanete kurandana. Ngu toneto va no mi zivisa tona ti taku mi vagondiswa vangu: Ngako mi txi randana.”—Johane 13:34, 35.

16 Kuranda vanathu ta yelana ni kuranda Jehovha. Ngako hi si txi randi Txizimu, hi nge va randi vanathu. Ni ku ngako hi si va randi vanathu, hi nge txi randi Txizimu. Mpostoli Johane a ti khene: “Nguko awu a si randiko mwanawe, awu a mu wonako, kha na ku si kota kuranda Txizimu txi a si txi woniko.” (1 Johane 4:20) Lirando li hi randako Jehovha li tsimbitisana ni li hi randako Bhiblia ngu lona. Ngu ku txani? Nguko hi txi randa Bhiblia hi na  lava kuengisa sirumo sa yona so randa Jehovha ni vanathu.—1 Pedro 1:22; 1 Johane 4:21.

Kombisa lirando ka vanathu (Wona ndimana 17)

17. Hi nga mahisa ku txani ti to hi kombisa lirando ka vamwane?

17 Lera 1 Vatesalonika 4:9, 10. Hi nga maha txani ti to hi kombisa lirando dibanzani? Hi nga kombisa ngu kuvhuna vanathu va va nga kula ava va lavako txivhuno ti to ve ya mitshanganoni. Hi nga vhuna noni yi yi lavako kululamiselwa so maha mtini ka yona. (Jakobe 1:27) Hi nga vhuna vanathu va va ku ni dikhodho, va ku ni sikarato simwane sa wutomi. Hi nga va khatalela, hi va tsanisa ni ku va thavelela. Hi kombisa ti to hi randa “makholwa kulothu” ngu simaho ni mapswi.—Vagalatiya 6:10.

18. Nji txani txi no hi vhuna kululamisa timhaka ni vanathu?

18 Bhiblia yi womba ti to ka “masiku a kugwitisa” a matsimbitiselo awa o biha a sa mafu, vathu va na va va kutimahisa ni vanyatimbiti. (2 Timoti 3:1, 2) Ngako hi ku Makristu ti lava hi tikarata ti to hi kulisa lirando lathu ngu Jehovha, Dipswi dakwe ni vanathu. Ngako hi nga mbi hetiseka, yimwane mbimo hi na kandana sizenende ni vanathu. Kambe aku hi dhundanako, ngu nzila ya yinene hi na zama kululamisa timhaka ngu txikuluveta. (Vaefesu 4:32; Vakolosa 3:14) Hi nga lekeni lirando lathu li hola! Kambe he simameni hi va ni lirando la hombe ngu Jehovha, Dipswi dakwe ni vanathu.